މަސާޖުޕާލާތައް ހިންގާކަށް ހުއްދައެއް ނުދޭ، ހަށިވިއްކުވާ ދިވެހިން ޖޫރިމަނާކޮށް ފިޔަވަޅު އަޅާނަން: މިނިސްޓަރު އިހުސާން
24 އޯގަސްޓު 2024 | ހޮނިހިރު 08:09ސެލޫންގެ ނަމުގައި ހިންގާ ތަންތަނުން އުސޫލާ ހިލާފަށް ޚިދުމަތް ދެމުންދާނަމަ އެތަންތަން ބަންދުކުރާނަން
ނޫސްވެރިންގެ ބައްދަލުވުމުގައި ހޯމް މިނިސްޓަރު އަލީ އިހުސާން ވާހަކަދައްކަވަނީ
މާލެސިޓީ އަދި މީހުން ދިރިއުޅޭ އެއްވެސް ރަށެއްގައި މަސާޖްޕާލާ ހިންގުމަށް ހުއްދަ ނުދޭ ކަމަށާއި، މި ޚިދުމަތް ދޭ ތަންތަން ހިންގަމުންދަނީ ސެލޫންތަކުގެ ނަމުގައި ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެއެވެ.
ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި މިނިސްޓަރު އިހުސާން ވިދާޅުވީ މީހުން ދިރިއުޅޭ ރަށްރަށުގައި މަސާޖްޕާލާ ހިންގުމަށް އެއްވެސް އިދާރާއަކުން މިހާތަނަށް ހުއްދައެއް ދީފައިނުވާ ކަމަށެވެ. ސެލޫންގެ ނަމުގައި ހިންގާ ތަންތަނުން އުސޫލާ ހިލާފަށް ޚިދުމަތް ދެމުންދާ ކަމަށް މިނިސްޓަރު އިހުސާން ވިދާޅުވިއެވެ.
ގަވައިދާ ހިލާފަށް އުޅެމުންދާ ބިދޭސީންގެ މައްސަލައަށް ދާއިމީ ހައްލެއް ހޯދުމުގެ ގޮތުން އެކުލަވާލާފައިވާ ޓާސްކްފޯސްގެ މަސައްކަތްތައް ފުޅާކޮށްފައިވާކަން ފާހަގަކުރައްވައި މިނިސްޓަރު އިހުސާން ވިދާޅުވީ ކުރިއަށް އޮތް ދުވަސްތަކުގައި ކުރިއަށް ގެންދާ އޮޕަރޭޝަންތަކުގައި ޚިދުމަތް ދިނުމަށް ހުއްދަ ދީފައިވާ ގޮތާ ހިލާފަށް ޚިދުމަތް ދޭ ކަމަށްވާނަމަ އެތަނެއް ބަންދުކުރާނެ ކަމަށެވެ.
ހަށިވިއްކާ ބިދޭސީން ޑީޕޯޓުކުރަމުންދާ މައްސަލައަށް އިޝާރާތް ކުރައްވައި މިނިސްޓަރު އިހުސާން ވިދާޅުވީ އެފަދަ ކޭސްތަކުގައި އެކަމުގައި އިސްކޮށް އުޅޭ ދިވެހިންނާ މެދު ފިޔަވަޅު އަޅާނެ ކަަމަށެވެ. އަދި ހަށިވިއްކުން ކަހަލަ ކަމެއް ކުރުވާ ކަމަށް ތުހުމަތުކުރެވޭނަމަ ހިއުމަން ޓްރެފިކިންގެ މައްސަލައެއްގެ ގޮތުގައި ތަހުގީގު ކުރާނެ ކަމަށް މިނިސްޓަރު އިހުސާން ވިދާޅުވިއެވެ.
ބިދޭސީން ލައްވާ ގަވައިދާ ހިލާފަށް މަސައްކަތް ކުރުވާ މައްސަލައާ ގުޅޭގޮތުން މިނިސްޓަރު އިހުސާން ވިދާޅުވީ ގިނަ އަދަދެއްގެ ބިދޭސީން ރާއްޖެއަށް ގެނެސް، ސަރުކާރަށް ފީ ނުދައްކާ ކުންފުނިތައް ގިނަ ކަމަށެވެ. އަދި މިހާރު އެބިދޭސީން ފިލާފައިވާ ކަމަށް ރިޕޯޓު ލިބިފައިވާ ކަމަށާއި، އެމައްސަލަތައް ވަކިވަކިން ތަހުގީގުކޮށް ފިޔަވަޅު އަޅާނެ ކަމަށް މިނިސްޓަރު އިހުސާން ވިދާޅުވިއެވެ.
މިނިސްޓަރު އިހުސާން ވިދާޅުވީ އެއްވެސް ކޮންޓްރޯލެއް ނެތި ރާއްޖެއަށް ބިދޭސީން އެތެރެވުމަށް ހުއްދަ ނުދޭނެ ކަމަށެވެ.
