ދަރަނި އަދާކުރުމުގެ ނިޔަތުގައި ދަރަނި ނަގާމީހުންނަށް ދަރަނި ދެއްކޭނެ ގޮތް ﷲ މިންވަރުކޮށްދެއްވާނެ - ހުތުބާ
ޝަހީދުންނަކީ މަތިވެރި ދަރަޖައެއް ލިބިފައިވާ ބަޔަކަށް ވާއިރު އެ މީހުންނަށް ވެސް ދަރަނީގެ ފާފަ ނުފުއްސަވާ
ހަވީރު ގަޑީގައި އާއްމުން މަގުމަތީގައި ހަރަކާތްތެރިވާ މަންޒަރު ފެންނަ ފޮޓޯ އެއް
ދަރަނި އަދާކުރުމުގެ ނިޔަތުގައި ދަރަނި ނަގާމީހުންނަށް ދަރަނި ދެއްކޭނެ ގޮތް ﷲ މިންވަރުކޮށްދެއްވާނެ ކަމަށް ހުކުރު ހުތުބާގައި ބުނެފިއެވެ.
ހުކުރު ހުތުބާގައި ބުނެފައި ވަނީ ދަރަނި ދިނުމާއި ދަރަނި ނެގުމަކީ އިސްލާމް ދީން ހުއްދަކުރާ ކަމެއް ކަމަށެވެ. އެހެންނަމަވެސް ދަރަނި ނަގަން ވާނީ އެ ދަރަނި އަދާކުރުމުގެ ނިޔަތުގައި ކަމަށް ހުތުބާގައި ވަނީ ބުނެފައެވެ. އަދި ދަރަނި އަދާކުރަން އަވަސްވެގަތުމަކީ ދަރަނި ނެގި ފަރާތަށާއި ދަރަނި ދޫކުރި ފަރާތަށް ވެސް އެންމެ ފައިދާ ހުރި ގޮތް ކަމަށް ވަނީ ބުނެފައެވެ.
ހުކުރު ހުތުބާގައި އިތުރަށް ބުނެފައި ވަނީ ދަރަނި ނަގަންވާނީ އެފަދަ ދަރަނި އަދާކުރާނެ ގޮތުގެ ޚިދުމަތްތެރި ރޭވުމެއް އޮވެގެން ކަމަށެވެ. ދަރަނި ނުދެއްކި ޝަރީއަތަށް މައްސަލަ ހުށަހެޅި ތިމާ ކުށްވެރިވެ އެކަމުގެ ސަބަބުން ދުނިޔެ އާއި އާޚިރަތް ނަގާލެވޭ ކަމަކަށް އެކަން ވެގެން ނުވާނެ ކަމަށް ހުތުބާގައި ވަނީ ބުނެފައެވެ. އެފަދަ ދަރަންޏެއް ނެގުމަށް ވުރެ އައުލާކަން ބޮޑީ ޚަރަދުތައް ކުޑަކޮށް، އިޤްތިޞާދުކުރުން ކަމަށް ވެސް ހުތުބާގައި ބުނެފައިވެއެވެ. ހުތުބާގައި ބުނެފައިވަނީ މުދާ ނެތިކޮށްލުމުގެ ނިޔަތުގައި ދަރަނި ނަގާ މީހާ އަށް ގެއްލުމާއި ހަލާކު މިންވަރުކުރައްވާނެ ކަމަށެވެ.
ދަރަނި ނުދައްކާ ލަސްކުރުމަކީ ދޭދޭ އަފްރާދުންގެ މެދުގައި އޮންނަ ލޯތްބާއި ކުލުނު ނެތިދާ ކަމެއް ކަމަށް ހުތުބާގައިވެއެވެ. ދަރަނި ދެއްކުން ފަސްކުރުމަކީ ދަރަނި ދޫކުރި މީހާއަށް ނުހަނު ގެއްލުންވާ ކަމެއް ކަމަށް ހުތުބާގައިވެއެވެ. އަދި ދަރަނި ނަގަނީ ބައިތުލްމާލުން ކަމަށް ވާނަމަ އެއީ އެންމެހާ ރައްޔިތުންގެ ހައްގުތައް އޭގައި ހިމެނޭ ދަރަންޏެއް ކަމަށް ހުތުބާގައި ވަނީ ބުނެފައެވެ. އެހެންކަމުން އެފަދަ ބޮޑެތި ދަރަނިތައް ނުދައްކާ ލަސްކުރުމަކީ އެ ކަމުގެ ފާފަ އެހެން ދަރަނިތަކަށް ވުރެ ބޮޑުވެދާނެކަމެއް ކަމަށް ހުތުބާގައި ވަނީ ބުނެފައެވެ.
ހުތުބާގައި އިތުރަށް ވަނީ ކިތަންމެ ކުޑަ ދަރަންޏެއް ވިޔަސް އަދާ ނުކުރެވި އޮއްވާ ދުނިޔެ ދޫކޮށް ދާން ޖެހުމަކީ ނުރައްކާތެރިކަމެއް ކަމަށެވެ. އެއީ ފާފަ ފުއްސެވުމަށް ހުރަސް އެޅިދާ ކަމެއް ކަމަށް ހުތުބާގައި ވަނީ ބުނެފައެވެ. މީހަކު ދުނިޔެ ދޫކުރުމަށް ފަހު ކިތަންމެ ކުޑަ ދަރަންޏެއް އޮތަސް އޭނާގެ ވާރުތަވެރީން އެ ދަރަނި އަދާކޮށްދޭން ޖެހޭނެ ކަމަށް ހުތުބާގައި ބަޔާންކޮށްފައިވެއެވެ. ޝަހީދުންނަކީ މަތިވެރި ދަރަޖައެއް ލިބިފައިވާ ބަޔަކަށް ވާއިރު އެ މީހުންނަށް ވެސް ދަރަނީގެ ފާފަ ނުފުއްސެވުމަކީ ދަރަނިވެރިންނާއި އެ މީހުންގެ ވާރުތަވެރިން ސަމާލުވާންޖެހޭ ކަމެއް ކަމަށް ހުތުބާގައި ވަނީ ބަޔާންކޮށްފައެވެ.
