ބާސެލޯނާ އިން ބަދަލުތަކެއް ފެންނަން ފްލިކް ބޭނުންވޭ

ސްޕެއިންގެ ބާސެލޯނާ އިން ބަދަލުތަކެއް ފެންނަން ބޭނުންވާ ކަމަށް އެ ޓީމަށް އިރުޝާދު ދެމުން އަންނަ ޖަރުމަނުގެ ހަންސީ ފްލިކް ބުނެފި އެވެ.

ބާސެލޯނާގެ ކޯޗުކަމާ ފްލިކް ހަވާލުވީ މިއަހަރުގެ މެއި މަހުގެ ތެރޭގަ އެވެ. އެއީ އޭނާގެ ކުރިން އެ މަގާމުގައި ހުރި ބާސެލޯނާގެ ލެޖެންޑް، ޒަވީ ހެނާންޑޭޒް ކޯޗުކަމުގެ މަގާމުން ވަކި ކުރަން ކުލަބުން ނިންމުމުންނެވެ. ބާސެލޯނާއާ ހަވާލުވެ، ފްލިކް އަންނަނީ ކުރިއަށް އޮތް ސީޒަނަށް ތައްޔާރުވުމުގެ މަސައްކަތްތައް ކުރަމުންނެވެ.

ބާސެލޯނާ އިން އައު ސީޒަނަށް ވަމުން އަންނަ ތައްޔާރީތަކާ ގުޅޭ ގޮތުން ވާހަކަ ދައްކަމުން ފްލިކް ބުނީ، ކުޅުންތެރިންގެ ފެންވަރާއި، ކުޅުމުގެ ފެންވަރު ވެސް ރަނގަޅު ވަމުން އަންނަކަން ފާހަގަވާ ކަމަށެވެ. އަދި ބާސެލޯނާގެ ފަރިތަކުރުންތަކުގައި ކޮންމެ ކުޅުންތެރިޔަކު ވެސް މަސައްކަތް ކުރަނީ ގަޔާވެގެން، އެންމެ ރަނގަޅަށް ކަމަށް އޭނާ ބުންޏެވެ.

އެހެން ނަމަވެސް، އަދި ބާސެލޯނާ އިން ބަދަލުތަކެއް ފެންނަން ބޭނުންވާ ކަމުގައި ވެސް އޭނާ ބުންޏެވެ. އެގޮތުން ކޮންމެ ކުޅުންތެރިޔަކު ވެސް ވާން ޖެހޭނީ އެ ކުޅުންތެރިޔަކާ ހަވާލު ކުރެވޭ ޒިންމާ ނުވަތަ ރޯލު، އެންމެ ފުރިހަމަ އަށް އަދާ ކުރާނެ ކުޅުންތެރިޔަަކަށް ކަމަށް އޭނާ ބުންޏެވެ. އަބަދު ވެސް އެންމެ ފަހު ވަގުތާ ޖެހެން ދެން މަސައްކަތްކޮށް، ކާމިޔާބު ހޯދުމުގެ ފުރިހަމަ ރޫޙެއް އޮންނަން ޖެހޭ ކަމަށް ވެސް ފްލިކް ޤަބޫލު ކުރެ އެވެ.

ފްލިކްގެ އިރުޝާދުގެ ދަށުން ބާސެލޯނާ އިން ދެން ކުޅޭނީ ޖޯން ގެމްބާ ޓްރޮފީ މެޗެވެ. އެ މެޗު އޮންނާނީ ހޯމަ ދުވަހުގެ ރޭ ރާއްޖެ ގަޑިން 11 ޖަހާއިރު އެވެ.