ޔުކްރެއިން އިން ރަޝިއާގެ ބިމުގައި އަސްކަރީ އޮފީހެއް ހުޅުވައިފި

ރަޝިއާގެ ހުޅަނގު ސަރަހައްދުގެ ކާރސްކް ސަރަޙައްދުގައި ޔުކްރެއިން ސިފައިންގެ އިދާރީ އޮފީހެއް ޤާއިމްކޮށްފިއެވެ.

ޖެނެރަލް އޮލެކްސަންދަރް ސޮރްސްކީ ވިދާޅުވީ މި އޮފީހުގެ މަޤްޞަދަކީ "ޤާނޫނާއި އުސޫލްތައް ދެމެހެއްޓުމާއި" އަދި އެ ސަރަޙައްދުގެ އާބާދީއަށް ކޮންމެހެން ބޭނުންވާ ކަންކަން ފުއްދައިދިނުން ކަމަށެވެ.

ސޯޝަލް މީޑިއާގައި ޝާއިޢުކޮށްފައިވާ ވީޑިއޯއެއްގައި، ޔުކްރެއިންގެ ރައީސް ވުލޮޑިމިރ ޒެލެންސްކީ ރިޔާސަތު ބަލަހައްޓަވާ ބައްދަލުވުމެއްގައި ޖެނެރަލް ސޮރްސްކީ ވިދާޅުވަނީ މި އޮފީސް ޤާއިމްކޮށްފައިވަނީ "ޔުކްރެއިންގެ ބާރުގެ ދަށުގައިވާ ސަރަޙައްދުތަކުގައި" ކަމަށެވެ.

ރަޝިއާގެ ދިފާޢީ ވަޒީރު އަންދްރޭ ބިލޯސެފް ވިދާޅުވެފައިވަނީ އެ ސަރަޙައްދުގެ އާބާދީ "ރައްކާތެރިކުރުމަށް" އިތުރު ބާރުތައް ރަޝިއާ އިން ފޮނުވާނެ ކަމަށެވެ.

ޔުކްރެއިން އިން ބުނެފައިވަނީ ރަޝިއާ އަށް އެރި ޔޫކްރެއިން ސިފައިން ބުރާސްފަތި ދުވަހު އިތުރު ކުރިއެރުންތަކެއް ހޯދިފައިވާ ކަމަށެވެ.

ޖެނެރަލް ސޮރްސްކީ ވިދާޅުވި ގޮތުގައި ޔޫކްރެއިނުގެ ސިފައިން ކާރސްކް ސަރަޙައްދުގެ 35 ކިލޯމީޓަރު އެތެރެއަށް ވަދެ، 1،150 އަކަ ކިލޯމީޓަރުގެ ސަރަޙައްދެއް ކޮންޓްރޯލް ކުރަމުންދާ ކަމަށާއި، މީގެ ތެރޭގައި 82 އަވަށް ހިމެނޭ ކަމަށެވެ.

ޔޫކްރެއިން ސިފައިން ރަޝިއާ އަށް އަރާ ބޮޑު ސަރަހައްދެއް ކޮންޓްރޯލް ކުރަމުންދާތާ މިހާރު 10 ވަނަ ދުވަހަށް އައިއިރު، މިއީ 2022 ގައި މޮސްކޯއިން ފުޅާ ދާއިރާއެއްގައި ޔޫކްރެއިންއަށް އަރާ ހަނގުރާމަ ފެށި ފަހުން ޔޫކްރެއިނުން ރަޝިއާއަށް އަރާ ހޯދި އެންމެ ބޮޑު ކާމިޔާބު ކަމަށް ރިޕޯޓްތައް ބުނެއެވެ.

ރަޝިއާ އަށް އަރާ ޔޫކްރެއިންގެ ސިފައިން ކުރިއެރުންތައް ހޯދި ނަމަވެސް ކީވްއިން ބުނެފައިވަނީ އެމީހުން "ރަޝިއާގެ ސަރަޙައްދު ހިފުމަކަށް" ޝައުޤުވެރިކަމެއް ނެތް ކަމަށެވެ.

ޔޫކްރެއިންގެ ސަލާމަތީ އޮފިޝަލުން ކުރިން ބުނެފައިވަނީ ޔޫކްރެއިން ގެ މަގްސަދަކީ ރަޝިއާ އަށް އެ ގައުމުގެ ބޯޑަރު ހިމާޔަތް ނުކުރެވޭކަން ދެއްކުމާއެކު، ދެވުނު އެންމެ ބޮޑު ގެއްލުމެއް ރަޝިއާ އަށް ދިނުން ކަމަށެވެ.

ޔޫކްރެއިން އިން މިހާރު ބުނަނީ، "އިންސާފުވެރި ސުލްޙައަކަށް" މޮސްކޯއަށް އެއްބަސް ވެވޭނަމަ ހިފާފައިވާ ބިންތަކުން ޔޫކްރެއިން ސިފައިން ވަގުތުން ފައިބާނެ ކަމަށެވެ.

ރަޝިއާ އާއި އަޅާ ބަލާއިރު ހަތިޔާރުގެ ގޮތުންނާއި އިންސާނީ ވަސީލަތުގެ ގޮތުން ބަލިކަށި ކަމަށް ބެލިފައިވާ ޔޫކްރެއިން ސިފައިން ރަޝިއާ އަށް އެރުމުގައި، އިނގިރޭސިވިލާތުން ހަދިޔާކޮށްފައިވާ ޓޭންކުތައް ބޭނުންކޮށްފައިވާކަން ޔޫކޭގެ މަސްދަރަކުން ބީބީސީއަށް ކަށަވަރުކޮށްދީފައިވެއެވެ.

ޔޫކްރެއިންއިން ބޭނުންކޮށްފައިވަނީ ކޮން ބާވަތެއްގެ ޚާއްޞަ ހަތިޔާރުތަކެއްކަން އިނގިރޭސި ވިލާތުގެ ދިފާއީ ވުޒާރާއިން ރަސްމީކޮށް ބުނެފައި ނުވި ނަމަވެސް، "ރަޝިއާގެ ޣައިރު ޤާނޫނީ ހަމަލާތަކާ ދެކޮޅަށް އަމިއްލަ ދިފާއުގައި" އިނގިރޭސިވިލާތުން ފޯރުކޮށްދީފައިވާ ހަތިޔާރުތައް ބޭނުންކުރުމުގެ "ފުރިހަމަ ޙައްޤު" ޔޫކްރެއިންއަށް އޮތްކަން އިނގިރޭސިވިލާތުން ވަނީ ބުނެފައެވެ.

ޔުކްރެއިންއަށް ޒަމާނީ ހަނގުރާމަމަތީ ޓޭންކުތައް ފޯރުކޮށްދިން ފުރަތަމަ ޤައުމުތަކުގެ ތެރޭގައި އިނގިރޭސިވިލާތް ހިމެނެއެވެ. އެގޮތުން ފާއިތުވި އަހަރު 14 ޗެލެންޖަރ 2 ޓޭންކު ހަދިޔާކޮށްފައިވެއެވެ. ނަމަވެސް އެއީ ޔުކްރެއިންގެ އަމިއްލަ ސަރަޙައްދު އަނބުރާ ހޯދުމަށް ދޭ ހަމަލާތަކަށް ފޯރުކޮށްދިން ހަތިޔާރު ކަމަށްވެސް ބުނެފައިވެއެވެ.