އިންޑިއާގެ އެކްސްޓަރނަލް އެފެއާޒް މިނިސްޓަރު ސުބްރަމަނިއަމް ޖައިޝަންކަރު ރަސްމީ ދަތުރުފުޅެއްގައި ހުކުރު ދުވަހު ރާއްޖެ ވަޑައިގެންފި އެވެ.
ޖައިޝަންކަރު ރާއްޖެ ވަޑައިގަތުމުން ވެލާނާ އިންޓަނޭޝަނަލް އެއާޕޯޓުން އެ މަނިކުފާނަށް ރަތްދޫލައިގެ މަރުހަބާއެއް ވަނީ ދަންނަވާފައެވެ. ސަރުކާރުގެ ފަރާތުން އެ މަނިކުފާނަށް މަރުހަބާ ދެންނެވީ ރާއްޖޭގެ ފޮރިންގ މިނިސްޓަރު މޫސާ ޒަމީރެވެ.
މިއީ ޖައިޝަންކަރު ރާއްޖެ ވަޑައިގެންނެވި ހަތަރު ވަނަ ފަހަރުކަމަށް ވާއިރު މިއީ ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގެންނެވި ފަހުން އިންޑިއާގެ ސަރުކާރުގެ އިސް ވަޒީރަކު ރާއްޖެއަށް މި ގޮތަށް ވަޑައިގަންނަވާ ފުރަތަމަ ފަހަރެވެ.
ޖައިޝަންކަރު ރާއްޖެ އަށް ކުރައްވާ ދަތުރުފުޅަކީ ތިން ދުވަހަށް ރާއްޖެއަށް ކުރައްވާ ރަސްމީ ދަތުރުފުޅެކެވެ. އަދި ދަތުރުގައި ރައީސް މުއިއްޒާއި ފޮރިންގ މިނިސްޓަރު މޫސާ ޒަމީރާ އެކު މަޝްވަރާތައް ކުރައްވަން ހަމަޖެހިފައިވާ ކަމަށް ސަރުކާރުން ވަނީ ބުނެފައެވެ.
މީގެ އިތުރުން މި ދަތުރުފުޅުގެ ތެރެއިން އިންޑިއާގެ ލޯނު އެހީގައި ކުރިއަށް ގެންދާ މަަސައްކަތްތައް ބައްލަވާލެއްވުމަށް ވެސް ވަނީ ހަމަޖެހިފައެވެ. މި ދަތުރު ނިންމަވާލެއްވުމަށް ފަހު އޭނާ އެނބުރި އިންޑިއާއަށް ފުރާވަޑައިގަންނަވާނީ އައްޑޫއިންނެވެ.
