ނ މަނަދޫ ނައީމާ މޫސާގެ މަރުގެ މައްސަލައިގައި ދައުވާލިބޭ އަހުޒަމް އަބްދުލް ޝަކޫރުވެސް ދައުވާއަށް އިންކާރުކޮށްފިއެވެ.
މި މައްސަލައިގައި ދައުވާ އުފުލާފައިވަނީ އަހުޒަމް އަބްދުލްޝަކޫރާއި ހަސަން ފަވާޒު އަދި އަބްދުލްވާހިދު ރިފާސްގެ މައްޗަށެވެ.
މި މައްސަލަ ކުރިއަށް ގެންދަނީ ދައުވާލިބޭ 3 މީހުންގެ ބައި ވަކިވަކިންނެވެ. އެގޮތުން ބުރާސްފަތި ދުވަހުގެ އަޑުއެހުމުގައި ރިފާސްގެ މައްޗަށްވެސް ދައުވާ އިއްވާފައިވާއިރު، އޭނާ ވަނީ ދައުވާއަށް ޖަވާބުދާރީވުމަށް އިތުރު ވަގުތަށް އެދިފައެވެ.
އޭގެ އިތުރުން، ހަސަން ފަވާޒް ވަނީ ދައުވާއަށް އިންކާރު ކޮށްފައެވެ.
ދެން ކުރިއަށް ގެންދިޔައީ އަހުޒަމްގެ ބައެވެ. އޭނާގެ މައްޗަށްވެސް 3 ދައުވާއެއް އުފުލާފައިވާއިރު، އޭނާ ވަނީ ދައުވާއަށް އިންކާރު ކޮށްފައެވެ.
ދައުވާއަށް އިންކާރު ކުރާ ސަބަބުތައް ދެން އޮންނަ އަޑުއެހުމެއްގައި ތަފްސީލީ ގޮތެއްގައި ބަޔާން ކުރައްވާނެކަމަށް އޭނާގެ ވަކީލު ވިދާޅުވިއެވެ.
ނައީމާ މޫސާ މަރާލުމަށް ބޭނުންކުރިކަމަށް ޝައްކު ކުރެވޭ ތޫނު 2 ހަތިޔާރާއި ހަމަލާ ދިން ވަގުތު އެކަމުގައި ބައިވެރިވި މީހުން ލައިގެންތިބި އަންނައުނު ފެނިފައިވާ ކަމަށް ފުލުހުން ވަނީ ބުނެފައެވެ. ފުލުހުން އެ ތަކެތި ނަގާފައި ވަނީ ވަޅުގަނޑެއް ކޮނެ އެތަކެތި އަޅައި، އަންދާލަން މަސައްކަތް ކުރުމަށްފަހު ފަސްއަޅައި ފޮރުވާފައިވަނިކޮށެވެ.
މި މައްސަލައާ ގުޅިގެން ނައީމާގެ ގޭ ކައިރީގައި އުޅުނު ބައެއް މީހުންގެ ޑީއެންއޭ ސާމްޕަލް ވެސް ވަނީ ނަގާފަ އެވެ. މީގެ އިތުރުން ނައީމާ ދިރިއުޅޭ ގެއަށް އޭނާ ހޯދުމަށް ދިޔަ ބައެއް މީހުންގެ ހަށިގަނޑުގެ ޑީއެންއޭ ސާމްޕަލް ވެސް ނަގާފައިވެއެވެ.
