ޔާމީންގެ ނަސޭހަތެއް އަބްދުއްރަހީމަށް: "އަޅުގަނޑުމެންގެ ވެރިންވެސް ވަމާހޭ ހެޔޮބަސް އަހާ، ހެޔޮބަސް ގަބޫލުކުރާ ބަޔަކަށް"

ކުރީގެ ރައީސް އަބްދުﷲ ޔާމީން, ރައްޔިތުން މަޖިލީހުގެ ރައީސް އަދި ޕީއެންސީގެ ޗެއަރޕާސަން އަބްދުއްރަހީމް އަބްދުﷲ އަމާޒުކުރައްވައި ހެޔޮ ނަސޭހަތެއް ދެއްވައިފިއެވެ.

ބުރާސްފަތި ދުވަހުގެ ރޭ ޕީއެންއެފްއިން ކުރިއަށް ގެންދިޔަ ޖަލްސާގައި ޔާމީން ވިދާޅުވީ ރައްޔިތުން މަޖިލީހުގެ ރައީސް އަބްދުއްރަހީމްގެ އަމަލުފުޅުތަކާއި، ބަސްމަގު ހުންނަ ގޮތުން ރައްޔިތުން އެބޭފުޅާގެ ބަސް ގަބޫލުނުކުރާ ކަމަށެވެ. މިގައުމުގެ މަސްދަރަކީ އިސްލާމީ ޝަރީއަތް ކަމަށްވާއިރު، ޝަރީއަތުގެ މަޖިލީހެއްގައި ވެސް ރައީސް ޑރ.މުހައްމަދު މުއިއްޒާއި، އަބްދުއްރަހީމްގެ ބަސް ބަލައި ނުގަނެވޭނެ ކަމަށް ޔާމީން ވިދާޅުވިއެވެ. އެހެންކަމުން ރައްޔިތުން އެ ދެބޭފުޅުންގެ ބަސް ބަލައިގަނެ ގަބޫލުކުރާނެ ކަމާމެދު ޔާމީން ވަނީ ސުވާލު އުފައްދަވާފައެވެ.

އަބްދުއްރަހީމަށް އިޝާރާތް ކުރައްވައި ޔާމީން ވިދާޅުވީ ވެރިންވެސް ހެޔޮބަސް އަހާ، ހެޔޮބަސް ގަބޫލުކުރާ ބަޔަކަށް ވާންޖެހޭ ކަމަށެވެ. ނޫންނަމަ ރައްޔިތުންގެ ކުރިމަތީގައި ޑިސްކޮލިފައިވާނެ ކަމަށާއި، ރައީސް މުއިއްޒާއި، އަބްދުއްރަހީމްގެ އަމަލުފުޅުތަކުގެ ސަބަބުން އިތުރު އެބޭފުޅުންގެ ކްރެޑެބިލިޓީއަށް އަސަރުކުރާ ކަމަށެވެ. އަދި ވިދާޅުވީ މީހަކަށް މަގާމަކަށް އާދެވިދާނެ ކަމަށާއި، ނަމަވެސް ރައްޔިތުން މެދުގައި އިހުތިރާމާއި، ގަދަރުވެއްޓިގެންދާ ކަމަށެވެ.

އަބްދުއްރަހީމަށް އަމާޒުކުރައްވައި ޔާމީން ހެޔޮ ނަސޭހަތެއް ދެއްވިއިރު، މިފަހުން އަބްދުއްރަހީމް ވަނީ ވަރަށް ބޮޑަށް ޔާމީނަށް ފާޑު ވިދާޅުވެފައެވެ.

28 އޮގަސްޓް 2024 ގައި ޕީއެންސީން ބޭއްވި ނޫސްވެރިންގެ ބައްދަލުވުމުގައި އަބްދުއްރަހީމް ވިދާޅުވީ ފިނިފެންމާ ލޯންޗް ގޮއްވާލި ހާދިސާއަކީ ރައީސް ޔާމީން ކުޅުއްވި ޑްރާމާއެއްކަމަށް ސުވާލު އުފެއްދުމުގެ ޖާގަ އެބައޮތް ކަމަށެވެ.