ޤައުމީ އަންހެން ވޮލީ ޓީމަށް ޖާޒީ ހަވާލުކޮށްފި
5 ސެޕްޓެމްބަރު 2024 | ބުރާސްފަތި 04:54ހުކުރު ދުވަހު ރާއްޖޭގައި ފަށާ މުބާރާތުގައި ރާއްޖޭގެ އިތުރުން ދެން ވާދަކުރަނީ ތަޖަކިސްތާން، ކިރްގިސްތާން އަދި އަފްޣާނިސްތާން އެވެ.
ޤައުމީ އަންހެން ވޮލީ ޓީމުގެ ކުޅުންތެރިންނަށް ވަޒީރު ރާފިޢު ޖާޒީ ހަވާލު ކުރަނީ
ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ) އަންހެން ވޮލީ ބޯޅަ ޗެލެންޖު ކަަޕްގައި ވާދަކުރާ ރާއްޖޭގެ ޤައުމީ އަންހެން ވޮލީ ޓީމަށް ޖާޒީ ހަވާލު ކޮށްފި އެވެ.
ބުދަ ދުވަހުގެ މެންދުރު ޒުވާނުންގެ މަރުކަޒުގައި އޮތް ރަސްމިއްޔާތުގަައި އަންހެން ވޮލީ ޓީމަށް ޖާޒީ ހަވާލުކޮށްދެއްވީ ކުޅިވަރާއި، ހަށިހެޔޮ ކަމާ ބެހޭ ވަޒީރު ޢަބްދުﷲ ރާފިޢު (ރާއްޕެ) އެވެ. މި ރަސްމިއްޔާތުގައި ވޮލީ ބޯޅަ އެސޯސިއޭޝަން އޮފް މޯލްޑިވްސް (ވީއޭއެމް)ގެ އިސްވެރިން ވެސް ވަނީ ބައިވެރިވެފަ އެވެ.
ހުކުރު ދުވަހު ރާއްޖޭގައި ފަށާ މުބާރާތުގައި ރާއްޖޭގެ އިތުރުން ދެން ވާދަކުރަނީ ތަޖަކިސްތާން، ކިރްގިސްތާން އަދި އަފްޣާނިސްތާން އެވެ. މުބާރާތުގައި ރާއްޖޭގެ ފުރަތަމަ މެޗުގައި ހުކުރު ދުވަހުގެ ރޭ ނިކުންނާނީ އަފްޣާނިސްތާނާ ދެކޮޅަށެވެ. ދެ ވަނަ މެޗުގައި ތަޖަކިސްތާނާ ދެކޮޅަށް ނިކުންނާނީ ހޮނިހިރު ދުވަހުގެ ރޭ އެވެ. އަދި ފަހު މެޗުގައި އާދިއްތަ ދުވަހުގެ ރޭ ނިކުންނާނީ ކިރްގިސްތާނާ ދެކޮޅަށެވެ.
ޕްރިލިމިނަރީ ބުރުގެ އެއް ވަނަ ޓީމާއި ހަތަރު ވަނަ ޓީމު ސެމީ ފައިނަލްގައި ވާދަކުރާއިރު، އަނެއް ސެމީ ފައިނަލްގައި ވާދަކުރާނީ ދެ ވަނަ ޓީމައި ތިން ވަނަ ޓީމެވެ. މުބާރާތުގެ ތިން ވަނަ ހޮވާ މެޗާއި، ފައިނަލް މެޗު ކުޅޭނީ ބުދަ ދުވަހު އެވެ.
