ޣައްޒާގެ ކުޑަ ކުއްޖަކަށް ޕޯލިއޯ ޖެހިއްޖެ ކަން ކަށަވަރު ކޮށްދީފި

ޣައްޒާގައި ޕޯލިއޯ ބަލި އުޅޭ ކަމަށް އޮފިޝަލުން ހާމަކޮށްފިއެވެ.

ޣައްޒާ ގައި ޕޯލިއާ ޖެހިފައިވާ ކުޑަކުއްޖަކު ފެނިފައިވާ ކަމަށް އެތަނުގެ ސިއްޙަތާ ބެހޭ ވުޒާރާ އިން ހާމަ ކުރީ، އދ. ގެ ސެކްރެޓަރީ ޖެނެރަލް އެންޓޯނިއޯ ގުޓެރެސް ފަލަސްތީނުގެ އެތައް ސަތޭކަ ހާސް ކުޑަ ކުދިންނަށް ވެކްސިން ދިނުމަށް ހަމަލާތައް ވަގުތީ ގޮތުން ހުއްޓާލުމަށް ގޮވާލައްވާފައި ވަނިކޮށްނެވެ.

ހުކުރު ދުވަހު ނެރުނު ބަޔާނެއްގައި ސިއްޙަތާ ބެހޭ ވުޒާރާ އިން ބުނެފައިވަނީ، ޕޯލިއޯ ވައިރަސް ފެތުރެން ދިމާވީ އިޒްރޭލުން ހިންގަމުންދާ ހަނގުރާމައިގެ ސަބަބުން ޣައްޒާގެ އާއްމު ސިއްހަތުގެ ހާލަތު އިންތިހާ އަށް ދަށަށް ދިއުމުން ކަމުގައެވެ.

ޕޯލިއޯ ވައިރަސްއަކީ ވަރަށް ފަސޭހައިން ފެތުރޭ ވައިރަސްއެކެވެ. އެންމެ ގިނައިން ފެތުރެނީ ނަޖިސް އަދި ތަޣައްޔަރުވެފައިވާ ފެނުގެ ޒަރީއާ އިންނެވެ. މި ވައިރަސްގެ ސަބަބުން ގުނަވަންތައް އައިބުވުމާއި، ވާގި ނެތޭ ގޮތްވުމާއި، އަދި މަރުވުމުގެ ނުރައްކާވެސް އޮވެއެވެ. މައިގަނޑު ގޮތެއްގައި ބަލީގެ އަސަރު އެންމެ ބޮޑަށް ކުރަނީ އުމުރުން 5 އަހަރުން ދަށުގެ ކުދިންނަށެވެ.

ޣައްޒާ ގައި ސިއްޙީ ހާލަތު ދަށަށް ގޮސް ގޮންޖެހުންތައް ކުރިމަތިވެފައިވާއިރު، ގައިންގަޔަށް އަރާ ބަލިތައް ފެތުރި، މަގުމަތީގައާއި ވަގުތީ ހިޔަލުގައި ދިރިއުޅޭ މީހުންގެ ޓެންޓުތަކުގެ ތެރޭގައި ނަޖިސް ފެތުރި، އަދި އަމިއްލަ ސާފުތާހިރުކަމަށް ބޭނުންވާ ތަކެއްޗާއި ސާފު ބޯފެން ނުލިބޭ ހާލަތެއްގައި ވަނިކޮށް، ޕޯލިއޯގެ އަލާމާތްތައް ހުރި ކުއްޖެއްގެ ކިބައިން ލެބޯޓަރީ ޓެސްޓުތަކުން ޕޯލިއޯ ހުރިކަން ކަށަވަރު ކުރެވިފައިވާކަމަށް ސިއްހަތާ ބެހޭ ވުޒާރާގެ ބަޔާނުގައި ބުނެފައިވެއެވެ.

ޣައްޒާ އިން ޕޯލިއޯ ޖެހިފައިވާ ކުއްޖާ އަކީ އުމުރުން 10 މަހުގެ ވެކްސިން ނުޖަހާ ކުއްޖެއް ކަމަށާއި ބަލި ހުރިކަން ސާބިތުވީ އުރުދުން އަށް ސާމްޕަލް ފޮނުވައިގެން ހެދި ޓެސްޓްތަކުން ކަމަށް ރާމަﷲ ގައި ހުންނަ ސިއްހަތާ ބެހޭ ވުޒާރާ އިން ބުނެއެވެ.

ޣައްޒާ ގައި ޕޯލިއޯ ބަލީގެ މީހަކު މި ވޭތުވެ ދިޔަ 25 އަހަރުގެ ތެރޭގައި ފެނިފައި ނުވާ ކަމަށް އދ އިން ވަނީ ބުނެފައެވެ.

އދ ގެ ސެކްރެޓަރީ ޖެނެރަލް ގޮވާލެއްވީ ޣައްޒާ ގައި ވެކްސިން ދޭން ޖެހޭ 640،000 އަށްވުރެ ގިނަ ކުދިންނަށް ވެކްސިން ދިނުމަށްޓަކައި ހަތް ދުވަހުގެ މުއްދަތައް ނަމަވެސް ހަނގުރާމަ ހުއްޓާލުމަށެވެ.

ޔުނިސެފް އިން ބުނެފައިވަނީ ހިޞާރުކޮށްފައިވާ ފަލަސްޠީނު ސަރަޙައްދުތަކުގައި ދިރިއުޅޭ ކުދިންނާ ހަމަ އަށް ވާސިލްވާނެ ޕްލޭނެއް މިހާރު އެ ޖަމްއިއްޔާ އިން ވަނީ ހަދާފައެވެ. އެ ޕްލޭން ތަންފީޒް ކުރަން މިމަހު ފެށޭނެ ކަމަށާއި އެހެން ނަމަވެސް އެކަން އެހެން ކުރެވޭނީ 10 މަސް ދުވަސް ވެފައިވާ ހަނގުރާމަ މެދުކެނޑިގެން ކަމަށް އޭއެފްޕީން ޔުނިސެފްގެ އޮފިޝަލުންނާ ހަވާލާދީ ބުނެފައިވެއެވެ.

ޤަޠަރުގައި ހިނގަމުންދާ ހަނގުރާމަ ހުއްޓާލުމުގެ މަޝްވަރާތަކާއެކުވެސް، އިޒްރޭލުން ގެންދަނީ ހިޞާރުކޮށްފައިވާ ޣައްޒާ އަށް ވައިގެ މަގުން ބޮން އަޅަމުން އަދި ޓޭންކްތަކުގައި ބޮޑުބަޑިން ހަމަލާދެމުންނެވެ. މިހާރު ހަނގުރާމަ 10 ވަނަ މަހަށް އަޅާފައިވާއިރު އިޒްރޭލުގެ ހަމަލާތަކުގައި ޝަހީދުވި މީހުންގެ އަދަދު 40،000ށް ވުރެ މައްޗަށް ގޮސްފައިވެއެވެ.