ބިދޭސީންނަށް ފީ ނުދައްކާ ފަރާތްތަކަށް ދޭ ޚިދުމަތް ކަނޑާލަނީ
17 އޯގަސްޓު 2024 | ހޮނިހިރު 19:56ފައިސާ ދައުލަތަށް ދެއްކުމުގެ އިތުރު ފުރުސަތެއްގެ ގޮތުން އޮގަސްޓް މަހުގެ 31 ގެ ނިޔަލަށް ފައިސާ ދައްކާ ޚަލާސްކުރަންޖެހޭނެ
ރާއްޖޭގައި އުޅޭ ބައެއް ބިދޭސީން
ދިވެހިރާއްޖޭގައި ވަޒީފާ އަދާކުރާ ބިދޭސީންނާއި ގުޅިގެން ދޫކުރާ ހުއްދަތަކަށް ދައުލަތަށް ދައްކަންޖެހޭ ފީތަކާއި ޖުރިމަނާ ނުދައްކާ ފަރާތްތަކަށް އެކްސްޕާޓް ސިސްޓަމް މެދުވެރިކޮށްދޭ ޚިދުމަތް މެދުކަނޑާލާނެ ކަމަށް މިނިސްޓްރީ އޮފް ހޯމްލޭންޑް ސެކިއުރިޓީ އެންޑް ޓެކްނޮޖީން ބުނެފިއެވެ.
މިނިސްޓްރީ އޮފް ހޯމްލޭންޑް ސެކިއުރިޓީ އެންޑް ޓެކްނޮޖީ އިން 17 އޮގަސްޓްގައި ކޮށްފައިވާ އިއުލާނެއް ގައި ބުނެފައިވަނީ، ދިވެހިރާއްޖޭގައި ވަޒީފާ އަދާކުރާ ބިދޭސީންނާ ގުޅިގެން ދޫކުރާ ހުއްދަތަކަށް ދައުލަތަށް ދައްކަންޖެހޭ ފީތަކާއި ޖުރިމަނާ އެއްލައްކަ ރުފިޔާ އަށް ވުރެ އިތުރުވެފައިވާ ފަރާތްތަކުން 2024 އޮގަސްޓު 12 ވަނަ ދުވަހުގެ ކުރިން ފައިސާ ދައްކާ ޚަލާސްކުރުމަށް އެންގިފައިވާނޭ ކަމަށާއި، ނަމަވެސް ދެންނެވުނު ފައިސާ ދައުލަތަށް ދެއްކުމުގެ އިތުރު ފުރުސަތެއްގެ ގޮތުން އޮގަސްޓް މަހުގެ 31 ގެ ނިޔަލަށް ފައިސާ ދައްކާ ޚަލާސްކުރަންޖެހޭނެ ކަމަށެވެ.
އަދި މި މުއްދަތުގެ ނިޔަލަށް ފައިސާ ދައްކާފައި ނުވާ ފަރާތްތައް 2024 ސެޕްޓެމްބަރު 1 ވަނަ ދުވަހުން ފެށިގެން އެކްސްޕެޓް ސިސްޓަމް އިން ސަސްޕެންޑް ކުރެވި ސިސްޓަމް މެދުވެރިކޮށް ދެމުން ގެންދާ ޚިދުމަތްތައް މެދުކަނޑާލެވޭނެ ކަމަށެވެ.
"2024 ސެޕްޓެމްބަރު 1 ވަނަ ދުވަހުން ފެށިގެން ދިވެހިރާއްޖޭގެ ބިދޭސީން ވަޒީފާ އަދާކުރުމާބެހޭ ގަވައިދުގެ ޖަދުވަލު 7 ގެ ދަށުން އެކްސްޕަޓް ސިސްޓަމް އިން ސަސްޕެންޑް ކުރެވި ސިސްޓަމް މެދުވެރިކޮށް ދެމުން ގެންދާ ޚިދުމަތްތައް މެދުކަނޑާލެވޭނެ ކަމުގައި،" މިނިސްޓްރީގެ އިއުލާން ގައި ވެއެވެ.
ބިދޭސީ މަސައްކަތްތެރިންނަށް ދޫކޮށްފައިވާ ހުއްދަތަކާ ގުޅިގެން، ވަޒީފާދޭ ފަރާތުން ދައުލަތަށް ދައްކަންޖެހޭ ނުދައްކާ ހުރި ފީތަކާއި ޖޫރިމަނާތަކުގެ ޢަދަދު އެއް ލައްކަ ރުފިޔާ އަށްވުރެ އިތުރުވާ ފަރާތްތަކުގެ ތަފްޞީލް ހިމެނޭ ލިސްޓެއް މިނިސްޓްރީ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީން ވަނީ މީގެ ކުރިން އާންމު ކޮށްފައެވެ.
