ލީގު ނުފެށި އޮތް ނަމަވެސް، އުއްމީދަކީ ރަނގަޅަށް ތައްޔާރުވުން: ޑުކަނޯވިޗް

ރާއްޖޭގެ ފުޓުބޯޅަ ލީގު ނުފެށި އޮތް ނަމަވެސް، އޭއެފްސީ ޗެލެންޖް ލީގަށް ރަނގަޅަށް ތައްޔާރުވެވޭނެ ކަމުގެ އުންމީދު އޮތް ކަމަށް، ރާއްޖޭގެ ޗެމްޕިއަންް މާޒިޔާ ސްޕޯޓްސް އެންޑް ރެކްރިއޭޝަންގެ ކޯޗު ޑްރަގަން ޑުކަނޯވިޗް ބުނެފި އެވެ.

މާޒިޔާގެ ކޯޗަކަށް ޑިކަނޯވިޗް ހަމަޖެއްސީ މިދިޔަ އޯގަސްޓު މަހުގެ ތެރޭގަ އެވެ. އެއީ އަންނަ އޮކްޓޫބަރު މަހުގެ ފަހު ކޮޅު ފަށާ އޭއެފްސީ ޗެލެންޖު ލީގަށް ތައްޔާރުވުމުގެ ގޮތުންނެވެ. ޑުކަނޯވިޗްގެ އިރުޝާދުގެ ދަށުން މިދިޔަ ހަފުތާގެ ތެރޭގައި މާޒިޔާ އިން ވަނީ އެ ކުލަބުގެ ފަރިތަކުރުންތައް ވެސް ފަށައިފަ އެވެ.

މާޒިޔާ އާއެކު ފަރިތަކުރުންތައް ފެށުމަށް ފަހު "ރާއްޖެ އެމްވީ"އާ ވާހަކަ ދައްކަމުން ޑުކަނޯވިޗް ބުނީ މިވަގުތަށް ބަލާއިރު ރާއްޖޭގެ ލީގު އަދި ފެށިފައި ނުވާ ކަމަށެވެ. އެކަން އެއީ މާޒިޔާ އަށް ދިމާވާނެ މައްސަލައެއް ކަމަށާއި، ނަމަވެސް އޭނާގެ އުންމީދަކީ މަޒިޔާގެ ތައްޔާރީތައް އެންމެ ފުރިހަމަ ގޮތުގައި ކުރިއަށް ދިޔުން ކަމަށް ވެސް ޑުކަނޯވިޗް ބުންޏެވެ. އެގޮތުން އޭއެފްސީ ޗެލެންޖު ލީގަށް މާޒިޔާ ތައްޔާރުވަމުން އަންނަ ކަމަށާއި، މާޒިޔާ އޮތް ގުރޫގައި އޮތީ ވަރުގަދަ ޓީމުތަކެއް ކަމަށް ވެސް އޭނާ ވަނީ ފާހަގަ ކޮށްފަ އެވެ.

އޭއެފްސީ ޗެލެންޖު ލީގުގަައި މާޒިޔާ އޮތީ ގުރޫޕް ބީގަ އެވެ. އެ ގުރޫގައި މާޒިޔާގެ އިތުރުން ދެން ހިމެނެނީ ކުވޭތުގެ އަލް އަރަބީ، ތުރުކުމެނިސްތާންގެ އެފްސީ އާކަޑާ އަދި ކަޒަކިސްތާނުގެ އެފްސީ އަބްޑީޝް އަޓާ އެވެ. މި ގްރޫޕްގެ މެޗުތައް ކުޅުމަށް ހަމަޖެހިފައި ވަނީ ކުވޭތުގަ އެވެ. މި ޓީމުތަކަކީ ނިސްބަތުން ބަލާއިރު ވަރުގަދަ ޓީމުތަކެއް ކަމަށާއި، މާޒިޔާ އަށް ތައްޔާރުވުމަށް އެންމެ އެކަށީގެންވާ ވަގުތު އޮތް ކަމަށް ޤަބޫލު ކުރާ ކަމަށް ވެސް އޭނާ ބުންޏެވެ.

މީގެ އިތުރުން ޑުކަނޯވިޗް ބުނީ ހުރިހާ ކުޅުންތެރިން ޓީމާ ގުޅި، ރަނގަޅު ޕްރީ ސީޒަނެއް ކުރިއަށް ގެންދެވޭނެ ކަމަށް އޭނާ އުންމީދު ކުރާ ކަމަށެވެ. ރާއްޖޭގެ ފުޓުބޯޅަ ލީގު ފެށިފައި ނުވާ މައްސަލަ އަށް އިޝާރާތް ކުރަމުން ޑުކަނޯވިޗް ބުނީ، ލީގު ފެށުމާ މެދު ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން ނިންމާ ނިންމުމަކަށް އިންތިޒާރު ކުރާ ކަމަށެވެ. އަދި އޭނާގެ އުންމީދަކީ ވީ އެންމެ އަވަހަށް ލީގު ފެށުން ކަމަށް ވެސް ޑުކަނޯވިޗް ބުންޏެވެ. ރާއްޖޭގެ ފުޓުބޯޅަ އަށް ބަލާއިރު، އަވަސް ތާރީޚެއްގައި ލީގު ފެށުމަކީ ވަރަށް މުހިންމު ކަމެއް ކަމަށް ވެސް އޭނާ ދެކެ އެވެ.

މާޒިޔާގައި ތިބި ކުޅުންތެރިންނަށް ބަލާއިރު، ރަނގަޅު ޓީމެއް އޮތް ކަމަށް ޑުކަނޯވިޗް ދެކެ އެވެ. މާޒިޔާގައި ތިބި ގިނަ ކުޅުންތެރިންނަކީ ރާއްޖޭގެ ޤައުމީ ފުޓުބޯޅަ ޓީމުގައި ހިމެނޭ ކުޅުންތެރިންކަން ފާހަގަކޮށް ޑުކަނޯވިޗް ބުނީ އެ ކުޅުންތެރިންގެ އިތުރުން، ބިދޭސީ ކުޅުންތެރިންނާ އެކު މާޒިޔާ އަށް ރަނގަޅު ޓީމެއް މުބާާރާތަށް އެކުލަވާލެވޭނެ ކަމަށެވެ. އަދި ނަތީޖާ ނެރެވޭނެ ކަމުގެ އުންމީދާއި، އިތުބާރު އޮތް ކަމަށް ވެސް އޭނާ ވަނީ ބުނެފަ އެވެ.

އޭއެފްސީ ޗެލެންޖު ލީގަށް މާޒިޔާ ތައްޔާރުވަމުން އަންނައިރު، މުބާރާތުގެ ފުރަތަމަ މެޗުގައި އޮކްޓޫބަރު މަހުގެ 26 ވަނަ ދުވަހު މާޒިޔާ ނިކުންނާނީ އާކަޑާއާ ދެކޮޅަށެވެ. ދެ ވަނަ މެޗުގައި އޮކްޓޫބަރު މަހުގެ 29 ވަނަ ދުވަހު މާޒިޔާ ނިކުންނާނީ އަލް އަރަބީއާ ދެކޮޅަށެވެ. އަދި ގްރޫޕް ސްޓޭޖުގެ ފަހު މެޗުގައި ނޮވެމްބަރު މަހުގެ އެއް ވަނަ ދުވަހު މާޒިޔާ ނިކުންނާނީ އަބްޑީޝްއާ ދެކޮޅަށެވެ.