ބްރިޖުން ޓޯލް ނެގުމަކީ އެމަނިކުފާނުގެ ސިޔާސތެއް ނޫން ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
ބުރާސްފަތި ދުވަހު މެންދުރުފަހު އެކްސް ގައި ޑރ މުއިއްޒު ކުރެއްވި ޕޯސްޓެއްގައި ވިދާޅުވީ، "ރޭގައި އިޢުލާން ކުރެވުނު "މާލެފަހި" ޕްލޭންގައި ޓޯލް ނެގުމާމެދު ދިރާސާއެއް ކުރުމަށް ހިމަނާފައިވަނީ ފަންނީ ލެވެލްގައި އެކަމުގެ ލަފާ އަޅުގަނޑަށް އެރުވުމުގެ ނިޔަތުގައި،" ކަމަށެވެ.
ޑރ. މުއިއްޒު މިހެން ވިދާޅު ވިއިރު، ބުދަ ދުވަހުގެ ރޭ ޚުދު އެމަނިކުފާނު އިފްތިތާހް ކޮށްދެއްވި މާލޭގެ މަގުތަކުގެ ތޮއްޖެހުން ކުޑަ ކުރުމަށް ސަރުކާރުން ރާވާފައިވާ "މާލެ ފަހި" ޕްރޮގްރާމްގެ ތެރެއިން ސިނަމާލެ ބްރިޖުން ފީ އެއް ނެގުމުގެ މަސައްކަތް ކުރިއަށް ގެންދިއުން އޮތީ އެ ޕްރޮގްރާމްގެ ހަރަކާތެއްގެ ގޮތުގައި ސަރުކާރުން ރާވާފައެވެ.
ޓްރާންސްޕޯޓް މިނިސްޓްރީން އިންތިޒާމް ކުރި މި ރަސްމިއްޔާތުގައި "މާލެފަހި" ޕްރޮގްރާމް އާ ބެހޭ ގޮތުން ދެއްކި ވީޑިއޯގައި ބުނެފައިވަނީ މި ފީ ނަގަން ނިންމީ ބްރިޖް އާއި ހައިވޭ ފަދަ ތަންތަން ދެމެހެއްޓެނިވި ގޮތެއްގައި ބެލެހެއްޓުމުގެ ގޮތުން ކަމުގައެވެ.
ސަރުކާރުން މިކަން ހާމަ ކުރުމާއެކު ގިނަ ބަޔެއްގެ ފާޑު ކިޔުން ވަނީ ޑރ. މުއިއްޒުގެ ސަރުކާރަށް އަމާޒުވެފައެވެ. ސޯޝަލް މީޑީއާގައި ސަރުކާރަށް ފާޑު ކިޔުމުގެ ތެރޭގައި ރިޔާސީ އިންތިޚާބުގެ ކެމްޕޭންގައި ބްރިޖުން ޓޯލް ނެގުމާ ދެކޮޅު ކަމަށް ޑރ. މުއިއްޒު ވިދާޅުވެފައި ހުރި ވާހަކަތައްވެސް މީހުން ވަނީ ފެންމަތި ކޮށްފައެވެ.
ރިޔާސީ ކެމްޕޭނުގައި ޑރ.މުއިއްޒު ވިދާޅުވެފައިވަނީ ޕީޕީއެމް ޕީއެންސީގެ ވެރިކަމެއްގައި ސިނަމާލެ ބުރިޖުން ދަތުރު ކުރާ ފަރާތްތަކުގެ އަތުން ފީއެއް ނުނަގާނެ ކަމުގެ ޔަގީންކަން ދިވެހި ރައްޔިތުންނަށް ދޭ ކަމުގައެވެ.
