ސާފުތާހިރުކަން ކުޑަކޮށް މާލޭގައި ކާބޯތަކެތި ތައްޔާރުކުރާ ތަންތަން ބަންދުކުރުމުގެ ބާރު ސިޓީ ކައުންސިލަށް އޮންނަން ވާނެ ކަމަށް މާލެ ސިޓީ ކައުންސިލްގެ މޭޔަރ އާދަމް އާޒިމް ވިދާޅުވެއްޖެއެވެ.

އާޒިމް އެފަދައިން ވިދާޅުވީ ރާއްޖެޓީވީގެ ފަށާއިރު ޕްރޮގްރާމްގައި ވާހަކަދައްކަވަމުންނެވެ.

އެ ޕްރޮގްރާމްގައި ކާބޯތަކެތީގެ ރައްކާތެރިކަން ނެތި، ސާފުތާހިރުކަން ކުޑަގޮތަކަށް ކާބޯތަކެތީގެ ޚިދުމަތް ދެމުންދާ މައްސަލަ އާއި ގުޅޭ ގޮތުން އާޒިމް ވަނީ ވަރަށް ތަފްސީލްކޮށް ވާހަކަދައްކަވާފައެވެ. އަދި އެކަން ހައްލުކުރުމަށް ސިޓީ ކައުންސިލުން ކުރާ މަސައްކަތަށް އަލިއަޅުވާލެއްވިއެވެ. މާލެ ސިޓީގެ ވެށިފާރަވެރިން 7 ޒޯންއަކަށް ބަހާލައިގެން މަސައްކަތްތައް ކުރަމުންދާ ކަމަށާއި، މާލެ ސިޓީ ކައުންސިލަށް ކުރެވެން އޮންނަ ކަމަކީ މައްސަލަ ދެނެގަތުން ކަމަށް އާޒިމް ވިދާޅުވިއެވެ. އާޒިމް ވަނީ އެފަދަ މައްސަލަަތަކާއި މެދު ފިޔަވަޅު އެޅުމުގެ ބާރު އަދި ސިޓީ ކައުންސިލަށް ނެތް ކަމަށް ވެސް ވިދާޅުވެފައެވެ. ސިޓީ ކައުންސިލަށް ތަންފީޒީ ބާރުތައް ނެތުމަކީ ދިމާވާ ގޮންޖެހުމެއް ކަމަށް އާޒިމް ވިދާޅުވިއެވެ. މިހާރު ސިޓީ ކައުންސިލްގެ ވަސީލަތްތައް އެބަ ހުރި ކަމަށާއި ސިޓީ ކައުންސިލަށް އެ މަސައްކަތް ނުކުރެވެންވީ ސަބަބެއް ނެތް ކަމަށް އާޒިމް ވަނީ ވިދާޅުވެފައެވެ. ހޮޓާތައް ހަޑިކޮށް ހުރުމުގެ ސަބަބުން ހެލްތް މިނިސްޓްރީގެ ސީނިއާ ޓީމަކާއި ގާތްގަނޑަކަށް މަހެއްހާ ދުވަސް ކުރިން ބައްދަލުވުމެއް ބާއްވާފައިވާ ކަަމަށާއި ސާފުތާހިރުކަން ނެތް ތަންތަން ބަންދުކުރުމަށް އެދިވަޑައިގެންފައިވާ ކަމަށް އާޒިމް ވިދާޅުވިއެވެ.

ގޭގައި ކާބޯތަކެތި ވިއްކާ މީހުންވެސް ރަޖިސްޓްރީ ކުރުން ލާޒިމު ކުރުމުގެ މަސައްކަތް މިހާރު ކަމާއި ގުޅުން ހުރި އިދާރާތަކުން ދަނީ ކުރަމުންނެވެ. އަދި ކާބޯތަކެތީގެ ރައްކާތެރިކަމުގެ ޤާނޫނާއި އެކު ސާފުތާހިރުކަމެއް ނެތި ކާބޯތަކެތީގެ ޚިދުމަތްދޭ މައްސަލަ އަށް ހައްލު ލިބޭނެ ކަމަށް ހެލްތް މިނިސްޓްރީން އުންމީދުކުރެއެވެ.