މަސްތުވާތަކެތީގެ މައްސަލާގައި ތުހުމަތުކުރެވޭ އައިޖީއެމްއެޗް ގެ ނަރުސް ސަސްޕެންޑުކޮށްފި
މި މައްސަލަ ހުށަހެޅީ ހޮސްޕިޓަލްގެ ފަރާތުން
އައިޖީއެމްއެޗް
މަސްތުވާތަކެތީގެ މައްސަލާގައި ތުހުމަތުކުރެވޭ އަންހެން ނަރުސް ސަސްޕެންޑުކޮށްފައިވާ ކަމަށް އައިޖީއެމްއެޗުން ބުނެފިއެވެ.
ހޮނިހިރު ދުވަހު ފުލުހުން ބުނީ އައިޖީއެމްއެޗްގައި މަސައްކަތް ކުރާ ނަރުހެއް މަސްތުވާތަކެތި ބޭނުންކުރާ މައްސަލައެއް މީގެ ދެ ހަފްތާ ކުރިން ހުށަހަޅާފައިވާ ކަމަށާއި، އެމައްސަލަ ތަހުގީގު ކުރަމުންދާ ކަމަށެވެ. އަދި އެ މައްސަލަ ހުށަހެޅީ އެ ހޮސްޕިޓަލުން ކަމަށެވެ.
މިމައްސަލައާ ގުޅިގެން ރާއްޖެއެމްވީއަށް އައިޖީއެމްއެޗްގެ މީޑިއާ އޮފިޝަލް ވިދާޅުވީ އެއީ އަންހެން ނަރުހެއް ކަމަށާޢި، އެ މުވައްޒަފު މިހާރު ސަސްޕެންޑް ކުރެވިފައިވާ ކަމަށެވެ. އެ ނަރުހަކީ ކުރީގައި ވޯޑު އިންޗާޖެއް ނަމަވެސް މަސައްކަތުގެ ފެންވަރަށް ބަލުމަށްފަހު މީގެ ދެމަސް ދުވަސް ކުރިން މަގާމު ބަދަލުކޮށްފައިވާ ކަމަށް އޮފިޝަލް ވިދާޅުވިއެވެ. އަދި ވިދާޅުވީ ވޯޑު އިންޗާޖުގެ ވަޒީފާގެ މަސްއޫލިއްޔަތުން ނަގާފައިވާ ކަމަށެވެ.
މިމައްސަލައާ ގުޅިގެން މިހާތަނަށް އެއްވެސް މީހަކު ހައްޔަރުކޮށްފައިނުވެއެވެ.
މައުލޫމާތު ލިބިފައިވާ ގޮތުގައި މިމައްސަލަ ފެންމަތިވެ، ހޮސްޕިޓަލުން މިމައްސަލަ ހުށަހަޅާފައިވަނީ އެ ނަރުސްމީހާ މަސްތު ހާލަތުގައި ހުރެ ޑިއުޓީއަށް ނުކުތުމުންނެވެ.
މިމައްސަލަ ފުލުހުން ދަނީ އިތުރަށް ތަހުގީގު ކުރަމުން ކަމަށް ބުނެފައިވެއެވެ.
