"ޗިލިން ވިތު ސެލް މޭޓްސް" ސްޓޭޓަސްއާ އެކު ޖަލު ސާފު ކުރަން ފެށުން

ދާޚިލީ ވަޒީރު އަލީ އިޙްސާންގެ އަމިއްލަފުޅު ތަޖުރިބާއެއް ބުދަ ދުވަހު ރާއްޖެޓީވީގެ ފަށާއިރު ޕްރޮގްރާމްގައި ވަޒީރު ހިއްސާ ކުރެއްވިއެވެ. ޖަލު ސާފު ކުރުމަށް ފެށިގެން މި އުޅޭ މަސައްކަތްތައްވެސް އެ ތަޖުރިބާއާ ކޮންމެވެސް ވަރަކަށް ގުޅެއެވެ.

ވަޒީރު ވިދާޅުވި ގޮތުގައި އެއީ މަޤާމާ ޙަވާލުވެވަޑައިގެން ފުރަތަމަ މަހެވެ. ފޭސްބުކްއިން ފެންނަނީ ވަޒީރު ދަންނަ މީހެއްގެ ސްޓޭޓަސްތަކާއި ޕޯސްޓުތަކެވެ. އޭނާއަކީ ޖަލުގައި ހުރި މީހެއްކަން ވަޒީރަށްވެސް އެނގިވަޑައިގަންނަވައެވެ.

އެހިސާބުން ވަޒީރު ކަރެކްޝަންސްގެ އޮފިސަރުން ލައްވައި އޭނާ ހުރި ގޮޅި ރެއިޑް ކުރިއެވެ. ރެއިޑްކޮށް ފޯނާއި އެހެން ސާމާނުތައް ގެންދިޔައެވެ.

އެހެންނަމަވެސް ޖެހިގެން އައި ދުވަސް އަނެއްކާވެސް އަލިވިލުނީ އެއްކަލަ ޖަލުގައި ހުރި މީހާގެ ޕޯސްޓުތަކާއެކުގައެވެ. އެފަހަރުވެސް ރެއިޑް ކުރިއެވެ. ފޯނާއި އިލެކްޓްރޯނިކް ސާމާނުވެސް ފެނުނެވެ.

އެހެންނަމަވެސް އަނެއް ދުވަހު އެއްކަަލަ މިހާގެ ސްޓޭޓަސްތައްވެސް ހަމަ ފެނުނެވެ.

ވަޒީރު ވިދާޅުވި ގޮތުގައި އެހިސާބުން، ކަރެކްޝަންސްގެ އެތެރޭގެ ދޮރު ނިޒާމީ ގޮތެއްގައި ހުޅުވިފައި ހުުރިކަން ވަޒީރަށްވެސް ޤަބޫލު ކުރެވުނެވެ.

އެހެންކަމުން މިނިސްޓްރީން ދެން އެކަން ހިއްސާކުރީ ދިވެހި ފުލުހުންގެ ޚިދުމަތުގެ އިންޓެލިޖެންސްއާއެވެ. އަދި ފުލުހުންނާއި ކަމާ ގުޅުންހުރި އިދާރާތައް ގުޅިގެން މިހާރު ބޮޑު އޮޕަރޭޝަނެއް ހިންގައި، މި މައްސަލައާ ގުޅުންހުރި ގިނަ އަދަދެއްގެ ޖަލު އޮފިސަރުންވެސް މިވަނީ ހައްޔަރު ކޮށްފައެވެ.

ވަޒީރު ވިދާޅުވި ގޮތުގައި ހައްޔަރުކުރި އޮފިސަރުންގެ ލޮކަރުތަކުންވެސް ގިނަ އަދަދެއްގެ ފޯނާއި އިލެކްޓްރޯނިކް ސާމާނު ފެނިފައިވެއެވެ.

ކޮންމެއަކަސް، ޖަލުގައި ފޯނު ގެންގުޅޭކަން މިފަހަރު ބަސްޓު މި ވީ "ޗިލިންގ ވިތް ސެލްމޭޓްސް" ޖަހާފައި ދޫކޮށްލި ސްޓޭޓަސްއަކުންނެވެ. އެ ސްޓޭޓަސްއާ އެކު ޖަލު ސާފު ކުރުމަށް ފެށި މި މަސައްކަތް އެކަށީގެންވާ ކޮޅެއްގައި ޖެހެންދެން ކުރާނެކަމަށް މިއަދު ގިނަ ރައްޔިތުން ތިބީ އުއްމީދު ކޮށްގެންނެވެ.