މި ސަރުކާރުން މަސައްކަތް ކުރަނީ މާލީ ނިޒާމުގެ އިތުބާރު ގެއްލުވާލުމަށް: ފައްޔާޒު
25 އޯގަސްޓު 2024 | އާދީއްތަ 18:00ބީއެމްއެލްގެ ޑިރެކްޓަރުންގެ ބޯޑުގައި ގިނައީ ސަރުކާރުގެ ބޭފުޅުން
އާދިއްތަ ދުވަހުގެ ރޭ ކުރިއަށް ގެންދިޔަ އެމްޑީޕީ ގައުމީ މަޖިލީހުގެ ކުއްލި ޖަލްސާގައި އެމްޑީޕީގެ ޗެއަރޕާސަން ފައްޔާޒު އިސްމާއިލް ވާހަކަދައްކަވަނީ
މިސަރުކާރުން މަސައްކަތް ކުރަނީ މާލީ ނިޒާމުގެ މިނިވަންކަން ފުޑުފުޑުކޮށްލާ، އެނިޒާމުގެ އިތުބާރު ގެއްލުވާލުމަށް ކަމަށް އެމްޑީޕީގެ ޗެއަރޕާސަން ފައްޔާޒު އިސްމާއިލް ވިދާޅުވެއްޖެއެވެ.
އާދިއްތަ ދުވަހުގެ ރޭ ކުރިއަށް ގެންދިޔަ އެމްޑީޕީ ގައުމީ މަޖިލީހުގެ ކުއްލި ޖަލްސާގައި ފައްޔާޒު ވިދާޅުވީ ބޭންކް އޮފް މޯލްޑިވްސް (ބީއެމްއެލް)ގެ ޑިރެކްޓަރުންގެ ބޯޑުގައި ގިނައީ ސަރުކާރުގެ ބޭފުޅުން ކަމަށާއި، ސަރުކާރަށް ނޭނގި އެއްވެސް ކަމެއް ނުވާނެ ކަމަށެވެ. އަދި ވިދާޅުވީ ސަރުކާރުން ބޭނުން ގޮތަކަށް ބީއެމްއެލްގެ ބޯޑުން ނިންމާނެ ކަމަށެވެ.
ފައްޔާޒު ވިދާޅުވީ އާދިއްތަ ދުވަހުގެ ހެނދުނު ބީއެމްއެލްއިން ރުފިޔާ ކާޑުތަކަށް ޑޮލަރު ނުދޭން ނިންމާ އެކަން އިއުލާން ކުރުމުން ރައްޔިތުން އިންތިހާއަށް ރުޅިގަދަވެ ކެކިއެރުމުން ސަރުކާރުން ބީއެމްއެލްގެ ބޮލުގައި އެކަން އަޅުވާފައިވާ ކަމަށެވެ. އަދި ބީއެމްއެލްގެ އެނިންމުން ނިންމީ ރައްޔިތުންގެ ސަބަބުން ކަމަށް އޭނާ ވިދާޅުވިއެވެ.
މާލީ ނިޒާމުގައި އޮތް މިނިވަންކަން ފުޑުފުޑުކޮށްލުމަށް މި ސަރުކާރުން މަސައްކަތް ކުރާކަން ފާހަގަކުރައްވައި ފައްޔާޒު ވިދާޅުވީ މިއީ ކަންބޮޑުވާ ކަމެއް ކަމަށާއި، ސިޔާސީ މަގާމުތަކުގެ ބޭފުޅުން ބޭންކްތަކުގެ ބޯޑަށްލުމަކީ ނުރައްކާތެރި ކަމެއް ކަމަށެވެ.
ފައްޔާޒު ވިދާޅުވީ އެމްޑީޕީގެ ސަރުކާރަށް ރައްޔިތުން ނޫނެކޭ ބުނުމުން ޕީއެންސީގެ މިސަރުކާރަށް ގައުމު ހިންގުމަށް ފުރުސަތު ދީފައިވާ ކަމަށެވެ.
ނަމަވެސް މިއަދު މިފެންނަނީ ހަރުދަނާ ޕްލޭނެއް ނެތި ރާއްޖެ ކުރިއަށް ގެންދިއުމަށް މަސައްކަތް ކުރާ މަންޒަރު ކަމަށާއި، ނުވަތަ ރާއްޖެ ވެއްޓިދާނެ އަނދަވަޅަކުން ސަލާމަތް ކުރުމަށް މިސަރުކާރުގެ ރަނގަޅު ސިޔާސަތެއް ނެތި ކުރިއަށްދާ މަންޒަރު ކަމަށެވެ. އަދި ވިދާޅުވީ މިހިސާބަށް ގައުމު ގެންދިއުމުން އިދިކޮޅު ސިޔާސީ ޕާޓީއެއްގެ ޒިންމާގެ ދަށުން ސަރުކާރަށް ރައްޔިތުންގެ ކަންބޮޑުވުންތަކުގެ އަޑު އިއްވާނެ ކަމަށް ފައްޔާޒު ވިދާޅުވިއެވެ.
