މި ސަރުކާރުން ދައްކާ ވާހަކަތަކާ ކުރާ މަސައްކަތަކާއި ކުރާ ކަންތައް ދިމާ ނުވޭ - އަމީރު

މި ސަރުކާރުން ދަރަނީގެ މައްސަލަ ހައްލުކުރަން ދައްކާ ވާހަކައާއި ކުރާ މަސައްކަތާއި ކުރާ ކަންތައް ދިމާނުވާ ކަމަށް ކުރީގެ ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެއެވެ.

ހަވަރު ބެރު ޕެނަލް ޑިސްކަޝަންގައި ވާހަކަ ދައްކަވަމުން އަމީރު ވިދާޅުވީ ސަރުކާރަށް ގޮވާލަން ބޭނުންވަނީ، ދަރަނި ރީސްޓްރަކްޗަރކުރާ ވާހަކަ ދައްކާއިރުގައި ދެފުށް ފެންނަ ގޮތަކަށް ވިސްނުންތެރި ކަމާއެކު ކުރިއަށްދިއުމަށެވެ. ރާއްޖޭގައި ހެދިފައި ހުރި ހުރިހާ ލޯން އެގްރީމެންޓްތަކުގައި ޑިފޯލްޓް ކްލޯސަސްތައް ހުންނާނެ ކަމަށެވެ. އެހެން ކަމުން ވަރަށް ބޮޑަށް ދިރާސާކޮށްގެން އެކަމުގައި ކުރިއަށް ދިއުމަށް އަމީރު ވަނީ ސަރުކާރަށް ގޮވާލާފައެވެ.

އަމީރު ވިދާޅުވީ މިއާއެކު ރާއްޖެއިން ނަގާފައި ހުރި ހުރިހާ ލޯނެއްގެ ކްރޮސް ޑިފޯލްޓް ކްރޮސް އެކްޓިވް ވުމަކީ އެކަށީގެންވާ ކަމެއް ކަމަށެވެ. އެހެންކަމުން މިކަމުގައި ވިސްނުންތެރިކަމާއެކު މަސައްކަތްކުރުމަށް ސަރުކާރަށް އަމީރު ވަނީ ގޮވާލައްވާފައެވެ.

އަމީރު ވިދާޅުވީ މުޅި ދުނިޔެއަށް ދައްކައިގެން ދަރަނި ރީސްޓްރަކްޗަރ ކުރާ ވާހަކަ މި ސަރުކާރުން ދައްކާނަމަ އެކަމުގެ ނުރަނގަޅު އަސަރު ދެގޮތަކަށް ކުރާނެ ކަމަށެވެ. އެއްކަމަކަށް އަމީރު ވިދާޅުވީ އިންވެސްޓަރ ކޮންފިޑެންސް ގެއްލޭނެ ކަމަށާއި، ސަރުކާރަށް ބޭނުންވާ ޑެފިސިޓް ފައިނޭންސް ކުރުމަށްޓަކައި ބޭނުންވާ ފައިސާ ހޯދަންވެސް ދަތިވާނެ ކަމަށެވެ. އަދި އެކަމުގެ ސަބަބުން ޕްރައިވެޓް ސެކްޓަރއަށްވެސް އެކަމުގެ ދަތިތައް ދިމާވާނެ ކަމަށެވެ.