ޖަރުމަނުގެ އާރްބީ ލައިޕްޒިގަށް ކުޅެމުން އައި ސްޕެއިންގެ އެޓޭކިން މިޑްފީލްޑަރު ޑެނީ އޮލްމޯ ހޯދުމުގެ ޑީލް ބާސެލޯނާ އިން ކާމިޔާބު ކޮށްފި އެވެ.

އުމުރުން 26 އަހަރުގެ ކުޅުންތެރިޔާ ލައިޕްޒިގަށް ބަދަލުވީ 2020 ވަނަ އަހަރު އެވެ. އެ ކުލަބާ އެކު އޭނާ ސޮއި ކޮށްފައި އޮތީ ހަތަރު އަހަރު ދުވަހުގެ އެއްބަސްވުމެއްގަ އެވެ. މިއަހަރަށް އެ އެއްްބަސްވުމުގެ މުއްދަތު ހަމަވާން އޮތްއިރު، ލައިޕްޒިގުން އޭނާގެ އެއްބަސްވުން އައު ކުރުމަށް މަސައްކަތް ކުރި އެވެ. އެހެން ނަމަވެސް، ބާސެލޯނާ އިން އޭނާ ހޯދުމަށް ކުރި މަސައްކަތުގައި އޮލްމޯ ވަނީ އެ ކުލަބަށް ބަދަލުވާން އެއްބަސްވެފަ އެވެ.

މީޑިއާ ތަކުގައި ބުނެފައިވާ ގޮތުން ބާސެލޯނާ އިން އޮލްމޯ އަށް ހުށަހަޅަނީ ހަ އަހަރު ދުވަހުގެ އެއްބަސްވުމެކެވެ. އެހެންކަމުން އެ ކުލަބާ އެކު އޭނާ ސޮއި ކުރާ އެއްބަސްވުމުގެ މުއްދަތު ހަމަވާނީ 2030 ވަނަ އަހަރުގެ ޖޫން މަހުގެ ނިޔަލަށެވެ. އޮލްމޯ ހޯދުމުގެ ޑީލްގައި ބާސެލޯނާގެ ފަރާތުން ޑައިރެކްޓަރު ޑެކީ މުހިންމު ދައުރެއް އަދާ ކޮށްފައިވާ ކަމަށް ސްޕެއިންގެ މީޑިއާ ތަކުގައި ވަނީ ބުނެފަ އެވެ.

ބާސެލޯނާ އަށް ބަދަލުވުމުގެ ކުރިން ފުރިހަމަ ކުރަން ޖެހޭ މެޑިކަލްގެ ކަންކަން ފުރިހަމަ ކުރުމަށް، އޮލްމޯ އާއި އޭނާގެ ބައްޕަ އަދި އެޖެންޓުން މިހާރު ހުރީ ބާސެލޯނާގައި ކަމަށް ވެސް ރިޕޯޓުތައް ބުނެ އެވެ. އެހެންކަމުން ކުރިއަށް އޮތް ދުވަސްތަކުގެ ތެރޭގައި ބާސެލޯނާ އާއެކު އޭނާ އެއްބަސްވުމުގައި ސޮއި ކުރާނެ އެވެ.

އޮލްމޯ ވަނީ ލައިޕްޒިގަށް ކުޅެދިން 148 މެޗުގައި 29 ލަނޑު ޖަހައިފަ އެވެ. ސްޕެއިންގެ ޤައުމީ ޓީމުގައި ވެސް ކުޅެމުން އަންނަ އޮލްމޯ ވަނީ، މިދިޔަ މަހު ޖަރުމަނުގައި ނިމުނު ޔޫރޯ ފުޓުބޯޅަ މުބާރާތް ސްޕެއިން އާއެކު ކާމިޔާބު ކޮށްފަ އެވެ. އެ މުބާރާތުގައި އޮލްމޯ ވަނީ މޮޅު ކުޅުމެއް ވެސް ދައްކައިފަ އެވެ. ސްޕެއިންގެ ޤައުމީ ޓީމަށް ކުޅެދިން 39 މެޗުގައި އޭނާ ވަނީ 11 ލަނޑު ޖަހައިފަ އެވެ.