މާލެ ސިޓީ ކައުންސިލްގެ ބައި އިލެކްޝަންގެ 3 ގޮނޑި ވެސް ޕީއެންސީއަށް

މާލެ ސިޓީ ކައުންސިލްގެ ބައި އިލެކްޝަންގެ 3 ގޮނޑި ވެސް ސަރުކާރު ހިންގާ މައި ޕާޓީ، ޕީއެންސީއަށް ޔަގީންވެއްޖެއެވެ.

މިހާތަނަށް ހޮނިހިރު ދުވަހު ބޭއްވި ބައި އިލެކްޝަންތަކުގެ ވަގުތީ ނަތީޖާ ހާމަކޮށްފައެއް ނުވެއެވެ.

އެހެންނަމަވެސް ޕީއެންސީން ވަނީ ހުޅުމާލެ ދާއިރާގެ ގޮނޑި އާއި ހެންވޭރު ހުޅަނގު ދާއިރާގެ ގޮނޑި އާއި މައްޗަންގޮޅި މެދު ދާއިރާގެ ގޮނޑި ކާމިޔާބުކޮށްފައިކަން މިހާތަނަށް ވޯޓުގުނުމަށް ފަހު އިއުލާންކުރި ނަތީޖާ އިން އެނގެއެވެ.

އެގޮތުން ހުޅުމާލެ ދާއިރާއަށް ހޮވިފައި ވަނީ އެ ދާއިރާ އަށް ހޮވިފައި ވަނީ ޕީއެންސީގެ ޓިކެޓްގައި ވާދަކުރި އަލީ އައިމަން، ހ. ފުޖޭރާ އެވެ. އޭނާ ވާދަކުރީ އެމްޑީޕީ އިން ކުރިމަތިލި އަހުމަދު ރަޝީދު (ތުތީ)، ހުޅުމާލެ. މާވަހަރު 3 އާއިއެވެ.

މައްޗަންގޮޅި މެދު ދާއިރާ އަށް ހޮވުނީ ޕީއެންސީން ވާދަކުރި ފާތިނަތު އިޝާން އަލީ، އައިނާއެޑަމްސްއެވެ. އޭނާ ވާދަކުރީ އެމްޑީޕީ ޓިކެޓްގައި އިންތިޚާބުގައި ވާދަކުރި ހައްވާ ޝިފާނާ، މއ. ރިހިރާޅުއާއިއެވެ.

ހެންވޭރު ހުޅަނގު ދާއިރާ އަށް އެމްޑީޕީ އިން ވާދަކުރި މުހައްމަދު ޢަލީ ޖިނާދު، ހ. ގްރީންޒެސްޓް އާއި ވާދަކޮށް އިންތިޚާބު ކާމިޔާބުކުރީ ޕީއެންސީގެ ޓިކެޓުގައި ކުރިމަތިލި ފާތިމަތު ޝައުފާ ސަލީމް، ހ. އިސްފަހާންއެވެ.

އާދިއްތަ ދުވަހު ބޭއްވި ބައި އިލެކްޝަންތަކުގެ ތެރެއިން ކުޅުދުއްފުށި އުތުރު ދާއިރާ އަށް ހޮވިފައި ވަނީ ޕީއެންސީގެ ކެންޑިޑޭޓު އިބްރާހިމް އަހުމަދުއެވެ. ބިލެތްދޫ ދާއިރާގެ ރައީސަކަށް ހޮވިފައި ވަނީ ޕީއެންސީގެ ކެންޑިޑޭޓު އަރީޝް އިސްމާއިލްއެވެ.

ހޮނިހިރު ދުވަހު ބޭއްބި ބައި އިލެކްޝަންތަކަށް ބައެއް ދާއިރާތަކަށް ކުރިމަތިލީ އެންމެ ކެންޑިޑޭޓެއް ކަމުން އިންތިހާބަކާ ނުލައި އެ ދާއިރާތަކުގެ ގޮނޑިތައް ވަނީ ކުރިމަތިލި ފަރާތްތަކަށް ކާމިޔާބުވެފައެވެ. އެ ގޮނޑިތައް ކަށަވަރު ކުރީ ވެސް ޕީއެންސީގެ ބޭފުޅުންނެވެ.

އެގޮތުން ޅ. އަތޮޅު ކައުންސިލްގެ ރައީސަކަށް މުހައްމަދު ސަނީ އަދި ހުޅުދުއްފާރު ކައުންސިލް މެމްބަރަކަށް އަބްދުﷲ ސާމިހު އާއި ހިންނަވަރު އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ މެމްބަރަކަށް ފާތުމަތު މޫސާ ހޮވުނީ އިންތިޚާބަކާއި ނުލައެވެ.