އަލްޖީރިއާގެ މިހާރުގެ ރައީސް އުމުރުފުޅުން 78 އަހަރުގެ، އަބްދުލްމަޖީދު ތަބޫން ރިޔާސީ އިންތިޚާބު ކާމިޔާބު ކުރައްވައިފި
ވޯޓުގެ 94.65 އިންސައްތަ އޭނާ ހޯއްދެވި ކަމަށް އެ ގައުމުގެ އިންތިޚާބާ ބެހޭ އިދާރާއިން ބުނެފައިވެއެވެ.
އަލްޖީރިއާގެ ރައީސް ތަބޫން ވޯޓުލާ މަރުކަޒެއްގެ ބޭރުގައި ހުއްޓިގެން
އަލްޖީރިއާގެ މިހާރުގެ ރައީސް އުމުރުފުޅުން 78 އަހަރުގެ، އަބްދުލްމަޖީދު ތަބޫން، ވަރަށް ބޮޑު އަޣްލަބިއްޔަތަކުން އެ ގައުމުގެ ރައީސްކަމަށް އިންތިޚާބުވެއްޖެކަމަށް އެ ޤައުމުގެ އިންތިޚާބީ އޮތޯރިޓީން ބުނެފިއެވެ.
"އިންތިޚާބުގައި ވޯޓުލީ ކަމަށް ރެކޯޑުކުރެވުނު 5,630,000 މީހުންގެ ތެރެއިން، 5,320,000 މީހުން ވަނީ މިނިވަން ކެންޑިޑޭޓު އަބްދުލްމަޖީދު ތަބޫނަށް ވޯޓުދީފައި، އެއީ ހޮނިހިރު ދުވަހުގެ ވޯޓުގެ 94.65 އިންސައްތަ" ނޭޝަނަލް އިންޑިޕެންޑެންޓް އޮތޯރިޓީ ފޮރ އިލެކްޝަންސް (އޭއެންއައިއީ) ގެ ވެރިޔާ މުޙައްމަދު ޝަރްފީ އާދީއްތަ ދުވަހު ވެރިރަށް އަލްޖިއަރސްގައި ނޫސްވެރިންނަށް މައުލޫމާތު ދެމުން ހާމަ ކޮށްފައިވެއެވެ.
އަލްޖީރިއާގެ ސިފައިންގެ ތާއީދު އޮތް ތަބޫން އާ ވާދަކުރި ކޮންޒަވޭޓިވް ކެންޑިޑޭޓް އަބްދުލްއަލީ ހަސަނީ ޝެރީފް އަށް ލިބުނީ 3 އިންސައްތަ ވޯޓެވެ. އަދި ސޯޝަލިސްޓް ކެންޑިޑޭޓް ޔޫސުފް އައުޝީޗް، އަށް ލިބުނީ 2.1 އިންސައްތަ ވޯޓެވެ.
ހަސަނީ ޝެރީފްގެ ކެމްޕޭނުން ބުނެފައިވަނީ ވޯޓުލާ މަރުކަޒުތަކުގެ އޮފިޝަލުންނަށް ނަތީޖާ އަށް ބަދަލު ގެންނަން ބާރުއަޅާފައިވާ ކަމަށާއި، ވޯޓުގެ ނަތީޖާތައް ކެންޑިޑޭޓުންގެ މަންދޫބުންނަށް ނުދީ ހިފަހައްޓާފައިވާ ކަމަށާއި، އަދި ބަދަލުގައި މީހުން އައިސް ވޯޓުލުމުގެ ހާދިސާތައް ހިނގާފައިވާ ކަމަށެވެ.
ނަމަވެސް، އިލެކްޝަން ކޮމިޝަންގެ ވެރިޔާ ޝަރްފީ ނަތީޖާ އިޢުލާނު ކުރަމުން ބުނި ގޮތުގައި ހުރިހާ ކެންޑިޑޭޓުންގެ މެދުގައި ހަމަހަމަކަމާއި ހާމަކަން ކަށަވަރުކުރުމަށް އެ މުއައްސަސާއިން މަސައްކަތްކޮށްފައިވާ ކަމަށެވެ.
ތަބޫންގެ އަލުން އިންތިޚާބުވުމުގެ މާނައަކީ 2019 ގައި އޭނާ ވެރިކަމަށް ވަޑައިގަތުމަށްފަހު، ގައުމުގައި އިތުރުވެފައިވާ ތެލުގެ އާމްދަނީއާ އާއެކު ސަރުކާރުން ފަށާފައިވާ ބޮޑެތި ޚަރަދުތައް ހިމެނޭ ޕްރޮގްރާމްތައް ކުރިއަށް ގެންދާނެ ކަމެވެ.
އޭނާ ވަނީ ވަޒީފާ ނެތް މީހުންނަށް ސަރުކާރުން ދޭ އެހީ އިތުރު ކުރައްވާނެ ކަމަށާއި، ޕެންޝަން އަދި ސަރުކާރުގެ ބޯހިޔާވަހިކަމުގެ ޕްރޮގްރާމްތައް އިތުރުކުރުމަށް ވަޢުދުވެފައެވެ. މިއީ އޭނާގެ ފުރަތަމަ ދައުރުގައިވެސް ކުރައްވާފައިވާ މަސައްކަތްތަކެއްކަން ފާހަގަ ކުރެވެއެވެ.
އަލްޖީރިއާއަކީ ބިމުގެ ގޮތުން އެފްރިކާގެ އެންމެ ބޮޑު ޤައުމެވެ. އަދި ގާތްގަނޑަކަށް 45 މިލިއަން މީހުންގެ އާބާދީއަކާ އެކު، ދެކުނު އެފްރިކާއަށް ފަހު އެންމެ ބޮޑު އާބާދީ އޮތް ޤައުމެވެ.
އެމްނެސްޓީ އިންޓަނޭޝަނަލް ފަދަ ބައިނަލްއަޤްވާމީ ޖަމްޢިއްޔާތަކުން ބުނެފައިވަނީ ކެމްޕޭން މޫސުމުގައި ސަރުކާރުން އިދިކޮޅު ޕާޓީތަކަށާއި، މީޑިއާ އަށާއި، މަދަނީ ޖަމްޢިއްޔާތަކުގެ ހަރަކާތްތެރިންނަށް ފުރައްސާރައާއި ދަޢުވާތަކާ ކުރިމަތިލާން ޖެހުނު ކަމަށެވެ.
