ކޯޓުއާ އަށް އަނިޔާވެއްޖެ
އަނިޔާގެ ސަބަބުން ޔުއެފާ ޗެމްޕިއަންސް ލީގުގައި ރެއާލް އިން ލީލްއާ ދެކޮޅަށް ރެއާލް އިން ކުޅޭ މެޗުގައި ވެސް ކޯޓުއާ އަށް ނުކުޅެވޭނެ އެވެ.
ރެއާލް މެޑްރިޑުގެ އެއް ނަންބަރު ގޯލު ކީޕަރު ތިބައޫ ކޯޓުއާ
ސްޕެއިންގެ ރެއާލް މެޑްރިޑުގެ އެއް ނަންބަރު ގޯލު ކީޕަރު ތިބައޫ ކޯޓުއާ އަށް އަނިޔާވެއްޖެ އެވެ.
ކޯޓުއާ އަށް އަނިޔާވެފައި ވަނީ ސްޕެނިޝް ލީގުގައި ރެއާލް އިން އެތުލެޓިކޯ މެޑްރިޑާ ދެކޮޅަށް ކުޅުނު މެޗުގަ އެވެ. އެތުލެޓިކޯގެ އަމިއްލަ ދަނޑުގައި ކުޅުނު އެ މެޗުގައި ކޯޓުއާ އަށް އަނިޔާވި ނަމަވެސް، އޭނާ ވަނީ މެޗު ފުރިހަމަ ކޮށްފަ އެވެ. އަދި އެ މެޗަށްފަހު ވަނީ ކޯޓުއާގެ އިތުރު މެޑިކަލްގެ ކަންކަން ކުރިއަށް ގެންގޮސްފަ އެވެ.
ރެއާލުން ހާމަކޮށްފައިވާ ގޮތުގައި ހޯމަ ދުވަހު ކުރިއަށް ގެންދިޔަ ކޯޓުއާގެ މެޑިކަލް ޓެސްޓުތަކުން ދައްކާ ގޮތުގައި ކޯޓުއާގެ ވާއަތު ފައިގެ މަސްގަނޑަށް ވަނީ އަނިޔާވެފަ އެވެ. އަދި އެ އަނިޔާގެ ސަބަބުން ދުވަސް ކޮޅެއް ވަންދެން އޭނާ ކުޅުމާ ދުރުގައި ހުންނަން ޖެހޭނެ އެވެ. އެހެންކަމުން ކުރިއަށް އޮތް ބައިނަލްއަޤުވާމީ ބްރޭކު ނިމުމުގެ ކުރިން، ކޯޓުއާ އަލުން އެނބުރި ކުޅުމުގެ ތެރެއަށް އާދެވޭނެ ކަމަށް ނުބެލެވޭ ކަމަށް ވެސް ރެއާލާ ހަވާލާދީ ސްޕެއިންގެ މީޑިއާ ތަކުގައި ވަނީ ރިޕޯޓު ކޮށްފަ އެވެ.
އަނިޔާގެ ސަބަބުން ޔުއެފާ ޗެމްޕިއަންސް ލީގުގައި ރެއާލް އިން ލީލްއާ ދެކޮޅަށް ރެއާލް އިން ކުޅޭ މެޗުގައި ވެސް ކޯޓުއާ އަށް ނުކުޅެވޭނެ އެވެ. އެ މެޗުގައި އޭނާގެ ބަދަލުގައި ރެއާލްގެ ގޯލު ބަލަހައްޓާނީ އެ ޓީމަށް ކުޅެމުން އަންނަ ޔޫކްރެއިންގެ ގޯލު ކީޕަރު އަންދްރޭ ލުނިން ކަމަށް ވެސް ރިޕޯޓުތައް ބުނެ އެވެ.
ރެއާލަށް ބަދަލުވެ އެ ކުލަބުގައި މުހިންމު ދައުރެއް އަދާ ކުރަމުން އަންނަ ކޯޓުއާ އަށް ވަނީ މި ފަހުން ގާތް ގާތުގައި އަނިޔާގެ މައްސަލަތަކެއް ދިމާވެފަ އެވެ. މިއަހަރުގެ ކުރީ ކޮޅު ކޯޓުއާ އަށް ލިބުނު އަނިޔާ އަކަށް ފަހު، އަލުން އެނބުރި ފަރިތަކުރުމަށް އައިސް ކުޅެމުން އަންނަނިކޮށް ވެސް އޭނާ އަށް ވަނީ އަނިޔާވެފަ އެވެ. އެ އަނިޔާއާ ގުޅިގެން ވެސް ގާތް ގަނޑަކަށް ދެ މަސް ދުވަހުގެ މުއްދަތެއް ވަންދެން އޭނާ ވަނީ ކުޅުމާ ދުރުގައި ހުރެފަ އެވެ.