އަޅުގަނޑުމެންގެ ވެރިކަމެއްގައި ސިނަމާލެ ބްރިޖު ބޭނުންކުރާ ރައްޔިތުން އަތުން ފީ ނަގަން ނިންމާފައިވާ ކަމަށް ފަތުރަމުންދަނީ ކަނޑައެޅިގެން ދޮގު ޚަބަރެއް. ދޮގު ބުހުތާނު ވާހަކަތައް ފެތުރުމަކީ ޒިންމާދާރުކަން ކުޑަ، ނާތަހުޒީބު ޢަމަލެއް.ހުސްވި އަހަރު އޮގަސްޓް މަހުގެ 29 ގައި އެކްސް ގައި ޑރ. މުއިއްޒު ކުރެއްވި ޕޯސްޓެއް
ބުރާސްފަތި ދުވަހު ބްރިޖުން ޓޯލް ނެގުމާ ބެހޭ ގޮތުން ސަރުކާރުގެ ސިޔާސަތު ހާމަ ކުރައްވަމުން ޑރ މުއިއްޒު ވިދާޅުވި ވާހަކަފުޅުގައި ޓޯލް ނެގުމުގެ ވިސްނުން ސަރުކާރުން އެއް ގޮތަކަށްވެސް ނުގެންގުޅޭނެކަމުގެ ވާހަކައެއް ވިދާޅެއް ނުވެއެވެ. އޭގެ ބަދަލުގައި ވިދާޅުވީ، ޓޯލް ނެގުމާ ބެހޭ ގޮތުން ދިރާސާ ހެދިޔަސް މާލެ ސިޓީގެ މަގުތައް އެއްކޮށް ރަނގަޅު ފެންވަރަކަށް ހެދުމުން ނޫނީ އަދި ރައްޔިތުންގެ އިގްތިސާދީ ހާލަތު ރަނގަޅު ވެގެން ނޫނީ ރައްޔިތުން އަތުން ޓޯލް ނުނަގާނެ ކަމުގައެވެ.
އެގޮތުން ލިބޭ ފަންނީ ލަފާގައި ޓޯލް ނަގަން ހުށަހެޅުން އަޔަސް، މާލެ ސިޓީގެ މަގުތައް އެއްކޮށް ރަނގަޅު ފެންވަރަކަށް ހަދާ ނިމުމުގެ ކުރިން އަދި އެކަށީގެންވާ މިންވަރަކަށް ޕާކިންގ ގެ މައްސަލަ ޙައްލު ވުމުގެ ކުރިން، އަދި ޤައުމާއި ރައްޔިތުންގެ ޢިޤްތިޞާދީ ޙާލަތު އެކަށީގެންވާ ފެންވަރަކަށް މަތިވުމުގެ ކުރިން ޓޯލް ނަގަން ނުފަށާނެ ކަމުގެ ޔަޤީންކަން އަރުވަން.ރައީސް ޑރ މުޙައްމަދު މުއިއްޒު
ބްރިޖުން ދަތުރުކުރާ މީހުންގެ އަތުން ފީ ނެގުމަށް "މާލެފަހި" ޕްރޮގްރާމްގައި އޮތް އޮތުން އެއީ ރައީސްގެ ސިޔާސަތެއް ނޫން ކަމަށް ޑރ މުއިއްޒު ވިދާޅުވިއިރު، މާލެފަހި ޕްރޮގްރާމަކީ "އިއްޒަތްތެރި ރައީސުލް ޖުމްހޫރިއްޔާ ޑރ. މުހައްމަދު މުއިއްޒު ގެ އިސްނެންގެވުމުގެ މަތިން އެ މަނިކުފާނުގެ ޚާޢްސަ އިރުޝާދާ އެކި ފަރުމާ ކުރެވުނު ޕްރޮގްރާމެއް،" ކަމަށް ޓްރާންސްޕޯޓް މިނިސްޓަރ މުހައްމަދު އަމީން، މި ޕްރޮގްރާމާ ބެހޭ ގޮތުން ނެރުނު ފޮތް ފައްޓަވަމުން ވިދާޅުވެފައިވެއެވެ.
