ޕޯޗުގަލް އިން ޔޫރޯ ކާމިޔާބު ކުރުމަކީ، ވޯލްޑް ކަޕާ އެއް ފަދަ ކަމެއް: ރޮނާލްޑޯ

ޕޯޗުގަލްގެ ޤައުމީ ޓީމުން ޔޫރޯ ފުޓުބޯޅަ މުބާރާތް ކާމިޔާބު ކުރުމަކީ، ފީފާ ވޯލްޑް ކަޕް ކާމިޔާބު ކުރުމާ އެއް ވަރުގެ ކަމެއް ކަމަށް އެ ޓީމުގެ ކެޕްޓަން ކްރިސްޓިއާނޯ ރޮނާލްޑޯ ބުނެފި އެވެ.

ރޮނާލްޑޯ މިހެން ބުނީ ޔުއެފާ ނޭޝަންސް ލީގުގައި ޕޯޗުގަލް އިން ކްރޮއޭޝިއާއާ ދެކޮޅަށް ކުޅުނު މެޗަށްފަހު ވާހަކަ ދައްކަމުންނެވެ. ޕޯޗުގަލް އިން ވަނީ 2016 ވަނަ އަހަރުގެ ޔޫރޯ ފުޓުބޯޅަ މުބާރާތް ކާމިޔާބު ކޮށްފަ އެވެ. ޕޯޗުގަލް އިން އެ އަހަރުގެ މުބާރާތް ކާމިޔާބު ކުރީ ފައިނަލްގައި ފްރާންސް ބަލިކޮށްގެންނެވެ.

އެކަމާ ގުޅޭ ގޮތުން ވާހަކަ ދައްކަމުން ރޮނާލްޑޯ ބުނީ، ޕޯޗުގަލް އިން ޔޫރޯ ކާމިޔާބު ކުރުމަކީ ވޯލްޑް ކަޕް ކާމިޔާބު ކުރުމާ އެއް ވަރުގެ ކަމެއް ކަމަށެވެ. މިހާތަނަށް ޕޯޗުގަލާ އެކު ދެ ތައްޓެއް ކާމިޔާބު ކޮށްފައިވާކަން ފާހަގަކޮށް ރޮނާަލްޑޯ ބުނީ، އެއީ އޭނާ އިންތިހާ އަށް ބޭނުންވެފައި ހުރި ކަމެއް ކަމަށެވެ. ރޮނާލްޑޯ ބުނީ އޭނާ އަށް އެންމެ ބޮޑު ހިތްވަރެއް ލިބެނީ ފުޓުބޯޅަ ކުޅުމުގެ އުފަލުން ކަމަށާއި، ރެކޯޑުތަކެއް ހެދޭތީ ވެސް އުފާވާ ކަމަށެވެ. ކްރޮއޭޝިއާއާ ދެކޮޅަށް ލަނޑު ޖެހުމަށްފަހު، ރޮނާލްޑޯ ވަނީ ކެރިއަރުގައި 900 ލަނޑު ހަމަކޮށްފަ އެވެ..

މީގެ އިތުރުން ރޮނާލްޑޯ ބުނީ، 900 ލަނޑު ޖެހުމަކީ އަނެއްކާ ވެސް އޭނާ އަށް ކުރެވުނު ކާމިޔާބު ކަމެއް ކަމަށެވެ. އެހެން ނަމަވެސް 900 ލަނޑު ޖެހުމަކީ އެތައް ދުވަހެއްގެ ބުރަ އަދި އުނދަގޫ މަސައްކަތެއް ކަމަށް ވެސް ރޮނާލްޑޯ ވަނީ ބުނެފަ އެވެ. އެކަމަކީ އޭނާގެ ކެރިއަރުގައި ހާސިލު ކުރެވުނު ވަރަށް ތަފާތު ކަމެއް ކަމަށް ވެސް ރޮނާލްޑޯ ބުންޏެވެ. ރޮނާލްޑޯ ބުނީ އޭނާ ރެކޯޑު ނުމުގުރާ ކަމަށާއި، އޭނާގެ ފަހަތުން ރެކޯޑުތައް އަންނަ ކަމަށެވެ.

ރޮނާލްޑޯ ވަނީ ޕޯޗުގަލް ޤައުމީ ޓީމަށް ކުޅެދިން 213 މެޗުގައި 131 ލަނޑު ޖަހައިފަ އެވެ. ރޮނާލްޑޯ އަކީ ޤައުމީ ޓީމަަކަށް އެންމެ ގިނަ ލަނޑު ޖަހައިދީފައިވާ ކުޅުންތެރިޔާ އެވެ.