ދެކުނު ލުބުނާނަށް އިޒްރޭލުން ބޮން އަޅައިފި
ލުބްނާން އަށް ހަމަލާ ދިނީ، ޔަމަން އަށް ހޮނިހިރު ދުވަހުގެ ރޭ އިޒްރޭލުން ދިން ހަމަލާ އާ ގުޅިގެން ހިޒްބުﷲ އިން ސަރަހައްދުގައި "ހަނގުރާމައިގެ އައު އަދި ނުރައްކާތެރި މަރުހަލާއެއް ފެށުނީ،" ކަމަށް ބުނެފައި ވަނިކޮށްނެވެ.
ދެކުނު ލުބުނާނަށް އިޒްރޭލުން ހަމަލާ ދިނީ ޔަމަން އަށް ހަމަލާ ދިންތާ މަދު ގަޑީއިރެއްގެ ފަހުން
ދެކުނު ލުބުނާނަށް ހޮނިހިރު ދުވަހުގެ ރޭ އިޒްރޭލުން ބޮން އަޅައިފިއެވެ.
އިޒްރޭލުން ބޮން އެޅީ އިޒްރޭލް-ލުބްނާން ބޯޑަރާ ގާތްގަނޑަކަށް 40 ކިލޯމީޓަރު ދުރުގައި އޮންނަ ލުބްނާންގެ އަދްލުން ސިޓީ އަށް ކަމަށް ރޮއިޓާސް އިން ބުނެފައިވެއެވެ.
ރޮއިޓާސް އިން ބުނީ ބޮން އެޅުމާއެކު ބާރުގަދަ އަޑުފައްގަނޑާއެކު ސަރަހައްދުގައި ވަރަށް ބޮޑަށް ރޯވެފައިވާ ކަމަށެވެ.
ހަމަލާގައި އާންމުންގެ ހަތަރު މީހުން ޒަޚަމްވި ކަމަށް ލުބުނާންގެ އަސްކަރިއްޔާ އާ ހަވާލާ ދީ ރޮއިޓާސް އިން ބުނެފައިވެއެވެ.
ދެކުނު ލުބްނާނަށް ހަމަލާ ދިނުމުގެ ކުރިން އިޒްރޭލުން ވަނީ ހޮނިހިރު ދުވަހުގެ ރޭ ޔަމަން ގެ ޕޯޓް ސިޓީ ހުދައިދާ އަށް ހަމަލާ ދީފައެވެ. އެއާ އެކު ލުބުނާންގެ ހިޒްބުﷲ އިން ބުނެފައިވަނީ ސަރަހައްދުގައި "ހަނގުރާމައިގެ އައު އަދި ނުރައްކާތެރި މަރުހަލާއެއް ފެށުނީ،" ކަމުގައެވެ.
ޔަމަން އަށް އިޒްރޭލުން ހަމަލާދިނީ އިޒްރޭލްގެ އިގްތިސާދީ ނާރެސް ކަމުގައިވާ ތެލް އަވީވް އަށް ހުކުރު ދުވަހު ދިން ޑްރޯން ހަމަލާގެ ބަދަލު ހިފުމުގެ ގޮތުން ކަމަށް އިޒްރޭލުގެ އަސްކަރިއްޔާ އިން ވަނީ ބުނެފައެވެ.
