ހަ ފަހަރު ދުނިޔޭގެ މޮޅު ކުޅުންތެރިޔާގެ މަގާމް ހޯދާފައިވާ ބްރެޒިލްގެ މާޓާގެ ގައުމީ ކެރިއަރު ރަތް ކާޑަކުން ނިންމާލަން ޖެހިދާނެ ކަމަށް ބެލެވިއްޖެ އެވެ. ގައުމީ ޓީމަށް ފަހު މުބާރާތް ކުޅެމުންދާ މާޓާއަށް ވަނީ ސްޕެއިން އަތުން 2-0 ން ބަލިވި މެޗުގައި ރަތްކާޑް ދައްކާފައެވެ.

މާޓާއަށް އޮތް އޮތް ހިތްހަމަ ޖެހުމަކީ މެޗުން ބަލިވި ނަމަވެސް ހަނި ގޮތަކަށް ބްރެޒިލް ކްއާޓާ ފައިނަލަށް ދަތުރުކުރުމެވެ. ކްއާޓާ ފައިނަލްގައި ފްރާންސް ބަލިކުރެވިއްޖެ ނަމަ މާޓާއަށް ބްރެޒިލް ގައުމީ ޓީމަށް ކުޅުމުގެ ފުރުޞަތު އަދި ލިބޭނެއެވެ. އޭނާ ވަނީ މިމުބާރާތަށްފަހު ގައުމީ ޓީމަށް ކުޅުން ހުއްޓާލަން ނިންމާފައެވެ. އެހެންކަމުން ރަތްކާޑާއެކު 38 އަހަރުގެ މާޓާ ދަނޑުން ފޭބީވެސް ރޮމުންނެވެ. ރަތްކާޑް ދެއްކީ ފުރަތަމަ ހާފްގެ އިތުރު ވަގުތުގައި އޮލްގާ ކާމޯނާ އަށް ކުރި ނުރައްކާތެރި ފައުލަކަށެވެ.

މާޓާއަށް ރަތްކާޑް ދެއްކިއިރު ދެ ޓީމް އޮތީ ލަނޑެއް ނުޖެހި އެއްވަރު ވެފައެވެ. މެޗުގައި ސްޕެއިން އިން ލީޑް ނެގީ ދެވަނަ ހާފްގެ ކުރީކޮޅު އެވެ. ދެވަނަ ލަނޑު ޖެހީ މެޗުގެ އިތުރު ވަގުތުގެ 17 ވަނަ މިނިޓްގައެވެ. ކުޅުންތެރިންނަށް އަނިޔާވެ, ތަކުރާރުކޮށް މެޗު މެދުކަނޑާލަން ޖެހުމުން އިތުރު ވަގުތުގެ ގޮތުގައި ގިނަ ވަގުތު މެޗުގައި ކުޅެނެވެ.

މާޓާ ވަނީ މީގެކުރިން ބްރެޒިލްއާއެކު ދެ ފަހަރު އޮލިމްޕިކްސް ރިހި މެޑަލް ހޯދާފައެވެ. އެއީ 2004 ވަނަ އަހަރާއި 2008 ވަނަ އަހަރު އެވެ. އެދެ ފައިނަލްގައި ވެސް ބަލިވީ އެމެރިކާ އަތުންނެވެ. މާޓާއަކީ ވަރލްޑްކަޕްގައި ވެސް އެންމެ ގިނަ ލަނޑު ޖަހާފައިވާ ކުޅުންތެރިޔާއެވެ. ވަރލްޑްކަޕްގައި ކުޅުނު 23 މެޗުން އޭނާ ވަނީ 17 ގޯލް ޖަހާފައެވެ.