ޖުލައި މަހުގެ 22 ން ފެށިގެން އިޒްރޭލުން ޚާން ޔޫނިސް އަށް އަލުން އަރާ ހުއްޓުމެއްނެތި ދެމުންދާ ހަމަލާތަކުގައި މިހާތަނަށް 170ށް ވުރެ ގިނަ ފަލަސްތީން މީހުން ޝަހީދު ވެފައިވާ ކަމަށް ގާޒާގެ ސިވިލް ޑިފެންސް އިން ހާމަ ކޮށްފިއެވެ. އޭގެ އިތުރުން އެތައް ސަތޭކަ މީހުން މި ހަމަލާތަކުގައި ޒަޚަމްވެފައިވާ ކަމަށް ވެސް ބުނެފައިވެއެވެ.

ޒަޚަމްވާ މީހުންގެ އަދަދު ކޮންމެ ދުވަހަކު އިތުރުވަމުން ދާއިރު، ހޮނިހިރު ދުވަހު ގާޒާގެ ހެލްތް މިނިސްޓްރީ އިން ބުނެފައިވަނީ އިޒްރޭލު ސިފައިން މަޖުބޫރު ކޮށްގެން ހޮސްޕިޓަލްތައް ބަންދު ކުރަމުން ގޮސް މިހާރު ޚިދުމަތްދޭ ހަމަ އެކަނި ހޮސްޕިޓަލް ކަމުގައިވާ ނާސިރް މެޑިކަލް ކޮމްޕްލެކްސް ވެސް ބަންދު ކުރަން ޖެހިދާނެ ކަމަށް ބެލެވިފައި ވުމާއެކު ޚާން ޔޫނިސްގައި ސިއްހީ ބޮޑު ކާރިސާ އަކާ ކުރިމަތިލާން ޖެހިދާނެ ކަމުގެ ބިރު އުފެދިފައިވާ ކަމުގައެވެ.

ޚާން ޔޫނިސްގެ ދެކުނުގެ ސަރަހައްދުގައި ދިރިއުޅޭ ހުރިހާ ވަޒަންވެރިން އެމީހުންގެ ވަޒަން ދޫކޮށް ދިއުމަށް އިޒްރޭލުން މަޖުބޫރު ކުރުމާ ގުޅިގެން ދޮޅު ލައްކަ އެއްހާ ފަލަސްތީން މީހުން މަޖުބޫރީ ހާލަތުގައި އެ ސަރަހައްދުން މިހާރު ވަނީ ފައިބާފައެވެ. އިޒްރޭލު ސިފައިން އިންޒާރު ދީފައިވަނީ އެތަނުގައި މަޑުކުރާ ކޮންމެ މީހަކާ މެދު ބާރުގެ ބޭނުން ކުރާނެ ކަމުގައެވެ.

ގެދޮރު ދޫކޮށް ވަޒަނުން ނުކުމެ މަގުމަތިވެފައިވާ މީހުންގެ އަދަދު އެތައް ހާހަކަށް މައްޗަށް ގޮސްފައިވާއިރު، ގާޒާގެ ހެލްތް މިނިސްޓްރީން ބުނެފައިވަނީ އެމީހުންނަށް ބޭނުންވާ ބޯފެނާއި، ސާފުތާހިރު ކަމަށް ބޭނުންވާ ތަކެތި ލިބޭނެ ގޮތެއް ނެތުމުގެ އިތުރުން، ކުންޏާއި ނަޖިހުން އާންމު ތަންތަން ތަޣައްޔަރު ވަމުންދާ ދިއުމާއެކު ޕޯލިއޯ އާއި އެހެނިހެން ނުރައްކާތެރި ބަލިތައް ފެތުރިގެން ދިއުމުގެ ބިރު އުފެދިފައިވާ ކަމުގައެވެ.

ހުސްވި ހަފްތާގައި ގާޒާ އިން ޕޯލިއޯ ވައިރަހުގެ އަސަރު ފެނިފައިވުމާއެކު ދުނިޔޭގެ ސިއްހަތު ޖަމްއިއްޔާ (ޑަބްލިޔުއެޗްއޯ) އިން އެއް މިލިއަން ޕޯލިއޯ ވެކްސިން ޑޯޒް ގާޒާ އަށް ފޮނުވުމުގެ މަސައްކަތް ކުރަމުންދާ ކަމަށް ބުނެފައިވެއެވެ.

ޚާން ޔޫނިސްގައި މިހާރު ޚިދުމަތްދޭ ހަމައެކަނި ހޮސްޕިޓަލް ކަމަށްވާ ނާސިރު ހޮސްޕިޓަލުގެ ޑިރެކްޓަރ މިދިޔަ ބުދަ ދުވަހު ބުނެފައިވަނީ ޒަޚަމް ވެގެން ފަރުވާ ދިނުމަށް ގެންނަ މީހުން ހޮސްޕިޓަލުގައި ފުނި ޖެހިފައި ވުމާއެކު ހޮސްޕިޓަލުގެ އެއްވެސް ތަންކޮޅެއް ހުސްކޮށް ނެތް ކަމަށާއި، ހޮސްޕިޓަލުގެ ތަޅުންގަނޑު މަތީގައިވެސް ޒަޚަމްވެފައިވާ މީހުން ބައިތިއްބައިގެން ފަރުވާ ދެވޭތޯ މަސައްކަތް ކުރަމުން ދާ ކަމުގައެވެ.

އޮކްޓޯބަރު 7 ވަނަ ދުވަހުން ފެށިގެން ގާޒާ ސްޓްރިޕް އަށް ޔަހޫދީ ދައުލަތުގެ ސިފައިން އަރާ ފަލަސްތީން ރައްޔިތުންނަށް ދެމުންދާ ހަމަލާގައި މިހާތަނަށް 39،258 މީހުން މަރުވެފައިވާ ކަމަށާއި 90،500 މީހުން ޒަޚަމްވެފައިވާ ކަމަށް ގާޒާގެ ހެލްތް މިނިސްޓްރީން ބުނެފައިވެއެވެ. މީގެ ތެރޭގައި ގިނައީ އަންހެނުންނާއި ކުޑަކުދިންނެވެ.