އިޒްރޭލުން ފަލަސްތީން ރައްޔިތުންނަށް ދެމުންދާ ހަމަލާތައް ވަރުގަދަ ކޮށް، އުތުރު ޣައްޒާ ހުސްކުރަން އަމުރުކޮށްފި

އިޒްރޭލު ސިފައިން، ޣައްޒާގެ އުތުރު އަދި މެދުތެރޭ ސަރަޙައްދުތަކަށް ދެމުންދާ ހަމަލާތައް ވަރުގަދަ ކުރުމާއެކު އުތުރު ޣައްޒާގެ ބައެއް ސަރަޙައްދުތަކުން މީހުން ފައިބައިގެން ދިއުމަށް އިޒްރޭލުން އަމުރުކޮށްފިއެވެ.

އުތުރު ޣައްޒާގެ ބައިތު ލަހިޔާ އަށާއި ޖަބާލިއާ އަށް ބޮން އަޅާ ބޮޑެތި ގެއްލުންތައް ދީފައިވާ ކަމަށް އަލްޖަޒީރާ އިން ބުނެފައިވެއެވެ.

އަނެއްކޮޅުން ޣައްޒާގެ ދެކުނުން ޚާން ޔޫނިސްގެ ގެއަކަށް އިޒްރޭލުން ބޮން އަޅާ މަދުވެގެން 9 މީހުން ޝަހީދު ކޮށްލައިފި ކަމަށް ވަފާ ނިއުސް އޭޖެންސީ އިން ބުނެފައިވެއެވެ. މީގެ ތެރޭގައި ކުޑަ ދެ ކުދިންނާއި އަންހެނަކު ހިމެނެއެވެ.

ޣައްޒާގެ ހަނގުރާމަ ހުއްޓުވުމަށް ކައިރޯގައި ކުރެވެމުންދާ މަޝްވަރާތައް "ބިނާކުރަނިވި" ކަމަށް ވައިޓް ހައުސްއިން ބުނެފައިވެއެވެ. ނަމަވެސް ހުށަހެޅިފައިވާ އެއްބަސްވުން ތަންފީޒުކުރުމަށް ހުރިހާ ފަރާތްތަކުން އެއްބާރުލުން ދޭންޖެހޭ ކަމަށް ބުނެފައިވެއެވެ. އެއްބަސްވުމަކަށް ނާދެވި ހުރި ކަންކަންމާ ބެހޭ ގޮތުން މަޝްވަރާ ކުރުމަށް ވާހަކަތަކުގެ މެދުވެރިންނާ އެމެރިކާގެ ވަފްދަކުން އާދިއްތަ ދުވަހު ބައްދަލު ކުރާނެ ކަމަށް ވެސް ވައިޓްހައުސް އިން ބުނެފައިވެއެވެ.

ހުކުރު ދުވަހު ހަމާސްގެ އިސް އޮފިޝަލަކު ބުނެފައިވަނީ ހަނގުރާމަ ހުއްޓާލުމުގެ އެއްބަސްވުމަކަށް ނާދެވިގެން އުޅޭ އެންމެ ބޮޑު ސަބަބަކީ މިސްރު-ޣައްޒާ ބޯޑަރުގައި ތިބި އިޒްރޭލު ސިފައިން ބޭލުމަށް ބޮޑު ވަޒީރު ނަތަންޔާހޫ އެއްބަސްނުވުން ކަމުގައެވެ. ހަމާސް އިން ބުނެފައިވަނީ "ފިލެޑެލްފީ ކޮރިޑޯ" ގެ ނަން ދެވިފައިވާ މި ސަރަހައްދުގައި އިޒްރޭލު ސިފައިން ގާއިމްވެ ތިބޭ ގޮތަކަށް ސުލްހައިގެ އެއްބަސްވުމަކަށް އެ ޖަމާއަތުން ތާއީދު ނުކާރޭ ކަމަށެވެ.

ދިގުލީ ހަނގުރާމައިގެ ސަބަބުން އާންމު ސާފުތާހިރު ކަން ގެއްލި ޣައްޒާގައި ޕޯލިއޯ ފެތުރިދާނެ ކަމުގެ އިންޒާރު ކަމާބެހޭ ފަރާތްތަކުން ދީފައިވަނިކޮށް، ޣައްޒާގައި އުމުރުން 10 މަހުގެ ކުއްޖަކަށް ޕޯލިއޯ ޖެހި، ވާގި ނެތިފައިވާ ކަމަށް ފަލަސްޠީނު ރެފިއުޖީންނާބެހޭ އދ. ގެ އޭޖެންސީއިން ކަށަވަރުކޮށްދީފައިވެއެވެ. މިއީ މި ފާއިތުވި 25 އަހަރަށްވުރެ ގިނަ ދުވަހުގެ ތެރޭގައި ޣައްޒާ އިން ފެނުނު ފުރަތަމަ ޕޯލިއޯ ކޭސްއެވެ.

ޕޯލިއާ ބަލީގެ ނުރައްކާ ޣައްޒާގެ ކުޑަކުދިންނަށް އޮތް އިރު، ކާބޯތަކެއްޗަށް ޖެހިފައިވާ ޣައްޒާގައި އިންސާނީ އެހީގެ ދަތިކަން ކުރިމަތިވެފައިވާ ކަމަށާއި ކާނާ ނުލިބުމުގެ ގެއްލުން ވެސް އެންމެ ބޮޑަށް ވަނީ ފަލަސްތީނުގެ ކުޑަކުދިންނަށް ކަމަށް އދ. ގެ އިސް ވެރިއަކު ވަނީ ވިދާޅުވެފައެވެ.

އދ. އިން ބުނާ ގޮތުގައި މި ހަނގުރާމައިގެ ސަބަބުން ޣައްޒާގެ އާބާދީގެ 90 އިންސައްތަ މީހުން ވަނީ އެއްފަހަރަށް ވުރެ ގިނަ ފަހަރު އިޒްރޭލުން އަމުރުކޮށްގެން އެމީހުން ވަޒަން ދޫކޮށް ތަފާތު ތަންތަނަށް ބަދަލުވެފައެވެ. މީގެ ނަތީޖާއެއްގެ ގޮތުން ރައްކައުތެރި ހިޔާވަހި ކަމެއް ނުލިބުމާއި، ސާފު ފެނާއި ކާނާ އިން މަހުރޫމް ވުމާއި، އަދި އެހެނިހެން އަސާސީ ޚިދުމަތްތައް ނުލިބުމުގެ ސަބަބުން ސިއްހީ މައްސަލަތަކުގެ އިތުރުން އެތައް މައްސަލަތަކެއް ވަނީ ކުރިމަތިވެފައެވެ.

އެންމެ ފަހުގެ ރިކޯޑްތަކަށް ބަލާއިރު، އިޒްރޭލުން ޣައްޒާއަށް ދެމުންދާ ހަމަލާތަކުގައި މަދުވެގެން 40،265 މީހުން ޝަހީދުވެ، 93،144 މީހުން ޒަޚަމްވެފައިވެއެވެ.