ފަލަސްތީން ދައުލަތް ބަލައި ނުގަންނަން އިޒްރޭލުގެ ގާނޫނު ހަދާ މަޖިލީސް ކްނެސެޓް އިން ފާސްކޮށްފި

ފަލަސްތީން ދައުލަތް އިޒްރޭލުން ބަލައި ނުގަންނަން އިޒްރޭލުގެ ގާނޫނު ހަދާ މަޖިލީހުން ފާސްކޮށްފިއެވެ.

ބުރާސްފަތި ދުވަހު މި ގަރާރަށް ގާނޫނު ހަދާ މަޖިލީހުގައި 68 މެމްބަރުން ފެންނަ ކަމަށް ވޯޓުދީފައިވާއިރު، ނުފެންނަ ކަމަށް ވޯޓު ދީފައިވަނީ އެންމެ 9 މެމްބަރުން ކަމަށް އިޒްރޭލްގެ މީޑިއާ އިން ބުނެފައިވެއެވެ.

އެ ގަރާރުގައި ބުނެފައިވަނީ، ފަލަސްތީން ދައުލަތް އުފެދިއްޖެ ނަމަ، އިޒްރޭލް ދެމިއޮތުމަށް ނުރައްކާ ވާނެ ކަމަށާއި، ފަލަސްތީން އާއި އިޒްރޭލް އާ ދެމެދުގައި ހަމަ ނުޖެހުންތައް އިތުރުވާނެ ކަމަށާއި، އަދި ސަރަހައްދީ ހަމަ ނުޖެހުން އެކަމުގެ ސަބަބުން އިތުރުވެގެން ދާނެ ކަމުގައެވެ.

ގަރާރު ސްޕޮންސަރ ކުރީ ބޮޑުވަޒީރު ނަތަންޔާހޫ ގެ ޕާޓީ އާއި އެ ޕާޓީ އާއެކު ކޯލިޝަން ހަދާފައިވާ ހައްދުފަހަނަ އެޅި ކަނާތުފިޔައިގެ ޕާޓީތަކުންނެވެ.

ޓައިމްސް އޮފް އިޒްރޭލުން ބުނެފައިވާ ގޮތުގައި އިދިކޮޅު ލީޑަރު ޔައިރު ލަޕިޑްގެ ޕާޓީން ވަނީ ގަރާރަށް ތާއީދު ނުކުރުމަށް ސެޝަން ދޫކޮށް ގޮސްފައެވެ. ކުރިން މި ޕާޓީން ބުނެފައިވަނީ ދެ ދައުލަތުގެ ހައްލަށް ތާއީދު ކުރާ ކަމަށެވެ.

އިޒްރޭލްގެ ކްނެސެޓްގެ ބޮޑު އަޣުލަބިއްޔަތަކުން ފަލަސްތީން ދައުލަތް ބަލައި ނުގަތުމަށް ފާސް ކުރުމާ ގުޅިގެން ފަލަސްތީންގެ ނޭޝަނަލް އިނީޝިއޭޓިވް ގެ ސެކްރެޓަރީ ޖެނެރަލް މުސްތުފާ ބަރުގޫތީ ވަނީ ވަރަށް ބޮޑަށް ނުރުހުން ފާޅު ކޮށް ފާޑު ވިދާޅުވެފައެވެ.

އެކްސް ގައި އޭނާ ވިދާޅުވީ، މިއީ، ފަލަސްތީން ރައްޔިތުނާ ސުލްހަ ވެރިވުން ދޫކޮށްލުން ކަމަށެވެ. އަދި މީއީ އޮސްލޯ އެގްރީމެންޓް މަރުވެއްޖެ ކަން ރަސްމީ ކޮށް އިއުލާން ކުރުން ކަމަށެވެ.

1993 ވަނަ އަހަރު އޮސްލޯ އެކޯޑް ގައި ފަލަސްތީން އާއި އިޒްރޭލުން ސޮއިކޮށްފައިވާއިރު، އެ އެއްބަސްވުމުގައި ގޮވާލާފައިވަނީ މިނިވަން ފަލަސްތީން ދައުލަތެއް އިޒްރޭލް ދައުލަތާ އިންވެގެން އުފެދިފައި އޮތުމަށެވެ.

މިކަން މިހެން އޮތް ނަމަވެސް އިޒްރޭލުން މިހާތަނަށް ގެންގުޅެމުން އައިސްފައިވަނީ ދެ ދައުލަތް ޖެހިޖެހިގެން އުފެދުމަށް ވެފައިވާ އެއްބަސްވުމާ ޚިލާފް ސިޔާސަތުތަކެވެ. އެގޮތުން ހިފާފައިވާ ހުޅަނގު އައްސޭރީގައި ގާނޫނުން ބޭރުން ޔަހޫދީން ވަޒަންވެރި ކުރުވުމާއި، ގާޒާ ބަންދުކޮށްގެން އުޅުން ފަދަ ކަންކަން ހިމެނެއެވެ.

