ސެންކޯރު ވިހަވެ ފެތުންތެރިއަކު ހޮސްޕިޓަލްގައި

ފްރާންސްގެ މަޝްހޫރު ސެންކޯރުގައި ފެތި ބެލްޖިއަމްގެ ފެތުންތެރިޔާ ކްލެއާ މިޝޭލް ހޮސްޕިޓަލްގައި އެޑްމިޓްކުރުމުން ބެލްޖިއަމް މުބާރާތުން ވަކިވެއްޖެ އެވެ.

މުބާރާތް ބާއްވާ ޕެރިހުގެ ސެންކޯރަކީ ފަތަން ރައްކާތެރިތަނެއްނޫން ކަމަށް ކުރިން ވެސް ތަޖުރިބާކާރުން ދިޔައީ ބުނަމުންނެވެ. ބެލްޖިއަމްގެ ކްލެއާ ހޮސްޕިޓަލްގައި އެޑްމިޓްކޮށްފައި އޮންނަތާ މިއަދަށް ވަނީ ފަސް ދުވަސްވެފަ އެވެ. އޭނާ ނެތުމުން ފެތުމުގެ ބާކީހުރި ޓީމް އިވެންޓުން ބެލްޖިއަމް ވަނީ ވަކިވެފަ އެވެ. އޭގެ ތެރޭގައި މިއަދު ބާއްވަން އޮތް މިކްސްޑް ޓީމް އިވެންޓްތައް ހިމެނެ އެވެ. ކްލެއާ އެޑްމިޓްކޮށްގެން ހެދި ޓެސްޓްތަކުން އެނގުނީ އޭނާގެ ހަށިގަނޑުން އީ ކޯލީ ކިޔާ ބެކްޓީރިއާއެއް ފެނިފައިވާ ކަމަށެވެ.

ކްލެއާ އެޑްމިޓްކޮށްފައިވާއިރު ފެތުމުގެ ބައެއް އިވެންޓްތައް ވަނީ ކެންސަލްކޮށްފަ އެވެ. އެއީ ސެން ކޯރުގެ ފެނުގެ އެންމެ ފަހުގެ ސާމްޕަލްތަކުން އެ ފެންގަނޑު ރައްކާތެރިނޫން ކަމަށް ދެއްކުމުންނެވެ. މިހެންވެ ކޯރު އަލުން ސާފުކޮށް ޑިސްއިންފެކްޓް ކުރުމަށް ވަނީ ނިންމައިފަ އެވެ. އެއަށްފަހު މާދަމާގެ އިވެންޓްތަކަށް ހުއްދަދޭނެ އެވެ.

ނަމަވެސް މި ކޯރަކީ ތަފާތު އެތައް އުޅަނދެއް ދުއްވާ ތަނަކަށްވެފައި، ފަތާ މީހުންނަށް މި ކޯރު ބޭނުންކުރުން މަނާކޮށްފައިވާތާ 100 އަހަރުވެއްޖެ އެވެ. ފްރާންސްގެ މީޑިއާތަކުން ބުނާ ގޮތުގައި ކޯރުގެ އެންމެ ބޮޑު މައްސަލައަކީ ފެންގަނޑު އިންސާނުން އެރިއުޅެން ކަމުދާ ވަރަށްވުރެ ބޮޑަށް ތަޣައްޔަރުވެފައިވުމެވެ. މިކަން ހައްލުކޮށް އޮލިމްޕިކްސް މިންގަނޑަށް ފެތޭ ފެނަށް މި ކޯރުގެ ފެން ބަދަލުކުރުމުގެ ގޮތުން ޕެރިހުގެ މައި އިދާރާތަކުން ވަނީ އޮލިމްޕިކްސް އަށް ކޯރު ސާފު ކުރުމަށް 1.5 ބިލިއަން ޑޮލަރު ހަރަދުކޮށްފަ އެވެ. މި މަސައްކަތުގައި 49 ލިޓަރުގެ ކުނި ނަގާފައިވެ އެވެ. މިވަރުން ނުވެގެން މިއީ ރައްކާތެރިތަނެއްކަން ދެއްކުމުގެ ގޮތުން މުބާރާތުގެ ދެ ހަފުތާ ކުރިން ޕެރިހުގެ މޭޔަރު އޭން ހިޑާލްގޯ ވަނީ ސްވިމިން ސޫޓްގައި ސެންކޯރަށް އެރިވަޑައިގެންފަ އެވެ. އެއަށްފަހު ވިދާޅުވީ ކޯރުގެ ފެންބަރާބަރު ކަމަށާއި ކުޑަކޮށް ފިނިވުން ނޫން ކަމެއް ފެނުގައި ނެތްކަމަށެވެ.

ނަމަވެސް އަދިވެސް މި ކޯރަކީ އިންސާނުން އެރި އުޅެން އެންމެ އެކަށީގެންވާ ތަނެއް ކަމަށް ތިމާވެއްޓާއި ސިއްހީ މާހިރުން ނުދެކެ އެވެ. އެއީ ދުއްވާ އެއްޗެހީގެ ތެލާއި ދަނޑު ހެއްދުމަށް ބޭނުންކުރާ ތަކެތީގެ ކުނިބުންޏާއި، އިންސާނުންގެ ކުޑަކަމުދާ ތަކެއްޗާއި، ރީތިވުމަށް ބޭނުންކުރާ ކޮސްމެޓިކްސް (ލިޕްސްޓިކާއި އެނޫން ފަދަތަކެތި) އާއި އިސްތަށި ފަދަ ތަކެތީގެ ޖަރާސީމު ކޯރުގައި އެކުލެވޭ ކަމަށްބުނެ އެވެ. މިވާހަކަ މި ގޮތަށް ދައްކައި އުޅެނީ ޖޫން މަހު ކޯރުގެ ފެން ޓެސްޓުކުރިއިރު އެންމެ ބޮޑަށް ފެނިފައިވަނީ މޫނުގައި އުނގުޅާ ބާވަތްތަކުގެ ބެކްޓީރިއާ ކަމުގައިވާތީ އެވެ. މީގެ އިތުރުން މި ކޯރަށް އެރިއުޅުނު ސަލާމަތީ ފަރާތްތަކުގެ ބައެއް މީހުންނަށް އަވަސް އަވަހަށް ބޮޑުކަމުދިއުމާއި އެނޫން ވެސް ސިއްހީ އުނދަގޫތައް ދިމާވެފައިވާތީ އެވެ.