ވުލްވްސް އަށް ކުޅެމުން އައި ޕޯޗުގަލްގެ ޒުވާން ކުޅުންތެރިޔާ، ފެޑްރޯ ނެޓޯގެ ސޮއި ޗެލްސީން ހޯދައިފި އެވެ.
އުމުރުން 24 އަހަރުގެ ކުޅުންތެރިޔާ ޗެލްސީ އަށް ބަދަލުވީ ހަ އަހަރު ދުވަހުގެ ދިގު މުއްދަތެއްގެ އެއްބަސްވުމެއްގެ ދަށުންނެވެ. ޗެލްސީ އާއެކު އޭނާ ސޮއި ކޮށްފައިވާ އެއްބަސްވުމުގެ މުއްދަތު ހަމަވާނީ 2030 ވަނަ އަހަރުގެ ޖޫން މަހުގެ ނިޔަލަށެވެ. ނެޓޯ ހޯދުމަށް ޗެލްސީން ވަނީ ގާތް ގަނޑަކަށް 63 މިލިއަން ޔޫރޯ ޚަރަދު ކޮށްފަ އެވެ.
ޗެލްސީން ނެޓޯގެ ސޮއި ހޯދާފައިވާއިރު، އެ ކުލަބުގެ ކުޅުންތެރިޔެއްގެ ގޮތުގައި ރަސްމީކޮށް އޭނާ ވަނީ ދައްކާލައިފަ އެވެ. ޗެލްސީ އާއެކު ނެޓޯ ސޮއި ކޮށްފައިވާ އެއްބަސްވުމުގައި ވާގޮތުން، މިހާރުގެ އެއްބަސްވުން ހަމަވުމުން އިތުރު މުއްދަތަކަށް އެއްބަސްވުން އައު ކުރުމުގެ ފުރުސަތު ވެސް އޮންނާނެ އެވެ.
ބްރަގާ އިން ސީނިއާ ކެރިއަރު ފެށި ނެޓޯ ވުލްވްސް އަށް ބަދަލުވީ 2019 ވަނަ އަހަރު އެވެ. އޭނާ ވަނީ އެ ކުލަބަށް ކުޅެދިން 135 މެޗުގައި 14 ލަނޑު ޖަހައިފަ އެވެ. މީގެ އިތުރުން 2020 ވަނަ އަހަރު އޭނާ އަށް ވަނީ ޕޯޗުގަލްގެ ޤައުމީ ޓީމުން ވެސް ޖާގަ ލިބިފަ އެވެ. މިހާތަނަށް ޤައުމީ ޓީމަށް ކުޅެދިން 10 މެޗުގައި އޭނާ ވަނީ އެއް ލަނޑު ޖަހައިފަ އެވެ. ޕޯޗުގަލް އިން މިއަހަރު ޖަރުމަނުގައި ކުރިއަށް ދިޔަ ޔޫރޯ އަށް އެކުލަވާލި ޓީމުގައި ވެސް އޭނާ ވަނީ ހިމެނިފަ އެވެ.
