ސަރުކާރަށް ދިމާވެގެން އުޅޭ މައްސަލަ އަކީ ހިންގަން ނޭނގުމާއި އިޚުލާސްތެރިކަން ކުޑަވުން - އާޒިމް
އާޒިމް ވަނީ ސަރުކާރުގެ ހިންގުންތެރިކަމެއް ނެތް ކަން ފާހަގަކުރައްވާ އެކަމަށް ފާޑު ވިދާޅުވެފަ
މާލެ ސިޓީގެ މޭޔަރު އާދަމް އާޒިމް
ސަރުކާރަށް ދިމާވެގެން އުޅޭ މައްސަލަ އަކީ ހިންގަން ނޭނގުމާއި އިޚުލާސްތެރިކަން ކުޑަވުންކަމަށް މާލެ ސިޓީގެ މޭޔަރ އާދަމް އާޒިމް ވިދާޅުވެއްޖެއެވެ.
އާޒިމް އެފަދައިން ވިދާޅުވީ ރާއްޖެޓީވީގެ ފަލަސުރުޙީ ޕްރޮގްރާމްގައި ވާހަކަދައްކަވަމުންނެވެ.
އޭނާ ވިދާޅުވީ މި ސަރުކާރު އޮތީ އިގްތިޞާދީ އަނދަވަޅެއްގައި ކަަމަށް އެއްކޮޅުން ބުނަމުންދާ އިރު އަނެއްކޮޅުން ސިޔާސީ މަޤާމްތަކަށް ގިނަ ބަޔަކު އައްޔަންކުރަމުންދާ ކަމަށެވެ.
އެކަމަކީ ދެކޮޅު ޖެހޭނެ ކަމެއް ނޫން ކަމަށާއި އެއީ އާއްމުން ބަލައިގަންނާނެ ކަމެއް ނޫން ކަމަށް އޭނާ ވިދާޅުވިއެވެ.
އާއްމުން ތިބީ އެ ވާހަކަތަކާއި މެދު މާޔޫސްވެފައި ކަމަށް އޭނާ ވަނީ ވިދާޅުވެފައެވެ.
މީގެ އިތުރުން، އެމްޑީޕީގެ ސަރުކާރުތަކުގައި މަސައްކަތް ކުރީ އާއްމުން ބޭނުންވާ ކަންކަން އިޚުލާސްތެރިކަމާއި އެކު ހާސިލްކޮށްދިނުމަށް ކަމަށާއި ޕީއެންސީގެ މި ސަރުކާރުން އެ ސިފަ ނުފެންނަ ކަަމަށް އާޒިމް ވިދާޅުވިއެވެ.
އާޒިމް ވަނީ މި ސަރުކާރުން މަސައްކަތް ކުރަނީ ވަކި ބަޔަކު ހިތްހަމަޖައްސަން ކަމަށްވިދާޅުވެފައެވެ. އަދި މަސައްކަތްތައް ނުކުރެވި ދާ ކޮންމެ ދުވަހަކީ ވެސް ގެއްލޭ ދުވަހެއް ކަމަށް އާޒިމް ވިދާޅުވިއެވެ. އެއްވެސް ތަނެއް ހިނގާތަން ނުފެންނަ ކަމަށާއި ހުރިހާ ތަނެއް ހުރީ ހުއްޓިފައި ކަމަށް އާޒިމް ވިދާޅުވިއެވެ. އާޒިމް ވަނީ ސަރުކާރުގެ ހިންގުންތެރިކަމެއް ނެތް ކަމަށް ފާހަގަކުރައްވާ އެކަމަށް ފާޑު ވިދާޅުވެފައެވެ. ރާއްޖޭގައި އިގްތިޞާދު މެނޭޖް ނުކުރެވޭ ވަރުގެ ކަމެއް ދިމާވެފައި ނެތް ކަމަށް ވެސް އާޒިމް ވިދާޅުވިއެވެ.
