އިނގިރޭސި ޕްރިމިއާ ލީގުގައި މެންޗެސްޓަރ ޔުނައިޓެޑާ ދެކޮޅަށް ކުޅުނު މެޗުން ބްރައިޓަން މޮޅުވެއްޖެ އެވެ.

ލީގުގައި ދެ ޓީމުން ވެސް ވަނީ ކުޅުނު ފުރަތަމަ މެޗުން މޮޅުވެފަ އެވެ. ހޮނިހިރު ދުވަހުގެ ރޭ ބްރައިޓަންގެ އަމިއްލަ ދަނޑުގައި ކުޅުނު މެޗު އެ ޓީމުން ކާމިޔާބު ކުރީ 2-1 އިންނެވެ.

މެޗުގެ ފުރަތަމަ ހާފުގެ 32 ވަނަ މިނެޓުގައި ބްރައިޓަން އިން ވަނީ ލަނޑު ޖަހައި ލީޑު ނަގައިފަ އެވެ. އެ ޓީމަށް ލީޑު ނަގައިދިނީ ޑެނީ ވެލްބެކް އެވެ. އޭނާ އެ ލަނޑު ޖަހަން ފުރުސަތު ތަނަވަސްކޮށްދިނީ ކައޯރޫ މިޓޯމާ އެވެ. ނަމަވެސް ދެ ވަނަ ހާފުގައި ޔުނައިޓެޑުން ވަނީ ލަނޑު ޖަހައި ލީޑު ނަގައިފަ އެވެ. މެޗުގެ 60 ވަނަ މިނެޓުގައި ސައިރު މަޒްރައޮއީ ތަނަވަސްކޮށްދިން ފުރުސަތެއްގައި ޔުނައިޓެޑަށް މެޗުގެ ނަތީޖާ ހަމަހަމަ ކޮށްދިނީ އަމަދު ޑިއާލޯ އެވެ.

އޭގެ ފަހުން ޔުނައިޓެޑުން ދެ ވަނަ ލަނޑެއް ޖެހި ނަމަވެސް، ވީޑިއޯ އެސިސްޓެންޓް ރެފްރީ (ވީއޭއާރު) އިން ވަނީ އެ ލަނޑު ބަލައި ނުގަންނަން ނިންމައިފަ އެވެ. މެޗުގެ ފުރިހަމަ ވަގުތުގެ ކުޅުން ހަމަވެ އިތުރަށް ދެއްކި ވަގުތުގައި ބްރައިޓަން އިން ވަނީ ދެ ވަނަ ލަނޑު ޖަހައި މެޗުން މޮޅުވެފަ އެވެ. އެ ލަނޑު އެ ޓީމަށް ޖަހައިދިނީ ޖޮއާއޯ ޕެޑްރޯ އެވެ.

މޮޅާއެކު ބްރައިޓަން އޮތީ ތާވަލްގެ ދެ ވަނައިގަ އެވެ. މިވަގުތު ޔުނައިޓެޑު އޮތީ ތާވަލްގެ 11 ވަނައިގަ އެވެ.