މިއަހަރުގެ މިހާތަނަށް ކާބޯތަކެތީގެ ޚިދުމަތްދޭ 1500ށް ވުރެ ގިނަ ތަންތަން ބަލާފާސްކޮށްފައިވޭ، 14 ތަނަކާ މެދު ފިޔަވަޅު އަޅާފައިވޭ: މިނިސްޓަރު ހަލީލު
ކާބޯތަކެތީގެ ޚިދުމަތްދޭ ތަންތަނުގެ ބޮޑަށް މައްސަލަތައް ފެންމަތިވަމުން ދަނީ ރަޖިސްޓްރީ ނުކުރާ ތަންތަނުން
ބުރާސްފަތި ދުވަހު ހެލްތް މިނިސްޓްރީގައި ބޭއްވި ނޫސްވެރިންގެ ބައްދަލުވުމުގެ ތެރެއިން
މިއަހަރުގެ ޖެނުއަރީ މަހުން ފެށިގެން މިހާތަނަށް 1500ށް ވުރެ ގިނަ ކާބޯތަކެތީގެ ޚިދުމަތް ދޭތަންތަން ބަލާފާސްކޮށްފައިވާ ކަމަށާއި، މިންގަނޑުތަކަށް ނުފެތޭ ތަންތަން ބަންދުކޮށްފައިވާ ކަމަށް ހެލްތް މިނިސްޓަރު އަބްދުﷲ ހަލީލް ވިދާޅުވެއްޖެއެވެ.
ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުވައި މިނިސްޓަރު ހަލީލު ވިދާޅުވީ މިސަރުކާރުގައި ކާބޯތަކެތީގެ ރައްކާތެރިކަމުގެ ޤާނޫނުގެ ދަށުން ބާރު ލިބުނު ނަމަވެސް މީގެ ކުރިން މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) ހިންގަމުންއައީ ގާނޫނުން މާ ބޮޑެތި ބާރުތަކެއް ލިބިގެން ނޫން ކަމަށެވެ. ނަމަވެސް މިހާރު މިގާނޫނާއެކު ބާރު ލިބިފައިވާ ކަމަށާއި، މަސައްކަތްތައް އިތުރަށް ހަރުދަނާ ކުރެވޭނެ ކަމަށް މިނިސްޓަރު ހަލީލު ވިދާޅުވިއެވެ. އަދި ވިދާޅުވީ އެ ގާނޫނުގެ ދަށުން ގަވާއިދުތައް އެކުލަވާލުމުގެ މަސައްކަތްތައް ކުރަމުންދާ ކަމަށެވެ.
އެމްއެފްޑީއޭއިން ކުރަމުންދާ މަސައްކަތްތަކަށް އިޝާރާތް ކުރައްވައި މިނިސްޓަރު ހަލީލު ވިދާޅުވީ ރަޖިސްޓްރީކޮށްގެން ހިންގާ ކާބޯތަކެތީގެ ޚިދުމަތް ދޭތަންތަން ބަލާފާސް ކުރުމުގެ މަސައްކަތްތައް ކުރިއަށް ގެންދާ ކަމަށާއި، މިއަހަރުގެ ޖެނުއަރީ މަހުން ފެށިގެން އޮގަސްޓް މަހުގެ 21 ވަނަ ދުވަހުގެ ނިޔަލަށް 1579 ތަނެއް ބަލާފާސްކޮށްފައިވާ ކަމަށެވެ. ގާނޫނާ ހިލާފަށް ޚިދުމަތް ދެމުންދިޔަ 14 ތަނެއް ބަންދުކުރި ކަމަށް މިނިސްޓަރު ހަލީލު ވިދާޅުވިއެވެ. އަދި ވިދާޅުވީ ގަވާއިދާ އެއްގޮތަށް ތަނުގެ ހާލަތު ގެނައުމުން 13 ތަނެއް ހުޅުވާފައިވާ ކަމަށާއި، އަދިވެސް އެތަން ބަންދުކޮށްފައިވާ ކަމަށެވެ.
ކާބޯތަކެތީގެ ޚިދުމަތްދޭ ތަންތަނުގެ ބޮޑަށް މައްސަލަތައް ފެންމަތިވަމުން ދަނީ ރަޖިސްޓްރީ ނުކުރާ ތަންތަނުންކަން ފާހަގަކުރައްވައި މިނިސްޓަރު ހަލީލު ވިދާޅުވީ މިމައްސަލަ ގުޅިފައިވަނީ ގަވާއިދާ ހިލާފަށް ރާއްޖޭގައި ދިރިއުޅޭ ބިދޭސީންނާ ކަމަށެވެ.
ކާބޯތަކެތީގެ ރައްކާތެރިކަމުގެ ޤާނޫނަށް އިޝާރާތް ކުރައްވައި މިނިސްޓަރު ހަލީލު ވިދާޅުވީ މިގާނޫނު ތަންފީޒުވެގެންދާއިރު ސާފުތާހިރުކަން ހުންނަންޖެހޭ މިންގަނޑުތައް ބަޔާން ކުރެވިގެންދާނެ ކަމަށެވެ. މިގާނޫނުގެ ދަށުން ގަވާއިދުތައް ހެދި، ފިހާރަތަކަށް ލާ އެކި ބާވަތްތަކުގެ ކާބޯތަކެތި އުފެއްދީ ކޮންތާކުންކަން އެނގޭނެ ގޮތް ހަދާނެ ކަމަށެވެ. އަދި މައްސަލައެއް ކުރިމަތިވުމުން ފިޔަވަޅު އަޅަންޖެހޭ ފަރާތް އެނގޭނެ ކަމަށް މިނިސްޓަރު ހަލީލު ވިދާޅުވިއެވެ.
މީގެ އިތުރުން މިނިސްޓަރު ހަލީލު ވިދާޅުވީ މިގާނޫނުގެ ދަށުން ފިޔަވަޅު އެޅޭނެ ކަމަށާއި، ޖިނާއީ ދައުވާ ކުރުމާއި، ޖޫރިމަނާ ކުރުމުގެ ބާރު ލިބޭ ކަމަށެވެ. އެގޮތުން 10،000 ރުފިޔާ އާއި 50،000 ރުފިޔާ އަދި އެއްމިލިއަން ރުފިޔާއިން ޖޫރިމަނާކުރުމުގެ ބާރު ލިބޭ ކަމަށް މިނިސްޓަރު ހަލީލު ވިދާޅުވިއެވެ.
މިނިސްޓަރު ހަލީލު ވިދާޅުވީ ސިއްހީ ރައްކާތެރިކަން ކޮންޕްރަމައިޒް ނުކުރާނެ ކަމަށާއި، ބިދޭސީ މީހާ ވެސް ޑީޕޯޓުކުރަންޖެހޭ ހާލަތުގައި ޑީޕޯޓުކޮށް ގާނޫނު ތަންފީޒު ކުރާނެ ކަމަށެވެ.
