ސިޔާސީ ބޭނުމަށް "އިންޑިއާ އައުޓް" ކެމްޕޭނު ފަދަ ސަކަރާތް ޖެހުމުން ފޮރިން އިންވެސްޓްމަންޓެއް ނުލިބޭނެ: މައުރޫފް
14 އޯގަސްޓު 2024 | ބުދަ 05:26ސިޔާސީ ސަބަބުތަކަށްޓަކައި ފޮރިން އިންވެސްޓަރުންވެސް ބިރު ގަންނާނެފަދަ ގޮތްތަކަށް އަމަލު ކުރަމުންދާ މަންޒަރު ފެނޭ
ކެންދޫ ދާއިރާގެ މެންބަރު މައުރޫފް ޒާކިރު
ސިޔާސީ ސަބަބުތަކަށްޓަކައި "އިންޑިއާ އައުޓް" ކެމްޕޭނު ފަދަ ސަކަރާތް ޖެހުމުން ފޮރިން އިންވެސްޓްމަންޓެއް ނުލިބޭނެކަމަށް ކެންދޫ ދާއިރާގެ މެމްބަރު މައުރޫފު ޒާކިރު ވިދާޅުވެއްޖެއެވެ.
ސަރުކާރުގެ ފަރާތުން ހުށަހަޅާފައިވާ ފޮރިން އިންވެސްޓްމަންޓް ބިލާ ގުޅޭގޮތުން ބުދަ ދުވަހުގެ ޖަލްސާގައި ވާހަކަ ދައްކަވަމުން މައުރޫފު ވިދާޅުވީ، މިއީ 19 ވަނަ މަޖިލީހުގައި އެމްޑިޕީން ހުށަހެޅި ބިލެއް ކަމަށާއި، މިހާރު ބިލު އަލުން ހުށަހެޅިފައި މިވަނީ ކުދިކުދި ބަދަލުތަކާއެކު ކަމަށެވެ.
މައުރޫފު ވިދާޅުވީ، ސިޔާސީ ސަބަބުތަކަށްޓަކައި ފޮރިން އިންވެސްޓަރުންވެސް ބިރު ގަންނާނެފަދަ ގޮތްތަކަށް އަމަލު ކުރަމުންދާ މަންޒަރު މިއަދު ފެންނަމުންދާ ކަމަށެވެ.
އޭގެ ސަބަބުން ފޮރިން އިންވެސްޓްމަންޓުތަކަށް ބޮޑެތި ހުރަސްތައް އެޅިގެންދާކަން މައުރޫފު ފާހަގަ ކުރެއްވިއެވެ.
މައުރޫފު ވަނީ ޖީއެމްއާރްގެ މައްސަލައާއި، އިންޑިއާ އައުޓް ކެމްޕޭނު ފަދަ ކަންކަމަށް އަލިއަޅުވާލައްވާފައެވެ. އެގޮތުން އިންޑިއާ އައުޓު ނަމުގައި ހިންގި މުޒާހަރާއަށް އަލިއަޅުވާލައްވާ މައުރޫފް ވިދާޅުވީ، އެއީ ސިޔާސީ ބޭނުމަށް ރައްޔިތުންނަށް އޮޅުވާލުން ކަމަށެވެ.
އޭގެ ބަދަލުގައި އިހުލާސްތެރިކަމާއެކު ބޭރުގެ ވިޔަފާރިތަކަށް ފުރުސަތު ހުޅުވައި، ރަނގަޅަށް މޮނިޓަރ ކުރެވޭނެ ނިޒާމެއް ޤާއިމު ކުރަންޖެހޭކަން އޭނާ ފާހަގަ ކުރެއްވިއެވެ.
މި ބިލަށް ވާހަކަ ދައްކަވަމުން އެމްޑީޕީގެ ބައެއް އިތުރު މެމްބަރުންވެސް ވަނީ އެކަން ފާހަގަ ކުރައްވާފައެވެ.
