ސްޓާލިން އާސެނަލަށް ސޮއި ކޮށްފި

ޗެލްސީ އަށް ކުޅެމުން އައި އިންގްލެންޑުގެ ރަހީމް ސްޓާލިން، އާސެނަލަށް ސޮއި ކޮށްފި އެވެ.

އުމުރުން 29 އަހަރުގެ ކުޅުންތެރިޔާ އާސެނަލަށް ބަދަލުވީ ލޯނު އެއްބަސްވުމެއްގެ ދަށުން، އެއް އަހަރު ދުވަހުގެ މުއްދަތަކަށެވެ. އާސެނަލްގެ އެއްބަސްވުމުގައި ސްޓާލިން ސޮއި ކޮށްފައިވާއިރު، މިހާރު ކުރިއަށްދާ ސީޒަންގެ ނިޔަލަށް އޭނާ އެ ކުލަބުގައި ހުންނާނެ އެވެ. ސްޓާލިން، އާސެނަލަށް ބަދަލުވީ ޗެލްސީގެ އައު ކޯޗު އެންޒޯ މަރެސްކާގެ ޕްލޭގައި އޭނާ ނުހިމެނޭ ކަމަށް އަންގާފައި ވުމުންނެވެ.

އާސެނަލަށް ބަދަލުވުމަށް ފަހު ވާހަކަ ދައްކަމުން ސްޓާލިން ބުނީ، އޭނާގެ އެންމެ މޮޅު ކުޅުން މީހުންނަށް ފެންނާނެ ކަމަށެވެ. ޚާއްސަކޮށް އާސެނަލާ ގުޅުމަކީ ތަފާތު އިޙުސާސެއް ކުރެވޭ ކަމެއްކަން ފާހަގަކޮށް އޭނާ ބުނީ، އިންތިހާ އަށް އުފާވެރި ހުރި ކަމަށެވެ. އާސެނަލް އަކީ އޭނާ އަށް އެންމެ ފިޓު ކުލަބު ކަމަށާއި، އާސެނަލްގައި ތިބި ކުޅުންތެރިން މޮޅުވާން ބޭނުންވެފައި ތިބި މިންވަރު އަދި ކާމިޔާބު ހޯދަން ބޭނުންވާ މިންވަރު ވެސް ފެންނަ ކަމަށް އޭނާ ބުންޏެވެ.

ލިވަޕޫލް އިން ސީނިއާ ކެރިއަރު ފެށި ސްޓާލިން، މެންޗެސްޓަރ ސިޓީ އަށް ބަދަލުވީ 2015 ވަނަ އަހަރު އެވެ. އޭގެ ފަހުން 2022 ވަނަ އަހަރު އޭނާ ވަނީ ސިޓީ ދޫކޮށް ޗެލްސީ އަށް ބަދަލުވެފަ އެވެ. ސްޓާލިން ވަނީ ޗެލްސީ އަށް ކުޅެދިން 81 މެޗުގައި 19 ލަނޑު ޖަހައިފަ އެވެ. އާސެނަލް އަކީ ސްޓާލިންގެ ސީނިއާ ކެރިއަރުގައި އޭނާ ކުޅޭނެ ހަތަރު ވަނަ ކުލަބެވެ.