ފ.އަތޮޅު ވޮލީ މުބާރާތް: ޗެމްޕިއަން ނިލަންދޫ ކަޓުވާލައި ފީއަލީ ފައިނަލަށް

މިހާރު ކުރިއަށްދާ ފ.އަތޮޅު ވޮލީ ބޯޅަ މުބާރާތުގެ އެންމެ ފަހުގެ ޗެމްޕިއަން ނިލަންދޫ ކަޓުވާލައި، ފީއަލީ ފައިނަލްގެ ޖާގަ ހޯދައިފި އެވެ.

ލީގު އުސޫލުން ކުޅޭ މުބާރާތުގެ ފައިނަލްގެ ޖާގަ ލިބެނީ ލީގު ބުރު ނިމޭއިރު އެއް ވަނަ ޓީމާއި، ދެ ވަނަ ޓީމަށެވެ. ހޯމަ ދުވަހުގެ ހަވީރު ނިލަންދޫ އާއި ފީއަލީ ބައްދަލު ކުރިއިރު، ފައިނަލްގެ ޖާގަ ލިބެން އޮތީ އެ މެޗުން މޮޅުވާ ޓީމަކަށެވެ. މޮޅުވާ ޓީމަކަށް އެއް ވަނައިގައި ފައިނަލްގެ ޖާގަ ލިބެން އޮތްއިރު، ފީއަލީން ވަނީ ތިން ސެޓު އެއް ސެޓުން ނިލަންދޫގެ މައްޗަށް ކުރި ހޯދައިފަ އެވެ.

މެޗުގެ ފުރަތަމަ ދެ ސެޓު ވެސް ކާމިޔާބު ކުރީ ފީއަލީންނެވެ. ވާދަވެރި ކުޅުމަކަށްފަހު ފީއަލީން ފުރަތަމަ ސެޓު ހޯދީ ފަަހު ވަގުތު ތަފާތު ދައްކައިގެންނެވެ. ފުރަތަމަ ސެޓު އެ ޓީމުން ކާމިޔާބު ކުރީ 25-23 އިންނެވެ. ދެ ވަނަ ސެޓުގައި ފީއަލީން ވަނީ ކުޅުން ރަނގަޅުކޮށް، ރަނގަޅު ލީޑެއްގައި އޮވެ ސެޓު ކާމިޔާބު ކޮށްފަ އެވެ. ދެ ވަނަ ސެޓު އެ ޓީމުން ކާމިޔާބު ކުރީ 25-18 އިންނެވެ.

ނަމަވެސް، ނިލަންދޫ އިން ވަނީ ތިން ވަނަ ސެޓު ކާމިޔާބުކޮށް އުންމީދު ހޯދައިފަ އެވެ. ތިން ވަނަ ސެޓުގައި ދެ ޓީމުގެ ފަރާތުން ވެސް ފެނުނީ ވާދަވެރި ކުޅުމެކެވެ. ކޮންމެ ޓީމަކަށް ވެސް ސެެޓު ނިންމަން ފުރުސަތު ލިބެމުން ދިޔަ އިރު، ނިލަންދޫ އިން ތިން ވަނަ ސެޓު ކާމިޔާބު ކުރީ 30-32 އިންނެވެ. ހަތަރު ވަނަ ސެޓުގައި ވެސް ވާދަވެރި ކުޅުމެއް ފެނުނުއިރު، ސެޓުގެ ވަކި ހިސާބަކުން ފީއަލީން ވަނީ ލީޑު ނަގައިފަ އެވެ. އެހެން ނަމަވެސް ނިލަންދޫ އިން ދެ ޕޮއިންޓަށް ވެސް ފަރަގު ކުޑަ ކުރި އެވެ. ފީއަލީން ހަތަރު ވަނަ ސެޓު ކާމިޔާބު ކުރީ 25- 22 އިންނެވެ.

ފިރިހެން ޑިވިޝަންގެ ފައިނަލްގައި ބައްދަލު ކުރާނީ ފީއަލީ އަދި މަގޫދޫ އެވެ. މުބާރާތުގެ ލީގު ބުރުގައި މި ދެ ޓީމު ކުޅުނު މެޗު މަގޫދޫ އިން ކާމިޔާބު ކުރީ ތިން ސެޓު ދެ ސެޓުންނެވެ.

މުބާރާތުގެ އަންހެން ޑިވިޝަންގެ ފަހު މެޗުގައި ހޯމަ ދުވަހުގެ ރޭ ފީއަލީ ނިކުތީ ނިލަންދޫއާ ދެކޮޅަށެވެ. އެ މެޗު ފީއަލީން ކާމިޔާބު ކޮށްފައި ވަނީ ސީދާ ތިން ސެޓުންނެވެ. ފީއަލީން މެޗުގެ ސެޓުތައް ކާމިޔާބު ކޮށްފައި ވަނީ 25-16، 25-14 އަދި 25-17 އިންނެވެ.

މުބާރާތުގެ އަންހެން ޑިވިޝަންގެ ފައިނަލްގައި ބައްދަލު ކުރާނީ ދަރަނބޫދޫ އާއި މަގޫދޫ އެވެ.