މަޖިލީހުގެ ބޮޑު އަގުލަބިއްޔަތެއް މި ސަރުކާރަށް އޮތުމުން ޖަވާބުދާރީ ކުރެވޭނެ ގޮތެއް ނެތް: ހަސަން ލަތީފް
ޝަރީއަތުން މައުލޫމާތު ހޯދާ ހިސާބަށް ދިއުމަކީ ބަލައިގަނެވޭނެ ކަމެއް ނޫން، ފަރުވާއެއް ހޯދަންޖެހޭ
ފަލަސުރުހީ ޕްރޮގްރާމްގައި ދަ ޑިމޮކްރެޓްސް ރައީސް ހަސަން ލަތީފް ވާހަކަދައްކަވަނީ
ރައްޔިތުންގެ މަޖިލީހުގެ ބޮޑު އަގުލަބިއްޔަތެއް ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސަރުކާރަށް އޮތުމުން މި ސަރުކާރު ޖަވާބުދާރީ ކުރެވޭނެ ގޮތެއް ނެތް ކަމަށް ދަ ޑިމޮކްރެޓްސް ރައީސް ހަސަން ލަތީފް ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި ހަސަން ލަތީފް ވަނީ ރާއްޖޭގެ އިގްތިސާދީ ހާލަތު ރަނގަޅަށް ރައްޔިތުންނަށް އޮޅުން ފިލުވާ ނުދޭ މައްސަލައާއި، ބައެއް މައުލޫމާތުތައް ނުދީ ހިފައްޓާ މައްސަލަ އަދި ސަރުކާރުން ސިއްރު ބައެއް ކަންކުރާތީ އެކަމަށް ފާޑު ވިދާޅުވެ ވާހަކަ ދައްކަވާފައެވެ.
ހަސަން ލަތީފް ވިދާޅުވީ ޝަރީއަތުން މައުލޫމާތު ހޯދާ ހިސާބަށް ދިއުމަކީ ބަލައިގަނެވޭނެ ކަމެއް ނޫން ކަމަށާއި، މިކަމަށް ފަރުވާއެއް ރައްޔިތުން ހޯދަންޖެހޭ ކަމަށެވެ. ހަސަން ލަތީފް ވިދާޅުވީ މިހައްގުތައް ދިވެހި ރައްޔިތުންނަށް ހޯދާދީފައިވަނީ ބޮޑެތި ގުރުބާނީތަކެއް ވެގެން ކަމަށާއި، މި ހައްގުތައް ހޯދުމަށް ކުރި މަސައްކަތްތައް މިއަދު ޒުވާނުންނަށް ނޭނގުނު ނަމަވެސް ލިބިފައިވާ ހައްގުތައް ގެއްލުނަ ނުދިނުމަށް މަސައްކަތް ކުރަންޖެހޭ ކަމަށެވެ. ހަސަން ލަތީފް ވިދާޅުވީ މައުލޫމާތު ނުދީ ހިފެހެއްޓުމަކީ އިންޓަނޭޝަނަލް ބެސްޓް ޕްރެކްޓިސްއާވެސް ހިލާފު ކަމެއް ކަމަށާއި، މިވާހަކަތައް ދައްކަންޖެހޭ ކަމަށެވެ. މިވާހަކަތައް ނުދައްކާ ރައްޔިތުން މަޑުން ތިބޭ ކަމަށްވާނަމަ އެއިރެއްގައި އޮންނަ ސަރުކާރުން އެކަމުގެ ފައިދާ ނަގާނެ ކަމަށް އޭނާ ވިދާޅުވިއެވެ.
މީގެ އިތުރުން ހަސަން ލަތީފް ވިދާޅުވީ ރައްޔިތުންގެ މަޖިލީހުގެ މެޖޯރިޓީ އޮތީ ސަރުކާރު ހިންގާ މައި ޕާޓީ ޕީއެންސީގެ އަތުގައި ކަމަށާއި، އެއްޕާޓީއަކަށް އެހައި ބޮޑު އަގުލަބިއްޔަތެއް އޮތުމުން ސަރުކާރު ޖަވާބުދާރީ ކުރުވާނެ ގޮތެއް ވެސް ނެތް ކަމަށެވެ.
ރާއްޖޭގެ އިގްތިސާދީ ހާލަތަށް އިޝާރާތް ކުރައްވައި ހަސަން ލަތީފް ވިދާޅުވީ އެއްވެސް ކަމެއް ސިއްރުނުކޮށް ހުރިހާ ކަމެއް ރައްޔިތުންނަށް ސާފުކޮށްދޭން ޖެހޭ ކަމަށެވެ.
ހަސަން ލަތީފް ވިދާޅުވީ ރާއްޖެ ބަގުރޫޓް ވެގެންދާން ބޭނުންނުވާ ކަމަށާއި، ސަރުކާރަށް ފުރިހަމަ އެއްބާރުލުން ދެވޭނީ ވެސް ގައުމުގެ ހާލަތު އެނގުމުން ކަމަށެވެ. ޑިމޮކްރެޓްސްއަކީ ޒިންމާދާރު ކަމާއެކު މަސައްކަތް ކުރާނެ ސިޔާސީ ޕާޓީއެއް ކަމަށް އޭނާ ވިދާޅުވިއެވެ.
