މިހާރު ކުރިއަށްދާ ފ.އަތޮޅު ވޮލީ ބޯޅަ މުބާރާތުގައި މަގޫދޫ އިން ފީއަލީގެ ދެ ޓީމުގެ މައްޗަށް ވެސް ކުރި ހޯދައިފި އެވެ.

ހޮނިހިރު ދުވަހުގެ ހަވީރު މަގޫދޫ އައުޓް ޑޯ ވޮލީ ކޯޓުގައި ބައްދަލު ކުރީ ފީއަލީ ފިރިހެން ޓީމާއި، މަގޫދޫ ފިރިހެން ޓީމެވެ. އެ މެޗު މަގޫދޫ އިން ކާމިޔާބު ކުރީ ތިން ސެޓު ދެ ސެޓުންނެވެ. އެއީ މެޗުގެ ފުރަތަމަ ދެ ސެޓު ފީއަލީން ކާމިޔާބު ކޮށްފައި ވަނިކޮށް، ފަހަތުން އަރައި ތިން ސެޓު ކާމިޔާބު ކޮށްގެންނެވެ.

މެޗުގެ ފުރަތަމަ ސެޓު ފީއަލީން ކާމިޔާބު ކުރީ 25-16 އިންނެވެ. އަދި ދެ ވަނަ ސެޓު ފީއަލީން ކާމިޔާބު ކުރީ 25-19 އިންނެވެ. ނަމަވެސް މަގޫދޫ އިން ވަނީ ޖެހިގެން އައި ސެޓު ކާމިޔާބުކޮށް އުންމީދު ހޯދައިފަ އެވެ. މަގޫދޫ އިން ތިން ވަނަ ސެޓު ކާމިޔާބު ކުރީ 22-25 އިންނެވެ. ހަތަރު ވަނަ ސެޓުގައި ދެ ޓީމުގެ ފަރާތުން ވެސް ވާދަވެރި ކުޅުމެއް ފެނުނުއިރު، މި ސެޓު މަގޫދޫ އިން ކާމިޔާބު ކުރީ 24-26 އިންނެވެ. ނަތީޖާ ނެރުމަށް ކުޅުނު ފަސް ވަނަ ސެޓު މަގޫދޫ އިން ކާމިޔާބު ކުރީ 11-15 އިންނެވެ.

ހޮނިހިރު ދުވަހުގެ ރޭ މަގޫދޫ އަންހެން ޓީމު ނިކުތީ ފީއަލީގެ އަންހެން ޓީމާ ދެކޮޅަށެވެ. އެ މެޗު މަގޫދޫ އިން ކާމިޔާބު ކުރީ ތިން ސެޓު އެއް ސެޓުންނެވެ. އެ މެޗުގެ ފުރަތަމަ ސެޓު މަގޫދޫ އިން ކާމިޔާބު ކުރީ 25-12 އިންނެވެ. ނަމަވެސް ފީއަލީން ވަނީ 18-25 އިން ކާމިޔާބު ކޮށްފަ އެވެ. ނަމަވެސް މަގޫދޫ އިން ވަނީ ދެން ކުޅުނު ތިން ވަނަ ސެޓާއި، ހަތަރު ވަނަ ސެޓު ކާމިޔާބު ކޮށްފަ އެވެ. އެއީ ތިން ވަނަ ސެޓު 25-20 އިން އަދި ހަތަރު ވަނަ ސެޓު 25-12 އިންނެވެ.

މުބާރާތުގައި އާދިއްތަ ދުވަހުގެ ހަވީރު ވެސް ކުޅުން އޮންނާނެ އެވެ.