މީޑީއާ އާ އިތުރަށް ވާހަކަ ނުދެއްކެވުމަށް ރައީސް މުއިއްޒު އަބްދުލްރަހީމަށް އަންގަވައިފި
28 ޖެނުއަރީ 2025 | އަންގާރަ 19:12އިތުރަށް މިކަމާ ގުޅޭ ގޮތުން މީޑިއާ އަށް ވާހަކަ ދައްކަވައިފިނަމަ އޭނާގެ އިތުބާރު ނެތް ކަމުގެ މައްސަލަ ވައްދާނެ ކަމަށް އަބްދުލްރަހީމަށް ދެންނެވި ކަމަށްވެސްވޭ
އަބްދުލްރަހީމް އަބްދުﷲ - ރައްޔިތުންގެ މަޖިލީހުގެ ރައީސް
މީޑީއާ އާ އިތުރަށް ވާހަކަ ނުދައްކަވަން ރައީސް މުހައްމަދު މުއިއްޒު ރައްޔިތުންގެ މަޖިލީހުގެ ރައީސް އަބްދުލްރަހީމް އަބްދުﷲ އަށް އަންގަވައިފި ކަމަށް އިތުބާރު ހުރި ގޮތެއްގައި އެނގިއްޖެއެވެ.
އަބްދުލްރަހީމަށް މުއިއްޒުގެ ފަރާތްޕުޅުން އެކަން އެންގީ އޭނާ މެލޭޝިއާ ގައި އޭނާ ހުންނަވަނިކޮށް އަންގާރަ ދުވަހު ޕީއެންސީގެ ސީނިއަރ މަޖިލިސް މެމްބަރެއް މެދުވެރިކޮށް ފޯނުން ކަމަށްވެސް ވަނީ މައުލޫމާތު ލިބިފައެވެ.
އަބްދުލްރަހީމަށް ރައީސް މުއިއްޒުގެ ފަރާތްޕުޅުން ދެންނެވި ކަމަށްވަނީ އޭނާގެ ދަރިކަލުން އިބްރާހިމް ފައިސަލް ޓޫރިޒަމް މިނިސްޓަރު ކަމުގެ މަގާމުން އަންގާރަ ދުވަހު ރައީސް ވަކި ކުރެއްވުމާ ގުޅިގެން ދެއްވި އިންޓަވިއުގެ ސަބަބުން ޕާޓީ އަށާއި ސަރުކާރަށް ވަރަށް "ޑެމޭޖް" ވެއްޖެ ކަމަށާއި އިތުރަށް މިކަމުގައި މީޑިއާ އަށް ވާހަކަ ނުދެއްކެވުމަށެވެ.
އިތުރަށް މިކަމާ ގުޅޭ ގޮތުން މީޑިއާ އަށް ވާހަކަ ދައްކަވައިފިނަމަ އޭނާގެ އިތުބާރު ނެތް ކަމުގެ މައްސަލަ ވައްދާނެ ކަމަށް އަބްދުލްރަހީމަށް ދެންނެވި ކަމަށްވެސް ވެއެވެ.
މިކަމާ ގުޅޭ ގޮތުން އަބްދުލްރަހީމުގެ ކޮމެންޓެއް ހޯދުމަށް މި ނޫހުން ކުރި މަސައްކަތް އޭނާ ފޯނަށް ޖަވާބު ނުދެއްވާތީ ކާމިޔާބުވާ ގޮތް ވަނީ ނުވެފައެވެ.
އޭގެ އިތުރުން މި ކަމާ ބެހޭ ގޮތުން އަންގާރަ ދުވަހުގެ ރޭ އޭނާ ރާއްޖެ ވަޑައިގެންނެވި ގަޑިއަށް އެއަރޕޯޓަށް ގޮސް ސުވާލު ކުރަން މި ނޫހުގެ ނޫސްވެރިން ކުރި މަސައްކަތް ވެސް ވަނީ ކާމިޔާބު ނުވެފައެވެ.
އަބްދުލްރަހީމް ވަޑައިގަންނަވާ ގަޑިއަށް ރާއްޖޭގެ ގިނަ މީޑިއާ ތަކުން އެމަނިކުފާނާ ބައްދަލު ކުރުމަށް ވެލާނާ އިންޓަރނޭޝަނަލް އެއަރޕޯޓަށް ގޮސް ތިބި ނަމަވެސް އަބްދުލްރަހީމަށް އެއަރޕޯޓުން މާލެ އަށް ވަޑައިގަތީ ނޫސްވެރިންނަށް ފިއްލަވައިގެންނެވެ.
އެއަރޕޯޓަށް ދިޔަ ރާއްޖެޓީވީގެ ނޫސްވެރިޔާ ބުނިގޮތުގައި އަބްދުލްރަހީމް ބޭރަށް ނުކުންނެވުމުގެ ބަދަލުގައި އޭނާ ބަލައި އައި ވެހިކަލްތައް އޭޕްރަން އަށް ވަދެފައި ތިބިކަން އެނގުނީ ވެހިކަލުގައި ވަރަށް ބާރަށް ދުއްވާފައި ބޭރަށް ނުކުތުމުން ކަމުގައެވެ.
ރައީސް މުއިއްޒުގެ ކެބިނެޓުގައި ޓޫރިޒަމް މިނިސްޓަރު ކަމުގެ މަގާމުގައި ހުންނެވި އަބްދުލްރަހީމްގެ ދަރިކަލުން އިބްރާހީމް ފައިސަލް ކުއްލި ގޮތަކަށް އަންގާރަ ދުވަހު ވަނީ ރައީސް މުއިއްޒު ވަކި ކުރައްވާފައެވެ.
އެކަމާ ގުޅިގެން މެލޭޝިޔާގައި ހުންނަވައި ފޯނުން 'ދައުރު' ނޫހަށް ދެއްވި އިންޓަވިއުގައި އަބްދުލްރަހީމް ވިދާޅުވީ ފައިސަލް ވަކިކުރަން ޖެހޭ އެއްވެސް ސަބަބެއް ނެތް ކަމަށާއި ރައީސް މުއިއްޒު އާ އޭނާ އާ ގުޅުން ރަނގަޅު ނަމަ އެފަދަ ފިޔަވަޅެއް ރައީސް ނާޅުއްވާނޭ ކަމަށެވެ.
ފައިސަލް ވަކިކުރުމަކީ "ވަރަށް ދެރަވަރުކޮށް" ރައީސް ކުރެއްވި ކަމެއް ކަަމަށް ވެސް އަބްދުލްރަހީމް ވިދާޅުވިއެވެ.
