އިޒްރޭލުން ހަމަލާތައް ފުޅާކުރަމުން ދާއިރު ބްލިންކަން މެދުއިރުމަތީގައި

އިޒްރޭލު ސިފައިން އެއްގަމު މަގުން މިހާރު އަރައިގެން އުޅެނީ ޣައްޒާގެ އަލް-ބަލާހުގެ މެދުތެރޭގައި ކަމަށް އިޒްރޭލުން ބުނެފިއެވެ. މިއީ މިހާތަނަށް މައިގަނޑު ގޮތެއްގައި ހަނގުރާމައިން ސަލާމަތްވެފައިވާ ސަރަހައްދެއް ކަމަށް ވާއިރު މި ހިސާބުގައި އެއްގަމު މަގުން ހަމަލާތައް ދޭން ފެށުމުން އެ ސަރަހައްދުގައި ދިރިއުޅޭ މީހުން ރައްކައުތެރި އެހެން ސަރަހައްދަކަށް ދާން ވަނީ މަޖުބޫރުވެފައެވެ. ހަނގުރާމައިގެ ނުރައްކަލުން ސަލާމަތްވުމަށް ސަރަހައްދުތައް ދޫކުރަމުން ކުރަމުން ގޮސް ޣައްޒާގެ ރައްޔިތުން މިހާރު ތިބީ އެތަނުގެ ބިމުގެ އޭރިއާގެ 11 އިންސައްތަގެ ސަރަހައްދަކަށް ޖަމާވެ ތޮއްޖެހިފައި ކަމަށް އަލްޖަޒީރާ އިން ބުނެއެވެ.

ފާއިތުވި 24 ގަޑީއިރުގެ ތެރޭގައި ޔަހޫދީ ދައުލަތުގެ ސިފައިން ހިންގާފައިވާ ޖަރީމާތަކުގެ ތެރޭގައި ދެކުނު ޣައްޒާގެ ހާން ޔޫނިސްގައި ހަނގުރާމަ ކަވަރު ކުރަމުންދިޔަ ފަލަސްތީނު ނޫސްވެރިއެއްގެ ބުރަކަށްޓަށް ބަޑިޖަހާ ޒަޚަމްކޮށްލާފައިވެއެވެ.

އެމެރިކާގެ ސެކްރެޓަރީ އޮފް ސްޓޭޓް އެންތަނީ ބްލިންކެން މިހާރު ހުންނެވީ ތެލް އަވީވްގައެވެ. މިއީ އޮކްޓޯބަރު 7ން ފެށިގެން އޭނާ އިޒްރޭލަށް ކުރެއްވި 9 ވަނަ ދަތުރުފުޅެވެ. އިސްރާއީލުގެ ރައީސް އައިސެކް ހާރޒޯގް އާ ބައްދަލުކުރުމުގެ ކުރިން ބްލިންކެން ވިދާޅުވީ މިއީ ހަމާސް އާއެކު ހަނގުރާމަ ހުއްޓާލުމުގެ އެއްބަސްވުމަކަށް އައިސް ހަމާސް އިން ހައްޔަރުކޮށްފައިވާ ރަހީނުން މިނިވަންކޮށްގެން އިޒްރޭލަށް ގެންނަންވީ ވަގުތު ކަމުގައެވެ.

ބްލިންކަންގެ މި ދަތުރުފުޅު ކުރިއަށް ދާއިރު، ހަނގުރާމަ ހުއްޓާލުމުގެ މަޝްވަރާ ތަކުގައި ހަމަލާތައް ހުއްޓާލާ ފަހުން ވެސް ޣައްޒާ އާއި މިސްރުގެ ސަރަހައްދީ ރޮނގުގައި އޮންނަ ފިލަޑެލްފީ ކޮރިޑޯގައި އިޒްރޭލު ސިފައިން ތިބޭނެ ކަމަށް އިޒްރޭލުން ބުނުމުން މަޝްވަރާތަކުގައި މައްސަލަ އުފެދިފައިވާކަން ވަނީ ފާހަގަ ކުރެވިފައެވެ. ހަމާސް އިން ތަކުރާރުކޮށް ބުނަމުންދަނީ އިޒްރޭލު ސިފައިން ޣައްޒާގެ އެއްވެސް ތަނެއްގައި ތިބޭ ގޮތަކަށް ހެދޭ ސުލްހައިގެ އެއްބަސްވުމެއްގައި ބައިވެރި ނުވާނެ ކަމުގައެވެ.

އިޒްރޭލުން ޣައްޒާއަށް ދެމުންދާ ހަމަލާތަކުގައި މިހާތަނަށް މަދުވެގެން 40،139 މީހުން ޝަހީދުވެ، 92،743 މީހުން ޒަޚަމްވެފައިވާ ކަމަށް ޣައްޒާގެ ހެލްތް މިނިސްޓްރީން ބުނެފައިވެއެވެ. އޮކްޓޯބަރު 7 ގައި ހަމާސް އިން އިޒްރޭލަށް ދިން ހަމަލާތަކުގައި އަންދާޒާކުރެވޭ ގޮތުގައި މަރުވެފައިވަނީ 1،139 މީހުންނެވެ. ހަމާސް އިން ވަނީ 200 އަށްވުރެ ގިނަ މީހުން އިޒްރޭލުން ހައްޔަރު ކޮށްފައެވެ.