ކޮލިޓީ ބޭސް ލިބޭގޮތް ހެދީ ކުރީ ސަރުކާރުގައި ވެފައިވާ އެއްބަސްވުމުގެ ދަށުން، މިސަރުކާރަށް ކްރެޑިޓެއް ނުނެގޭނެ: ޑރ.ޑީޑީ

ބަލްކް ޕްރޮކިއުމެންޓް އުސޫލުން ރާއްޖެ އަށް ބޭސް އެތެރެ ކުރަން ފެށީ ކުރީ ސަރުކާރުގައި ވެފައިވާ އެއްބަސްވުމުގެ ދަށުން ކަމަށާއި، މިސަރުކާރަށް ކްރެޑިޓް ނުނެގޭނެ ކަމަށް އެމްޑީޕީގެ ކުރީގެ ރައީސް ޑރ.އިބްރާހިމް ދީދީ (ޑރ.ޑީޑީ) ވިދާޅުވެއްޖެއެވެ.

ބުރާސްފަތި ދުވަހުގެ ރޭ ބޭއްވި އެމްޑީޕީ ހަރުގެ ޖަލްސާގައި ޑރ.ޑީޑީ ވިދާޅުވީ ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުގައި ވެފައިވާ އެއްބަސްވުމުގެ ދަށުން މިސަރުކާރަށް މިހާރު ބަލްކް ޕްރޮކިއުމެންޓް އުސޫލުން ރާއްޖެ އަށް ބޭސް އެތެރެ ކުރަން ފަށާފައިވާ ކަމަށެވެ. ރައީސް މުއިއްޒުގެ ސްޕީޑްގައި އަދި ގެނެވޭވަރުވީ އެންމެ 7 ބޭސް ކަމަށް ޑރ.ޑީޑީ ވިދާޅުވިއެވެ.

ޑރ.ޑީޑީ ވިދާޅުވީ ކުރީ ސަރުކާރުން ސޮއިކޮށްފައިވާ އެއްބަސްވުމެއްގެ ދަށުން މި މަސައްކަތް ކުރިއަށް ގެންދިޔަ ނަމަވެސް ކޮލެޓީ ބޭސް ގެންނާނެ ކަމާމެދު ސުވާލު އުފެދޭ ކަމަށެވެ.

ރައްޔިތުންގެ ގިނަ ކަންބޮޑުވުންތަކެއް ހުރިކަން ފާހަގަކުރައްވައި ޑރ.ޑީޑީ ވިދާޅުވީ ރާއްޖޭގައި ވިއްކާ ބޭސް ވަރަށް އަގުބޮޑު ކަމަށާއި، އެމައްސަލަ ހައްލު ކުރުމަށް މިސަރުކާރުން މަސައްކަތް ނުކުރާ ކަމަށެވެ. އަދި ބޭސް ފިހާރާތައް ހިންގާ ބޭފުޅުންނާއި، ކްލިނިކް ހިންގާ ބޭފުޅުންނާއި މިސަރުކާރުގެ ބޭފުޅުން ބައްދަލުނުކުރާ ކަމަށާއި، އެބޭފުޅުން ހިޔާލު ނުހޯދާ ކަމަށެވެ.

މީގެ އިތުރުން ޑރ.ޑީޑީ ވިދާޅުވީ އާސަންދައަށް އަދި ހެލްތް މިނިސްޓްރީއަށް ރައްޔިތުން ހުށަހަޅާ ޝަކުވާތަކާއި، މައްސަލަތައް ބަލާނެ ބޭފުޅެއް ނެތް ކަމަށާއި، ދެ މުއައްސަސާއިން ވެސް ޖަވާބުދާރީނުވާ ކަމަށެވެ.

ދިވެހިރާއްޖެއަށް އެތެރެކުރެވޭ ބޭސް ހެޔޮ އަގުގައި ގެނައުމަށްޓަކައި ބަލްކް ޕްރޮކިއުމަންޓް ނިޒާމުގެ ތެރެއިން ކޮލިޓީ ބޭސް ގެނައުމަށް ޔުނައިޓެޑް ނޭޝަންސް ޑިވެލޮޕްމަންޓް ޕްރޮގްރާމް (ޔޫއެންޑީޕީ) އާއި ދިވެހި ސަރުކާރާ ދެމެދު އެއްބަސްވުމެއްގައި ސޮއިކޮށްފައިވަނީ 1 ޖޫން 2023 ގައެވެ. މި އެއްބަސްވުމުގައި ދިވެހި ސަރުކާރުގެ ފަރާތުން ސޮއިކުރެއްވީ މިނިސްޓަރ އޮފް ފިނޭންސް އިބްރާހީމް އަމީރު އާއި މިނިސްޓަރ އޮފް ސްޓޭޓް ފޮރ ހެލްތު އަހްމަދު އާދިލް އާއި ސްޓޭޓް ޓްރޭޑް އޯގަނައިޒޭޝަންގެ މޭނޭޖިންގ ޑިރެކްޓަރު ޢަބްދުالله ސަޢީދެވެ. އަދި ޔޫއެންޑީޕީގެ ފަރާތުން ސޮއިކުރެއްވީ ޔޫއެންޑީޕީ އިން ރާއްޖެއަށް ކަނޑައަޅުއްވާފައި ހުންނަވާ ރެޒިޑަންޓް ރިޕްރެޒެންޓޭޓިވް އެންރިކޯ ގަވޭލިއާ އެވެ.