ސްޕެނިޝް ލީގުގައި އެތުލެޓިކް ބިލްބާއޯއާ ދެކޮޅަށް ކުުޅުނު މެޗުން ވެސް ބާސެލޯނާ މޮޅުވެއްޖެ އެވެ.

ހޮނިހިރު ދުވަހުގެ ރޭ ކުޅުނު މެޗު ބާސެލޯނާ އިން ކާމިޔާބު ކުރީ 2-1 އިންނެވެ. މެޗުގެ ފުރަތަމަ ހާފުގައި ދެ ޓީމުން ވެސް ލަނޑު ޖެހިއިރު، ބާސެލޯނާ މޮޅުވީ ފަހު ހާފުގައި ޖެހި ލަނޑުންނެވެ.

މެޗު ފަށައިގެން 24 ވަނަ މިނެޓުގައި ބާސެލޯނާ އިން ވަނީ ލަނޑު ޖަހައި ލީޑު ނަގައިފަ އެވެ. އެ ޓީމަށް ލީޑު ނަގައިދިނީ ސްޕެއިންގެ ޒުވާން ކުޅުންތެރިޔާ ލަމީން ޔަމާލް އެވެ. ނަަމަވެސް ފުރަތަމަ ހާފު ނިމުމުގެ ކުރިން އެތުލެޓިކް ބިލްބާއޯ އިން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. އެ ޓީމަށް ލިބުނު ޕެނަލްޓީ ކާމިޔާބުކޮށް ނަތީޖާ ހަމަހަމަ ކޮށްދިނީ އޮއިހާން ސަންކޭޓް އެވެ. މެޗުން ބާސެލޯނާ މޮޅުވީ ދެ ވަނަ ހާފުގައި ޕޮލެންޑުގެ ރޮބާޓް ލެވަންޑޯސްކީ ޖެހި ލަނޑުންނެވެ.

ލީގުގައި މިހާތަނަށް ކުޅުނު ދެ މެޗުން ވެސް ބާސެލޯނާ މޮޅުވެފައިވާއިރު، މިވަގުތު އެ ޓީމު އޮތީ ދެ ވަނައިގަ އެވެ.