އައްޑޫ އިކުއިޓޯރިއަލް ހޮސްޕިޓަލް ޓަރޝަރީ ފެންވަރަށް ހެދުމުގެ މަސައްކަތް އަންނަ އަހަރު ކުރީކޮޅު ފެށޭނެ - މިނިސްޓަރ
އައްޑޫގެ ހޮސްޕިޓަލްގެ މަސައްކަތަކީ މި ސަރުކާރުން އެންމެ އިސްކަން ދޭނެ އެއްކަންތައް ކަަމަށް ވިދާޅުވި
އައްޑޫ އިކުއިޓޯރިއަލް ހޮސްޕިޓަލް
އައްޑޫ އިކުއިޓޯރިއަލް ހޮސްޕިޓަލް ޓަރޝަރީ ފެންވަރުގެ ހޮސްޕިޓަލަށް ހަދާނެކަމަށާއި އެ މަސައްކަތް އަންނަ އަހަރު ކުރީކޮޅު ފެށޭނެ ކަމަށް ހެލްތް މިނިސްޓަރ ޑރ.އަބްދުﷲ ހަލީލް ވިދާޅުވެއްޖެއެވެ.
ހިތަދޫ ދެކުނު ދާއިރާގެ މެމްބަރު އިބްރާޙިމް ނާޒިލްވަނީ ޕްރޮޖެކްޓްތަކުގެ މަސައްކަތް ކުރިއަށް ގެންދެވޭނެ ވަގުތެއް މިނިސްޓަރަކަށް އެނގިވަޑައިނުގަންނަވާތީ ފާޑު ވިދާޅުވެފައެވެ. އަދި ފާމަސީތަކުގައި ބޭސް ނެތްކަމަށް ވަޒީރު ފާހަގަކުރައްވާއިރު ކިތައް ފާމަސީގައި ބޭސް ނެތްކަން އެނގިވަޑައިގެންފައިވޭތޯ އޭނާ ސުވާލު ކުރެއްވިއެވެ. މީގެ އިތުރުން އައްޑޫގެ ޓަރޝަރީ ހޮސްޕިޓަލްގެ މަސައްކަތް އެއްވެސް ގޮތެއްގައި ކުރިއަށް ނުދާ ކަމަށާއި އެ މަސައްކަތް ފަށާނީ ކޮން އިރަކުތޯ އާއި ނިމޭނީ ކޮންއިރަކުތޯ އޭނާ ވަނީ ސުވާލުކުރައްވާފައެވެ.
ޖަވާބުގައި ފާމަސީތަކުގައި ބޭސްހުރި މިންވަރު އެނގިވަޑައިނުގަންނަވާ ކަމަށް މިނިސްޓަރ ވަނީ ވިދާޅުވެފައެވެ. ސަބަބަކީ ފާމަސީތައް ހިންގަމުންދަނީ ސީދާ މިނިސްޓްރީންކަމަށް ނުވުން ކަމަށް ވެސް އޭނާ ވަނީ ވިދާޅުވެފައެވެ. އަދި ނިމިދިޔަ ސަރުކާރުން ދައުލަތަށް ނުކަތާވަރުގެ ބޮޑެތި އިމާރާތް ދެއްކި ނަމަވެސް އެ ކަން ކުރެވޭނެ މަގެއް ނެތް ކަމަށާއި ދައުލަތުގައި އެވަރަށް ފައިސާ ނެތް ކަމަށް މިނިސްޓަރ ވަނީ ވިދާޅުވެފައެވެ. އެ މަސައްކަތް ކުރާ ނަމަ ކުރަން ޖެހެނީ އެހެންކަމެއް ދޫކޮށްލުމަށް ފަހު ކޮމްޕްރޮމައިޒްކޮށްގެން ކަަމަށް އޭނާ ވިދާޅުވިއެވެ.
އައްޑޫގެ ހޮސްޕިޓަލްގެ މަސައްކަތަކީ މި ސަރުކާރުން އެންމެ އިސްކަން ދޭނެ އެއްކަންތައް ކަަމަށް ވަޒީރު ވިދާޅުވިއެވެ. އެ ކުރެހުންތައް ހުރީ ދޭން ޖެހޭ ޚިދުމަތްތަކާއި ނުބައްދަލު މިންވަރަކަށް ކަމަށް މިނިސްޓަރ ވިދާޅުވިއެވެ. ޑރ.ހަލީލް ވަނީ އައްޑޫ އިކުއިޓޯރިއަލް ހޮސްޕިޓަލްގެ މަސައްކަތް މި ސަރުކާރުން ޓަރޝަރީ ހޮސްޕިޓަލެއްގެ ފެންވަރުގައި ނިންމާނެކަމުގެ ޔަޤީންކަން ދޭ ކަމަށް ވިދާޅުވެފައެވެ. އެ ހޮސްޕިޓަލްގެ އިމާރާތް ރީޑިޒައިންކޮށް އިމާރާތްކުރާނެ ގޮތުގެ ފަންޑިން މި ސަރުކާރުން ހޯދަމުންދާ ކަމަށް އޭނާ ވަނީ ވިދާޅުވެފައެވެ.
ސިއްހީ ދާއިރާގެ ތަފާތު އެކި ޕްރޮޖެކްޓްތަކާއި މެދު އެހެން މެމްބަރުން ވެސް ވަނީ ސުވާލުކުރައްވާފައެވެ. އެގޮތުން ސިއްހީ އިމާރާތްތައް މަރާމާތުކުރުމާއި، ޚިދުމަތުގެ ފެންވަރު ދަށްވުން އަދި ބައެއް ޚިދުމަތްތައް ނުލިބުމާއި މެދު މެމްބަރުން ވަނީ ސުވާލުކޮށްފައެވެ. އެ ވާހަކަތަކަށް ޖަވާބުދެއްވަމުން މިނިސްޓަރ ވަނީ ނިމިދިޔަ ސަރުކާރަށް ފާޑު ވިދާޅުވެފައެވެ.
ސިއްޙީ ދާއިރާގައި ހުރި ގިނަ މައްސަލަތަކާއި މެދު ކުރި ސުވާލުތަކަށް ރަނގަޅަށް ޖަވާބު ނުދެވި މިނިސްޓަރ ވަނީ ނިމިދިޔަ ސަރުކާރު ކުށްވެރިކުރައްވާ ވާހަކަދައްކަވާފައެވެ.
