ގާޑިއޯލާގެ ޕްލޭންގައި އަލްވަރޭޒް ހިމެނޭ

މެންޗެސްޓަރ ސިޓީ އަށް ކުޅެމުން އަންނަ އާޖެންޓީނާގެ ފޯވާޑް، ހޫލިއަން އަލްވަރޭޒް އަކީ ކުރިއަށް އޮތް ސީޒަނަށް އޭނާ ގެން ގުޅޭ ޕްލޭންގައި ހިމެނޭ ކުޅުންތެރިޔެއް ކަމަށް، ސިޓީގެ ކޯޗު ޕެޕް ގާޑިއޯލާ ބުނެފި އެވެ.

ގާޑިއޯލާ މިފަދައިން ވާހަކަ ދައްކާފައި ވަނީ އަލްވަރޭޒް ހޯދުމަށް ބައެއް ކުލަބުތަކުން ޝައުޤުވެރިކަން ފާޅު ކުރަމުން ދަނިކޮށެވެ. ބައިނަލްއަޤުވާމީ މީޑިއާ ތަކުގައި ބުނެފައިވާ ގޮތުން ސްޕެއިންގެ އެތުލެޓިކޯ މެޑްރިޑުން އަންނަނީ އަލްވަރޭޒް އާއެކު މަޝްވަރާތައް ކުރިއަށް ގެންދަމުންނެވެ.

އެކަމާ ގުޅޭ ގޮތުން ވާހަކަ ދައްކަމުން ގާޑިއޯލާ ބުނީ، އެތުލެޓިކޯ އިން އަލްވަރޭޒް ހޯދުމުގެ ޝައުޤުވެރިކަން ފާޅުކޮށް، ވާހަކަ ދައްކަމުން އަންނަ ކަމަށް ދެކެވޭ ވާހަކަތަކާ ގުޅިގެން އެއްޗެއް ބުނަން އޭނާ ބޭނުން ނުވާ ކަމަށެވެ. އެގޮތުން އަލްވަރޭޒް އަކީ ސިޓީގެ ކުޅުންތެރިޔެއް ކަމަށާއި، ދާދި އަވަހަށް އަލްވަރޭޒް ޓީމާ ގުޅޭނެ ކަމަށް ވެސް ގާޑިއޯލާ ބުންޏެވެ.

މީގެ އިތުރުން ގާޑިއޯލާ ބުނީ، އަލްވަރޭޒް ޓީމާ ގުޅުމުން އޭނާ އަށް ފުރިހަމަ މަރުޙަބާ އެއް ކިޔާނެ ކަމަށެވެ. އަަދި އެކުގައި މަސައްކަތް ކުރަން ފަށާނެ ކަމަށާއި، ކުރިއަށް އޮތް ސީޒަނަށް ފުރިހަމަ އަަށް ތައްޔާރުވާން ބޭނުންވާ ކަމަށް ވެސް ގާޑިއޯލާ ބުންޏެވެ. އަލްވަރޭޒް އަކީ ސިޓީގެ ކުޅުންތެރިޔެއްކަން ފާހަގަކޮށް ގާޑިއޯލާ ބުނީ، އޭނާގެ ޕްލޭންގައި އަލްވަރޭޒް ހިމެނޭ ކަމަށެވެ.

އަލްވަރޭޒް ހުރީ އާޖެންޓީނާ އާއެކު އޮލިމްޕިކްސްގައި ވާދަކުރުމަށް ގޮހެވެ. އޮލިމްޕިކްސްގައި އާޖެންޓީނާ ވަނީ ފްރާންސް އަތުން ބަލިވެ ކަޓައިފަ އެވެ. އޮލިމްޕިކްސްގެ ކުރިން އަލްވަރޭޒް ބުނެފައި ވަނީ، އޮލިމްޕިކްސް އަށް ފަހު އޭނާގެ މުސްތަޤުބަލާ މެދު ގޮތެއް ނިންމާނެ ކަމަށެވެ.

އުމުރުން 24 އަހަރުގެ ކުޅުންތެރިޔާ ސިޓީ އަށް ބަދަލުވީ 2022 ވަނަ އަހަރު އެވެ. އެ ކުލަބާއެކު އޭނާ ސޮއި ކުރީ ފަސް އަހަރާ، ބައިގެ އެއްބަސްވުމެއްގަ އެވެ. އެ އެއްބަސްވުމުގެ މުއްދަތު ހަމަވާނީ 2027 ވަނަ އަހަރު އެވެ. އެހެން ނަމަވެސް، ސިޓީން ވަނީ އަލްވަރޭޒް އަށް އައު އެއްބަސްވުމެއް ހުށަހަޅައި، ދިގު މުއްދަތަކަށް އޭނާ އެ ކުލަބުގައި ބަހައްޓަން މަސައްކަތް ކޮށްފަ އެވެ. މީޑިއާ ތަކުގައި ބުނެފައިވާ ގޮތުން އެ މަސައްކަތް މިހާތަނަށް ސިޓީ އަށް ކާމިޔާބެއް ނުވެ އެވެ.