ޔަމަންގެ ދުރުރާސްތާ މިސައިލް ހަމަލާއެއް އިޒްރޭލުގެ މެދުތެރެއަށް
ހޫތީން ބުނެފައިވަނީ އެމީހުންގެ މިސައިލް ވައްޓާލުމަށް އިޒްރޭލުން 20 މިސައިލް ފޮނުވި ކަމަށާއި އެހެން ނަމަވެސް މިސައިލް އިޒްރޭލަށް ވައްޓާލެވިފައި ނުވާކަމަށެވެ.
އަލިފާން ރޯވެފައިވާ ސަރަހައްދުން އަލިފާން ނިއްވުމަށް ރެސްކިއު ޓީމުން މަސައްކަތް ކުރަނީ
ޔަމަންގެ ދުރުރާސްތާ މިސައިލް ހަމަލާއެއް އިޒްރޭލުގެ މެދުތެރެއަށް ފޮނުވާލައިފިއެވެ.
އިޒްރޭލު ސިފައިންވަނީ އާދިއްތަ ދުވަހުގެ މިހަމަލާ އިޒްރޭލަށް އެރިކަން ކަށަވަރުކޮށްދީފައެވެ. މިސައިލް ވެއްޓުނު ހިސާބުގައި ރޯވި ކަމަށްވެސް އިޒްރޭލުން ބުނެފައިވެއެވެ.
މިސައިލް ހަމަލާގެ ސަބަބުން ތެލްއަވީވް އާއި ބެން ގްރިއޯން ބައިނަލްއަގްވާމީ ވައިގެ ބަނދަރު ހިމެނޭ ގޮތުން މެދުތެރޭ އިޒްރޭލުގެ ސަރަހައްދުތަކުގައި ސައިރަން އެޅި ކަމަށާއި، ރައްކައުތެރިކަން ހޯދަން މީހުން ކޮޅުކޮޅު މައްޗަށް ދުވިކަމަށް ވެސް ރިޕޯޓްތައް ބުނެއެވެ. ހަމަލާގެ ސަބަބުން އެއްވެސް ތަނަކަށް ގެއްލުމެއް ލިބުނު ކަމަކަށް އަދި މީހަކަށް އަނިޔާއެއް ވީކަމަކަށް ނުބުނެއެވެ. ލަސްތަކެއް ނުވެ އެއަރޕޯޓްގެ މަސައްކަތް ފަށާފައިވާ ކަމަށް ވެސް ޚަބަރުތައް ބުނެއެވެ.
އިޒްރޭލުގެ އިމަޖެންސީ ޚިދުމަތްތަކުގެ އޮފިޝަލަކު އެކްސްގައި ކުރި ޕޯސްޓެއްގައި ބުނެފައިވަނީ 9 މީހުންނަށް ކުދިކުދި އަނިޔާތައް ލިބިފައިވަނީ ރައްކައުތެރިކަން ހޯދުމަށް އުޅުމުގެ ތެރޭގައި ކަމަށެވެ.
މިސައިލް ފޯރި ސަރަހައްދުން ގަދަފަދަ ގޮވުންތަކެއްގެ އަޑު އިވުނު ކަމަށް ރިޕޯޓްތައް ބުނެއެވެ. އިޒްރޭލު ސިފައިން ބުނެފައިވަނީ އެ އަޑުފައްގަނޑަކީ އިޒްރޭލުގެ މިސައިލް ދީފާއީ ނިޒާމުން ޔަމަންގެ މިސައިލަށް ހުރަސް އެޅުމުން އުފެދުނު އަޑު ކަމުގައެވެ.
މިސައިލް ހަމަލާ ދިން ޔަމަނުގެ ހޫތީންގެ ސަބާ ނިއުސް އޭޖެންސީން ބުނެފައިވަނީ އިޒްރޭލުގެ ދިފާއީ ނިޒާމަށް އެމީހުން ފޮނުވާލި މިސައިލް ވައްޓާނުލެވުނު ކަމަށާއި، މިސައިލް ޓާގެޓަށް ވާސިލްވެ ގޮވި ކަމުގައެވެ.
ހޫތީންގެ މީޑިއާ އޮފިޝަލް ނަސްރުއްދީން އާމިރު އެކްސްގައި ކުރި ޕޯސްޓެއްގައި ބުނީ ޔަމަނުން ފޮނުވި މިސައިލަށް ހުރަސް އަޅަން 20 މިސައިލް އިޒްރޭލުން ފޮނުވި ކަމަށާއި އެހެން ނަމަވެސް އެކަން އިޒްރޭލަށް ކާމިޔާބު ނުވެ މިސައިލް އިޒްރޭލަށް އަރާފައިވާ ކަމަށެވެ.
ހޫތީންގެ އަސްކަރީ ތަރުޖަމާނު ޔަހްޔާ ސާރީ ދިން ބަޔާނުގައި ބުނީ ޔަމަނުގެ މިސައިލް ފޮނުވާލީ އިޒްރޭލުގެ އަސްކަރީ މަރުކަޒަކަށް ކަމަށާއި، ހަމަލާ ދިނީ ހައިޕަރސޮނިކް ބެލިސްޓިކް މިސައިލަކުން ކަމަށާއި، މިސައިލް އިޒްރޭލުގެ ވައިގެ ދިފާއީ ނިޒާމުތައް ފޫއަޅުވާލި ކަމުގައެވެ.
އިޒްރޭލުގެ ބޮޑުވަޒީރު ބެންޖަމިން ނެތަންޔާހޫ އާދީއްތަ ދުވަހު ހޫތީންގެ މި ހަމަލާއަށް ރައްދު ދެއްވާ ނެރެއްވި ބަޔާނުގައި ވިދާޅުވީ "އިޒްރޭލަށް ގެއްލުން ދިނުމަށް ކުރާ ކޮންމެ ކަމަކަށް ބޮޑު އަގެއް ދައްކަންޖެހޭކަން ހޫތީންނަށް މިހާރު އެނގެންވާނެ" ކަމަށެވެ.
