ޒަކިއްޔާގެ މަރާ ގުޅިގެން މީހަކު ހައްޔަރެއް ނުކުރޭ، އިތުރު ތަހުލީލު ކުރުމަށް ހަށިގަނޑު މާލެ ގެނެސްފި
11 ސެޕްޓެމްބަރު 2024 | ބުދަ 05:20ޙާދިސާގެ މައުލޫމާތު ފުލުހުންނަށް ރިޕޯޓު ކޮށްފައިވަނީ އަންގާރަ ދުވަހުގެ ހެނދުނު 10:10 އެހާއިރު
މައުލޫމާތު ލިބޭ ގޮތުގައި ފެނިފައިވަނީ ނ ހޮޅުދޫ ނިއުލައިފް ޒަކިއްޔާ މޫސާ
ނ ހޮޅުދޫގައި މަރުވެފައި އޮއްވައި ފެނުނު އަންހެން މީހާގެ މަރާ ގުޅިގެން މިހާތަނަށް މީހަކު ހައްޔަރުކޮށްފައި ނުވާކަމަށް ދިވެހި ފުލުހުންގެ ޚިދުމަތުން ބުނެފިއެވެ.
މި ޙާދިސާގެ މައުލޫމާތު ފުލުހުންނަށް ރިޕޯޓު ކޮށްފައިވަނީ އަންގާރަ ދުވަހުގެ ހެނދުނު 10:10 އެހާއިރުކަމަށް ފުލުހުން މައުލޫމާތު ދެއެވެ. މަރުވެފައި އޮއްވައި ފެނިފައިވަނީ ނ ހޮޅުދޫ ޒަކިއްޔާ މޫސާއެވެ.
އެކަމުގެ ފަހުގެ މައުލޫމާތު ހިއްސާ ކުރަމުން ބުދަ ދުވަހު ފުލުހުންގެ މީޑިއާ އޮފިޝަލު ވިދާޅުވީ، ހޮޅުދޫގައި ނިޔާވި މީހާގެ ހަށިގަނޑު އިތުރު ތަހުލީލުތައް ކުރުމަށް އަންގާރަ ދުވަހުގެ ވަގުތެއްގައި މާލެ ގެނެވިފައިވާ ކަމަށެވެ.
މި މައްސަލައާ ގުޅިގެން އަދި މީހަކު ހައްޔަރު ކޮށްފައި ނުވާކަމަށްވެސް ފުލުހުން މައުލޫމާތު ދެއެވެ.
މި މައްސަލަ ފުލުހުން ގެންދަނީ އިތުރަށް ތަހުގީގު ކުރަމުންނެވެ.
އޭނާގެ ހަށިގަނޑު ފެނުނީ އޭނާ ދިރިއުޅޭ ގޯތި ތެރެއިންނެވެ. ހަށިގަނޑު އޮތީ ގެއާއި ގުދަނާ ދޭތެރޭގައި ބިންމަތީގައެވެ. އޭނާ ކަރުގައި ވަޅި އަޅާފައިވާއިރު، އޭނާ ގާތުގައި މަސް ކަނޑާ ޒާތުގެ ވަޅިއެއް އޮތެވެ.
ރަށުން މައުލޫމާތު ދިން މީހުންވެސް ބުނީ އޭނާގެ ކަރުގައި ވަޅި އަޅާފައިވާ ކަމަށާއި، އެ ތަނުގައި ގިނަ އަދަދެއްގެ ލޭ ހުރިކަަމަށެވެ.
އޭނާ އުޅެނީ މީހަކާ އިނދެގެންނެވެ. އެގޮތުން އޭނާގެ ދެ ފިރިހެން ދަރިން ތިބެއެވެ. އެގޭގައި ދިރިއުޅެނީ އޭނާގެ ފިރިމީހާއާއި، އެއް ފިރިހެން ދަރީގެ އިތުރުން އޭނާ ކައިވެނި ކޮށްގެން އުޅޭ އަންހެން ކުއްޖާއެވެ.
މި މައްސަލައާ ގުޅިގެން ފުލުހުންގެ ޚާއްސަ ޓީމެއް އަންގާރަ ދުވަހު އެރަށަށް ގޮސް ޙަރަކާތްތެރިވެފައިވެއެވެ.
