އިލެކްޓްރޯނިކް ވޯޓިންގެ ވިސްނުމެއް ނެތް، ރައްޔިތުން އެ ބަލައި ނުގަންނާނެ - ފުއާދު
17 ޖުލައި 2024 | ބުދަ 13:19މި ނިޒާމަކީ މުޅި ދުނިޔޭގެ ހުރިހާ އެންމެންހެން އެ ބަލައިގަނެ އެއަށް ތައުރީފުކޮށް އެއާ ދޭތެރޭގައި އެއްވެސް ސުވާލެއް ނުއުފެދޭ ނިޒާމެއް
އިލެކްޝަންސް ކޮމިޝަންގެ ރައީސް ފުއާދު ތައުފީގު މިނިވަން މުއައްސަސާތަކުގެ ކޮމިޓީގައި މައުލޫމާތުދެއްވަނީ
އިލެކްޓްރޯނިކް ވޯޓިންއަށް ދިއުމުގެ ވިސްނުމެއް ނެތް ކަމަށާއި، ރައްޔިތުން އެ ބަލައި ނުގަންނާނެ ކަމަށް އިލެކްޝަންސް ކޮމިޝަންގެ ރައީސް ފުއާދު ތައުފީގު ވިދާޅުވެއްޖެއެވެ.
ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީގައި ފުވައްމުލަކު ދެކުނު ދާއިރާގެ މެންބަރު އިބްރާހިމް ހުސައިން ކުރެއްވި ސުވާލުގެ ޖަވާބުގައި އިލެކްޝަންސްގެ ކޮމިޝަންގެ ރައީސް ފުއާދު ތައުފީގު ވިދާޅުވީ އޮންލައިން ވޯޓަކަށް ދިއުމުގެ ވިސްނުމެއް ކޮމިޝަނުގައި ނެތް ކަމަށެވެ. އެގޮތުން އޮންލައިން ވޯޓިންގއަށް ދިޔަ ޔޫރަޕްގެ ބައެއް ގައުމުތަކުން އަލުން ކަރުދާސް ވޯޓު ބޭނުން ކުރަން ފަށާފައިވާ ކަމަށެވެ. ފުއާދު ވިދާޅުވީ އެންމެ ބޮޑު އެއް ސަބަބަކީ ވޯޓު ކަރުދާސް ނުފެނި އޭގައި ޖަހާފައި ހުންނަ ފާހަގަ ނުފެނި ނަތީޖާ އޮތްގޮތް ބުނިނަމަވެސް އަދިވެސް ރައްޔިތުންގެ ހިތުގައި ސުވާލު އުފެދޭނެ ކަމަށެވެ.
ފުއާދު ވިދާޅުވީ އޮންލައިން ވޯޓިންގ ރައްޔިތުން ބަލައި ނުގަނެ އެއަށް ދާންވެއްޖެއްޔާ ރައްޔިތުން އެކަމެއް ބަލައި ނުގަންނާނެ ކަމަށެވެ. އަދި އިލްކެޓްރޯނިކް ވޯޓިންގެ ވާހަކަ 2008 ހިސާބުގައި ވެސް ދެއްކުނު ކަމަށާއި، ނަމަވެސް އެއިރު ސަރުކާރުގެ ބޭފުޅުން އެކަމަށް އެއްބަސްވި ނަމަވެސް އިިދިކޮޅުގައި ތިބި ފަރާތްތަކުން އެކަން ބަލައި ނުގަންނަ ކަމަށެވެ.
އަދި ވޯޓު ކަރުދާސްކޮޅު ބޭނުން ނުކުރަން އިލެކްޝަންސް ކޮމިޝަންގެ ތާއިދެއް ނެތްކަމަށް ފުއާދު ވިދާޅުވިއެވެ.
އިލެކްޝަންސް ކޮމިޝަންގެ ނައިބުރައީސް އަލީ ނަޝާތު ވިދާޅުވީ ކޮމިޝަނުން މިކަން ނިންމާފައިވާ ކަމަށާއި، ގާނޫނަކުން ނުވަތަ އެހެންގޮތަކަށް ލާޒިމް ކޮށްފިނަމަ އެގޮތަށް އަމަލުކުރާނެ ކަމަށެވެ. އަދި ރާއްޖެއަށް އިލެކްޓްރޯނިކް ވޯޓިންގެ ނިޒާމެއް ގެނައުމުގެ ވިސްނުމެއް ނެތް ނަމަވެސް، ހަރަދު ކުޑަކުރުމަށް ކުރަންޖެހޭ އެހެނިހެން ކަންކަން ކުރަމުން އަންނަ ކަމަށެވެ.
