އިޒްރޭލުން ފަލަސްތީނުގެ ނޫސްވެރިއަކު އަނެއްކާވެސް މަރާލައިފި

ހޯމަ ދުވަހު ޣައްޒާގެ ސިއްހީ ވުޒާރާއާއި ފަލަސްތީނުގެ ނިއުސް ސައިޓަކުން ބުނެފައިވަނީ އާދިއްތަ ދުވަހު ޣައްޒާގެ ދެކުނުގައި އިޒްރޭލުން ދިން ހަމަލާއެއްގައި ނޫސްވެރިއަކު މަރުވެފައިވާ ކަމަށެވެ.

އިބްރާހީމް މުހާރަބްގެ މި ނޫސްވެރިޔާގެ ހަށިގަނޑު ހޯމަ ދުވަހު ޚާން ޔޫނިސް ގެ ނާސިރު ހޮސްޕިޓަލަށް ގެންގޮސްފައިވާ ކަމަށް އެ ވުޒާރާއިން ބުނެފައިވެއެވެ.

މުހާރަބް މަސައްކަތްކުރި ނިއުސް ވެބްސައިޓް ކަމުގައިވާ "ޕެލެސްޓީނިއަން ޑެއިލީ" އިން އޭނާ މަރާލި ވާހަކަ އިއުލާންކުރަމުން ބުނެފައިވަނީ، އޭނާ މަރުވީ އޭނާ އަށާއި އެހެން ނޫސްވެރިން ތަކަކަށް އަމާޒުކޮށް އިޒްރޭލު ސިފައިން ދިން ހަމަލާ އަކާ ގުޅިގެން ކަމުގައެވެ.

މުހާރަބްގެ ހަށިގަނޑު ފެނުނީ ހޯމަ ދުވަހުގެ ހެނދުނު ޤަތަރުން އިމާރާތްކޮށްފައިވާ، މިހާރު ވީރާނާވެފައިވާ ބޮޑު އެޕާޓްމަންޓް ކޮމްޕްލެކްސްއެއް ކަމުގައިވާ ހަމަދް ސިޓީން ކަމަށް އެ ވެބްސައިޓުން ބުނެފައިވެއެވެ.

އިޒްރޭލުން ހަމަލާ ދިން އިރު އެ ވަގުތު މުހާރަބްއާއެކު ތިބި އިތުރު ދެ ނޫސްވެރިން ޒަޚަމްވެ، ޚާން ޔޫނިސްގެ ނާސިރު ހޮސްޕިޓަލަށް ގެންދެވުނު ކަމަށް އޭއެފްޕީގެ ނޫސްވެރިއަކު ރިޕޯޓުކޮށްފައިވެއެވެ.

ފަލަސްތީނު ނޫސްވެރިންގެ ޖަމްޢިއްޔާއިން މުހާރަބް "ޝަހީދުކޮށްލުން" ކުށްވެރިކޮށް، އިޒްރޭލު ސިފައިން ޣައްޒާގައި "ނޫސްވެރިން މެރުމަށް ރާވައިގެން ހިންގާ ކެމްޕޭނެއް" ގެންދާ ކަމަށް ބުނެފައިވެއެވެ.

މިހާދިސާ އާ ގުޅޭ ގޮތުން ހޮސްޕިޓަލުގައި ހުރި ޣައްޒާގެ ނޫސްވެރިއެއް ކަމުގައިވާ އިބްރާހީމް ޤަނާން ބުނެފައިވަނީ އިޒްރޭލުން "ޣައްޒާ ސްޓްރިޕްގައި ހިންގާ ކަންކަން ބޭރު ދުނިޔެއަށް ފޯރުކޮށްދިނުމުގެ ހުރިހާ ގޮތެއް ނައްތާލަން މަސައްކަތްކުރުމުގެ ތެރެއިން ހަޤީޤަތް މަރާލަމުންދާ" ކަމަށެވެ.

ނޫސްވެރިންގެ ހައްގުގައި މަސައްކަތްކުރާ އަމިއްލަ ޖަމާއަތެއް ކަމަށް ކޮމިޓީ ޓު ޕްރޮޓެކްޓް ޖާނަލިސްޓްސް (ސީޕީޖޭ) އިން ހޯމަ ދުވަހު ރިޕޯޓުކޮށްފައިވަނީ، އޮކްޓޯބަރު 7 ން ފެށިގެން އިޒްރޭލުން ޣައްޒާ ގައި ހިންގަމުންދާ ހަނގުރާމައިގައި މިހާތަނަށް "މަދުވެގެން 113 ނޫސްވެރިންނާއި މީޑިއާގެ މުވައްޒަފުން" މަރުވެފައިވާ ކަމަށެވެ.

މިއީ "1992 ވަނަ އަހަރުން ފެށިގެން ސީޕީޖޭ އިން މަޢުލޫމާތު އެއްކުރަން ފެށި ފަހުން، ނޫސްވެރިންނަށް އެންމެ ނުރައްކާތެރިވި މުއްދަތު" ކަމަށް ވެސް އެ ޖަމްއިއްޔާ އިން ބުނެފައިވެއެވެ.