ފަލަސްތީނުގެ ސަރުކާރުގެ އޮފިޝަލް ހުސެއިން އަލް-ޝެއިޚް ވިދާޅުވީ، މިކަމުން އެނގިގެން ދަނީ ތާއަބަދަށް ހިސޯރުކޮށްގެން ތިބުމުގެ ވިސްނުން އިޒްރޭލުން ގެންގުޅޭ ކަމެވެ. އަދި މިއީ އިސްތިއުމާރީ ދައުލަތުން އެއްވެސް ހާލެއްގައި ބައިނަލް އަގްވާމީ ގާނޫނަށް އިހްތިރާމް ނުކުރާނެ ކަމުގެ ހެތްކެއް ކަމަށްވެސް އޭނާ ވިދާޅުވެފައިވެއެވެ.

އުރުދުންގެ ޚާރިޖީ ވުޒާރާ އިން ވަނީ އިޒްރޭލުގެ ގާނޫނު ހަދާ މަޖިލީހުން ފާސްކުރި މި ގަރާރު ވަރަށް ބޮޑަށް ކުށްވެރި ކޮށްފައެވެ. މިއީ ނުރައްކާތެރި ގޮތެއްގައި ބައިނަލް އަގްވާމީ ގާނޫނާ ޚިލާފް ވުން ކަމަށްވެސް އުރުދުން އިން ބުނެފައިވެއެވެ.

އިޒްރޭލުގެ ގާނޫނު ހަދާ މަޖިލީހަށް ހުށަހެޅި ގަރާރުގައި އޮތް ކަމަށް ޓައިމްސް އޮފް އިޒްރޭލްގައި ބުނެފައިވަނީ ފަލަސްތީން ދައުލަތެއްގެ ގޮތުގައި ގާއިމް ވެއްޖެ ނަމަ އިސާހިތަކު މުޅި ފަލަސްތީނުގެ މައްޗަށް ހަމާސް ގަދަވެ އެއާކުކު ފަލސްތީނަކީ ހައްދުފަހަނަ އެޅި މީހުންގެ ނިރުބަވެރި ބޭސް އަކަށް ހަދާ، އީރާނާ އާ ގުޅިގެން އިޒްރޭލް ނައްތާލާނެ ކަމަށެވެ.

އޭގެ އިތުރުން ގަރާރުގައި ބުނެފައިވަނީ ފަލަސްތީން ދައުލަތް ގާއިމް ވުމަށް މި ވަގުތު ފުރުސަތު ދިނުމަކީ ނިރުބަވެރިކަމަށް ދެވޭ އިނާމެއް ކަމަށާއި، ހަމާސް އާއި ހަމާސް އަށް ތާއީދު ކުރާ ފަރާތްތަކަށް ލިބުނު ކާމިޔާބެއް ކަމަށް އެފަރާތްތަކުން ދެކޭނެ ކަމަށެވެ.

އިޒްރޭލުގެ ކްނަސެޓް އިން ފަލަސްތީން ދައުލަތް ބަލައި ނުގަތުމަށް ފާސް ކުރި މިއީ ފުރަތަމަ ފަހަރެއް ނޫނެވެ.

އަނެއްކޮޅުން ފަލަސްތީން ދައުލެއްގެ ގޮތުގައި ބަލައިގަންނަ ގައުމުތަކުގެ އަދަދު ދުވަހެއް ދުވަހަކަށް އަންނަނީ އިތުރުވަމުންނެވެ.

އިޒްރޭލުން ގަރާރު ފާސްކުރި ވަގުތަކީ ނަތަންޔާހޫ އެމެރިކާގެ ކޮންގްރެސް ގައި އަންނަ ހަފްތާގައި ތަގްރީރު ކުރެއްވުމަށް ހަމަ ޖެހިފައިވާ ދަނޑިވަޅެއްގައި ކަން ފާހަގަ ކުރެވެއެވެ. މީޑިއާ ރިޕޯޓްތައް ބުނާ ގޮތުގައި ކޮންގްރެސްގައި ހިމެނޭ ޑިމޮކްރެޓިކް ޕާޓީގެ މެމްބަރުންގެ މެދުގައި ނަތަންޔާހޫ ގާޒާ ހަނގުރާމައިގައި ކަންތައްތައް ކުރައްވަމުން ގެންދަވާ ގޮތާ މެދު ވަނީ ވަރަށް ބޮޑަށް ޚިޔާލު ތަފާތުވުން އުފެދިފައެވެ.