އެމެރިކާގެ ސްޓޭޓް ސެކްރެޓަރީ އެންތަނީ ބްލިންކެން އަންގާރަ ދުވަހު މިޞްރަށް ދަތުރުފުޅެއް ކުރައުރައްވާނެކަމަށް ސްޓޭޓް ޑިޕާޓްމަންޓުން ބުނެފައިވެއެވެ.
މި ދަތުރުފުޅުގައި ޣައްޒާގެ ހަނގުރާމަ ހުއްޓުވުމާއި، ހަމާސްގެ ބަންދުގައި ތިބި އިޒްރޭލުގެ ރަހީނުން ދޫކޮށްލުމާ ބެހޭގޮތުން މިޞްރުގެ އިސްވެރިންނާ މަޝްވަރާ ކުރައްވާނެއެވެ.
ޣައްޒާގައި އިޒްރޭލުން ހިންގަމުންދާ ހަނގުރާމަ ހުއްޓުވުމަށް ވޮޝިންގްޓަނާއި އެކުގައި މެދުވެރިންގެ ގޮތުގައި ހަރަކާތްތެރިވާ ގަތަރާއި މިޞްރުން މިހާތަނަށް ކުރި މަސައްކަތް ކާމިޔާބުވެފައެއް ނުވެއެވެ. ބްލިންކަންގެ މި ދަތުރުފުޅާ ބެހޭ ގޮތުން ހަމާސްގެ އޮފިޝަލަކު ބުނެފައިވަނީ، އެމެރިކާއިން ސުލްހަ ގާއިމް ކުރުމުގެ ނަމުގައި ކުރާ މަސައްކަތުގައި ހަމަލާތައް ހުއްޓުވުމަށް އިޒްރޭލަށް ޕްރެޝަރ ކުރަމުންނެއް ނުދެއެވެ. ހަމާސް އިން ދެކޭ ގޮތުގައި އަނެއްކާވެސް އެމެރިކާއިން އައު ހުށަހެޅުމެއް ހުށަހަޅައިގެން ކުރަން ފަށަން އުޅެނީ ކުރިންވެސް ފެއިލްވެފައިވާ މަސައްކަތެކެވެ.
ރިޕޯޓްތައް ބުނާގޮތުގައި ސުލްހައިގެ އެއްބަސްވުމަކަށް އައުމަށް މިހާރު އޮތް އެންމެ ބޮޑު ދެ ހުރަކީ މިސްރާއި އިޒްރޭލު ވަކިކުރާ ސަރަހައްދީ ރޮނގުގައި އޮންނަ ފިލަޑެލްފިއާ ކޮރިޑޯގައި އިޒްރޭލު ސިފައިން ދާއިމީ ގޮތެއްގައި ބޭތިއްބުމަށް އިޒްރޭލުން ގޮތްދޫނުކޮށް ބާރުއެޅުމާއި ހަމާސް އާއި އިޒްރޭލާ ދެމެދު ހައްޔަރު ކޮށްފައިތިބި ދެ ގައުމުގެ މީހުން ބަދަލު ކުރާނެ ގޮތުގެ ތަފްސީލްތަކަށް އެއްބަސް ނުވެވުން ކަމަށްވެއެވެ. މިސްރުން ބުނެފައިވަނީ ފިލެޑެލްފިއާ ކޮރިޑޯގައި ދާއިމީ ގޮތެއްގައި އިޒްރޭލް ސިފައިން ބައިތިއްބަން އެއްބަސް ނުވާނެ ކަމަށެވެ.
ސްޓޭޓް ޑިޕާޓްމަންޓުން ބްލިންކަންގެ ދަތުރުފުޅާ ބެހޭ ގޮތުން ނެރެފައިވާ ބަޔާނުގައި ބުނެފައިވަނީ ޚާރިޖީ ވަޒީރުގެ މި ދަތުރުފުޅުގައި ހުރިހާ ރަހީނުން ދޫކޮށްލުމާއި، ފަލަސްތީން ރައްޔިތުންގެ ތަކުލީފްތަކަށް ލުއިހޯދައިދިނުމާއި، ސަރަޙައްދުގެ ސަލާމަތާއި ރައްކާތެރިކަން ޤާއިމުކުރުމަށް މަގުފަހިވާނެ އެއްބަސްވުމަކަށް އާދެވޭތޯ މަޝްވަރާ ކުރައްވާނެކަމަށެވެ.
އިޒްރޭލުން ހުއްޓުމެއްނެތި ޣައްޒާ އަށް ދެމުންދާ ހަމަލާތަކުގައި މިހާތަނަށް ފަލަސްތީނުން 41،000ށް ވުރެ ގިނަ މީހުން ވަނީ ޝަހީދުވެފައެވެ.
