ރައީސް ޑރ.މުހައްމަދު މުއިއްޒުގެ ވެރިކަން ސިފަކުރެވެނީ ''ވަދުވެފައި އޮތް އިހަލެއްގެ ގޮތުގައި'' ކަމަށް ރައްޔިތުން މަޖިލީހުގެ ކުރީގެ މެންބަރު ޝިފާގު މުފީދު ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި ޝިފާގު ވިދާޅުވީ ބޭންކް އޮފް މޯލްޑިވްސް (ބީއެމްއެލް) ސިޔާސީ ވެގެން މިއުޅެނީ އަލަސް ކަމަށާއި، ކުރީގެ ވެރިކަންތަކުގައި މިފަދަ މައްސަލައެއް ކުރިމަތިނުވާ ކަމަށެވެ.
ޝިފާގު ވިދާޅުވީ ރާއްޖޭގެ ގިނަ ރައްޔިތުން ފައިސާ ރައްކާ ކުރަމުންދަނީ ބީއެމްއެލްގައި ކަމަށާއި، ނަމަވެސް މިސަރުކާރުގެ ނާގާބިލްކަން ފޮރުވުމަށް ރައްޔިތުންގެ ތިޖޫރީކަމުގައިވާ ބީއެމްއެލްއާމެދު ސުވާލު އުފައްދާ، އިތުބާރު ނަގާލާފައިވާ ކަމަށެވެ.
ބީއެމްއެލްގެ ސަބަބުން ދައުލަތަށް ބޮޑު އާމްދަނީއެއް ލިބޭކަން ފާހަގަކުރައްވައި ޝިފާގު ވިދާޅުވީ އެތަނުގެ އަގު މިސަރުކާރުން ވައްޓާލާފައިވާ ކަމަށެވެ. އަދި ވިދާޅުވީ ޑޮލަރުގެ ތާށިކަން ކުރިމަތިވުމުން އަބަދުވެސް ބީއެމްއެލުން އެކި ފިޔަވަޅުތައް އަޅައި، ލިމިޓްތައް ކަނޑައަޅާ ކަމަށެވެ. އެއީ އަލަށް ކުރާ ކަންކަން ނޫން ކަމަށް ޝިފާގު ވިދާޅުވިއެވެ.
މީގެ އިތުރުން ޑޮލަރު އަގު 19 ރުފިޔާއަށްވުރެ މަތިވެގެންދިޔައިރު، އެމްއެމްއޭއަށް އެއްވެސް ކަހަލަ އެހީތެރިކަމެއް ފޯރުކޮށް ނުދެވުނީ ކީއްވެތޯ ސުވާލު އުފެއްދެވިއެވެ. އަދި ވިދާޅުވީ ރާއްޖޭގެ އިގްތިސާދީ ހާލަތު ރަނގަޅަށް ރައްޔިތުންނަށް ސާފުކޮށްދޭންޖެހޭ ކަމަށެވެ.
ޝިފާގު ވިދާޅުވީ ކޮވިޑް-19ގެ ދަތިހާލުގައި ވެސް ޑޮލަރުގެ އަގު ކޮންޓްރޯލްކޮށް، ހަރުދަނާ ފިޔަވަޅުތަކެއް އޭރުގެ ސަރުކާރުން އެޅި ކަމަށެވެ. ރައްޔިތުންނަށް ދަތިނުވާކަމަށް އޭނާ ވިދާޅުވިއެވެ. މިހާރުގެ ހާލަތުން މިސަރުކާރުގެ ނާގާބިލުކަން ރައްޔިތުންނަށް ހާމަވެފައިވާ ކަމަށް ޝިފާގު ވިދާޅުވިއެވެ.
ބޭންކުން އެޅި ފިޔަވަޅާއެކު ސަރުކާރުގެ ނާގާބިލްކަން ފޮރުވުމަށްޓަކައި ކަންބަޅިއަކަށް ބޭންކް އޮފް މޯލްޑިވްސް މިހެދީ. ހަދާފަ ދިވެހިންގެ ބޭންކް ދިވެހިންގެ ފަހުރުވެރި ބޭންކް އެ ސުންނާފަތި ކޮށްލީ. އެ ބޭންކާ ދޭތެރޭގައި ރައްޔިތުންގެ އިތުބާރު ގެއްލުވާލީ. އެއާ ވިދިގެން ދެން ވެގެންދާނެ ގޮތަކީ ރާއްޖޭގައި ހުރި ބޭރުގެ ބޭންކްތަކާ ދިމާލަށް ދިވެހިން އެމީހުންގެ ފައިސާ ރައްކާކުރަން ދާނީ. އޭގެ ސަބަބުން ދިވެހި އިގްތިސާދަށް ދިވެހި ދައުލަތަށް ގެއްލުންވާނީ.ރައްޔިތުން މަޖިލީހުގެ ކުރީގެ މެންބަރު ޝިފާގު މުފީދު
ޝިފާގު ވިދާޅުވީ ސަރުކާރަށް 9 މަހަށް ވުރެ ގިނަ ދުވަސްވީއިރު، ސަރުކާރާ ދެކޮޅަށް އިދިކޮޅު އެއްވެސް ޕާޓީއަކުން އަދި އެއްވެސް ސިޔާސީ ބޭފުޅެއް ވެރިކަން ވައްޓާލުމަށް މަސައްކަތްކޮށް، ސަރުކާރާ ދެކޮޅަށް މަގުމައްޗަށް ނުކުމެ ނުހަދާ ކަމަށެވެ.
މިސަރުކާރަށް ގައުމު ހިންގުމަށް ފުރުސަތު ދީފައިވާ ކަމަށް ޝިފާގު ވިދާޅުވިއެވެ. މާލީ ބަގާވާތެއް ގެނައުމަށް މަސައްކަތް ކުރި ކަމަށް މިސަރުކާރުން ބުނަމުންދާތީ އެކަމަށް ރައްދު ދެއްވައި ޝިފާގު ވިދާޅުވީ އެހިސާބަށް ދާން ނުޖެހޭ ކަމަށާއި، މިއަދުގެ ސަރުކާރު ސިފަ ކުރެވެނީ ވަދުވެފައި އޮތް އިހަލެއްގެ ގޮތުގައި ކަމަށެވެ. އިހާ ވަދުވުމުން އެއްވެސް މަސައްކަތެއް ނުކުރި ނަމަވެސް ފައިބާނެ ކަމަށް އޭނާ ވިދާޅުވިއެވެ. އަދި ވިދާޅުވީ ޕީއެންސީގެ ތެރެއިން މިހާރު ވެސް އެމަންޒަރު ފެންނަމުންދާ ކަމަށެވެ.
