ޔުއެފާ ޗެމްޕިއަންސް ލީގުގައި ބަޔާން މިއުނިކުން ޑައިނަމޯ ޒަގްރެބްއާ ދެކޮޅަށް ކުޅުނު މެޗުން ނުވަ ލަނޑުގެ ބޮޑު މޮޅެއް ހޯދައިފި އެވެ.

އައު ފޯމެޓުގެ ޗެމްޕިއަންސް ލީގުގެ ދަށުން ބަޔާންގެ އަމިއްލަ ދަނޑުގައި އަންގާރަ ދުވަހުގެ ރޭ ކުޅުނު މެޗު އެ ޓީމުން ކާމިޔާބު ކުރީ 9-2ންނެވެ. މެޗުގެ ފުރަތަމަ ހާފުގައި ބަޔާނުން ވަނީ ތިން ލަނޑު ޖަހައި ލީޑު ނަަގައިފަ އެވެ. ދެ ވަނަ ހާފުގައި ޑައިނަމޯ ޒަގްރެބް އިން ދެ ލަނޑު ޖެހިއިރު، ބަޔާނުން ވަނީ އިތުރު ހަ ލަނޑު ޖަހައިފަ އެވެ.

މެޗު ފަށައިގެން 19 ވަނަ މިނެޓުގައި ބަޔާނަށް ލީޑު ނަގަދިނީ އިންގްލެންޑުގެ ކެޕްޓަން ހެރީ ކޭން އެވެ. އެއީ ބަޔާނަށް ލިބުނު ޕެނަލްޓީއެއް ކާމިޔާބު ކޮށްގެން ކޭން ޖެހި ލަނޑެކެވެ. ފުރަތަމަ ހާފުގައި ބަޔާންގެ އަނެއް ދެ ލަނޑު ޖެހީ ރަފައެލް ގަރޭރޯ އަދި މައިކަލް އޮލީސޭ އެވެ.

ދެ ވަނަ ހާފު ފަށައިގެން ކުރީ ކޮޅު ޑައިނަމޯ ޒަގްރެބް އިން ދެ ލަނޑު ޖެހި އެވެ. އެއީ މެޗުގެ 49 ވަނަ މިނެޓުގައި ބްރޫނޯ ޕެޓްކޮވިޗް ޖެހި ލަނޑާއި، މެޗުގެ 50 ވަނަ މިނެޓުގައި ޓަކޫޔާ އޮގިވާރާ ޖެހި ދެ ލަނޑެވެ. ދެ ލަނޑާ އެކު އެ ޓީމުން ފަރަގު ކުޑަ ކުރި ނަމަވެސް، ބަޔާނުން ވަނީ އިތުރު ހަ ލަނޑު ޖަހައިފަ އެވެ.

ދެ ވަނަ ހާފުގައި ކޭން ވަނީ އިތުރު ތިން ލަނޑު ޖަހައި، މެޗުގައި ހަތަރު ލަނޑު ހަމަކޮށްފަ އެވެ. އެއާއެކު ކޭން ވެގެމް ގޮސްފައި ވަނީ ޔޫރަޕުގެ މަތީ ފަންތީގެ މުބާރާތެއްގައި، އިންގްލެންޑުގެ އެންމެ ގިނަ ލަނޑު ޖެހި ކުޅުންތެރިޔާ އަށެވެ. މެޗުގައި ބަޔާންގެ އަނެއް ލަނޑުތައް ޖެހީ، އޮލީސޭގެ އިތުރުން، ލެރޯއީ ސާނޭ އަދި ލެއޯން ގޮރެޓްޒްކާ އެވެ.